Apocalypse 19 - Ma Zhiklè

¹ Te deɓaʼa i tsena nhèzlèwè mbiaʼa a ndo ntiɓishèa kumba te zhiklè, man ta gaɗa: Alléluya! Skwi mʼmbel ndo, a nʼnjèlè, a wuɗai, a Zhiklè nga!

² Aman kita nengaʼa amba zuraʼa, aman a ga na kita a gèɗ a ngwoz mphömè mbiaʼa, man a gedassa herkeda a mphömè nengaʼa, a pil ɓèlèlihi nengaʼa man a bazlaʼa, a ri na.

³ A ta gaɗa zaʼa: Alléluya! A vodzok nengaʼa a dè a géɗèʼa a mèdèp.

⁴ A ndohi nhalaʼa 24, a skwihi faɗ a nshèffè, ta kalahi a deɓ sak nengaʼa, a ta tsu ri a Zhiklè, man a nza a géɗ sam nʼnzi bai, a ta gaɗa: Amen, Alléluya!

⁵ A ngèɗè ngiɗè a ntsena a sam nʼnzi bai: Vo-slubordo Zhiklè nga, kinè ɓèlèlihi nengaʼa tèlèba, man kin gi zlaua; cèw ba, ndohi nkèshèʼa a ndohi mbibihiaʼa ba!

Skwi nʼndi ngolala kra tambak

⁶ A i tsena ara ngèɗè ndo ntiɓishèa mbiaʼa, ara kuɗ iyam mbiaʼa, ara ntsi iyam mbiaʼa, man a gaɗa: Alléluya! Bi Zhiklè nga, Bi wuɗi tèlèba, a gi bi ma.

⁷ Ngo-wuffokoya, ngo-gokoy langlangaʼa, ngo-slubordokoy nengaʼa, aman ngolala kra tambak a gi ma, medemi nengaʼa ntila ma!

⁸ A ta va na maslaka bata mbelaʼa nslekaɗaʼa, aman a mvi a va. Maslaka bata mbelaʼa sa, mizlinè nzuraʼa man ndohi Zhiklè ta gau.

⁹ A ngaɗayè: Windo! Mwuffè a sam ndohi man ta baha ta a sam skwi nʼndi ngolala kra tambak. A nengaʼa a ngaɗayè: Nasa ma Zhiklè a gèɗagèɗ.

¹⁰ A i kalahi a deɓ sak nengaʼa, aman i tsi ri a nengaʼa. A ngaɗayè: Az arsa ɓai! I ba i ɓèlè ara man a ngaya, ara kramamhi ngaya, man ta gi malwuɗi a géɗ Yèsu. Tsu ri a Zhiklè! Ndohi nhadka ma ta hadka ma malwuɗi Yèsu.

Ndo man a deɓ plèsh nslekaɗaʼa

¹¹ A i rka zhiklè mwinèa: na haha, plèsh nslekaɗaʼa. Nzlembaɗ ndo plèsh: ‘nlèɓèslèʼa a nzuraʼa’, man a gi kita, a gi var te ngi-zuraʼa.

¹² Di nengaʼa a vècè ara nèʼèn vogwa, gèɗ nengaʼa mpaɗaʼa a mpèɗè gèɗ kumba; nzlembaɗ man mwindèʼa a gèɗ nengaʼa, ndo a sun ɓai, sèi nengaʼa staɗgenè.

¹³ Maslaka a va, nruɓa a Pombaz. Ta baha na a nzlembaɗ ‘Ma Zhiklè’.

¹⁴ A ndohi var te zhiklè a deɓ plèshihi nslekaɗaʼa ta dzodzor te deɓa, a maslaka bata nslekaɗaʼa kuɗkuɗèa a va.

¹⁵ Kafahi gwèsh wètwè-tèʼa a shkè auda te ma na, man a bazl ta ndohi herkeda, a da war ta a gada züdo, a nkèlè skwi te klok nʼndha a skwi nsi ndzoan Bi Zhiklè mbiaʼa, a Zhiklè wuɗi tèlèba.

¹⁶ Nzlembaɗ ngiɗè mwindèa a maslaka na, a tataya nengaʼa: Bai a géɗ bihai, mbiaʼa a géɗ mbibihiaʼa.

¹⁷ A i rka gol Zhiklè nzlatsa te pats, a mboho a wuɗai, a ngaɗa ta ɗiakihai tèlèba tʼhwaɗ giɗfèk: Vo-washkè, va-ɓücko va a sam skwi nʼndi mbiaʼa man a Zhiklè,

¹⁸ a kin ndi zluèɗ bihai, a zluèɗ bi sojèhai, a zluèɗ ndohi wuɗai, a zluèɗ plèshihai a ndohi man ta nza a pa, a zluèɗ ndohi ngwai a ɓèlèlihai, ndohi nkèshèʼa a ndohi mbibihiaʼa.

¹⁹ A i rka skwi dak a nda bihi a géɗ herkeda, a nda ndohi var ta ɓicaʼa, aman ta gi var a ndo man a deɓ plèsh a ndohi var nengaʼa.

²⁰ A ta gso skwi dak a nda ndo nhadka ncèkèlma man a gu nrkedi a sam di na, man a pe ta ndohi man lamba skwi dak a va, a wai, aman ta tsi ri a skwi man ta roma ara skwi dak. A ta wushede ta cèw ba a vèvèɗ vogwa, man skwi nvècè vogwa te pa, a di tʼuda.

²¹ A ta bazl ta njèkèdi ndohai a kafahi gwèsh, man a shkè auda te ma ndo man a deɓ plèsh. A ɗiakihi tèlèba ta ngeza va a zluèɗ tengaʼa.