Apocalypse 18 - Ma Zhiklè

Babylone mʼmbeɗ na

¹ Te deɓ nasa i rka gol Zhiklè ngiɗè man a shkèhai te zhiklè, man a ngots wuɗi mbiaʼa. Sam herkeda nhela a nʼnjèl nengaʼa.

² A mboho a wuɗai, a ngaɗa: Mʼmbeɗ na, mʼmbeɗ na, Babylone, kokwar mbiaʼa. A nʼnde na a gi madzagihai, a gi dangi mèzhèɓhi ambaɓih-iaʼa tèlèba, a sam nʼnzi ɗiakihi ambaɓihiaʼa, tèlèba man ndo a woya ɓai.

³ Aman ndohi herkeda tèlèba ta sau skwi mphömè nengaʼa, a bihi herkeda ta gu mphömè a nengaʼa, a ndohi gani tʼherkeda ta gu a ndohi mèshèlè te nwèl va nengaʼa.

⁴ A i tsena ngèɗè ngiɗè te zhiklè man a gaɗa: Vo-do kinè auda a sam na, ndohi ga, man ɓai kin humdè a mali nengaʼa, a kin si matakwan a nda nengaʼa.

⁵ Aman mali nengaʼa nʼndika a zhiklè, a Bi Zhiklè a hér mphömè nengaʼa.

⁶ Va-ga na, ara man a ga kinè. Skwi man a ga kinè, va-ga na ta ta man a nengaʼa cèw. A kokwi man a hala kinè a vna, va-ɓala na a nengaʼa te pa cèw.

⁷ Te di nʼnjèl va na, a nwèl va na, va-ga na matakwan a nlèyè!

⁸ Aman nengaʼa a gèɗè te ndav na: I nzi a haha, i ngwoz bai, ngwoz mazi ka ɓai, i da shin nlèyè azɓi fèt!

⁹ Gar haha matakwan nengaʼa a shkè pats staɗ, a mʼmetsai, a nlèyè, a mai, a ta da gedassedaussa a vogwa. Aman Zhi-klè, Bi wuɗai, a gi kita na. A bihi herkeda man ta gu mphömè a mali a vna, ta da kuɗiaʼa, a ta lèyèʼa, aman ta rka vodzok vogwa man ta pinda ma.

¹⁰ A ta da zlècè dra, a zlau matakwan nengaʼa, a ta gaɗa: Wobau, wobau a géɗ kokwar mbiaʼa. Kita ngaya a mshkè a pats staɗ!

¹¹ A ndohi ganai a géɗ herkeda ta da kuɗiaʼa, a ta lèyèʼa, aman ndo ngiɗè a woya a nshum skwi tengaʼa ɓai.

¹² Guro a verzhègenè, kwa mbelahiaʼa, a skwi ngiɗè ara jimkaya, a maslaka bata mbelda, a vèvèzh, maslaka man gani a pa kumba, maslaka ntevaʼa, a wof tsaɗ tsaɗ man a zhkè amba, a zlèʼèn fakawai, a skwi tsaɗ tsaɗ man ta gu a wof a züdo guro, a züdo, a kwa mvècèʼa,

¹³ a masara, a mbar, a tsna, a skwi man a zhkè ara burdi, a barassa, a mbar-va, a gufa nkerɗa dernènèʼa, a dau, a skwi gai, a tambakihai, a plèshihai, a kikihai, a ɓèlèlihai, a ndohai.

¹⁴ Skwi man ambaha ka a ndav ngaya, klèng. Skwi tèlèba man nterkaslaʼa, a si dai, ngedassa ma, a ka da ngècè te deɓaʼa asaɓai a mèdèp.

¹⁵ Ndohi gani sa, man ta ngots skwi mèshèlè te Babylone, ta da zlècè dra, te ri zlau matakwan tengaʼa, ta kuɗai, a ta gaɗa:

¹⁶ Wobau, wobau, ka kokwar mbiaʼa, man halaʼa a maslaka bata mbelaʼa a va, nduzoa, a vèvèzh, mbè te pa a guro a kwa mbelaʼa a skwi ngiɗè ara jimkaya.

¹⁷ A pats staɗ mèshèlè mbiaʼa aranta ngedas na ma! A ndohi wurom, a ndohi nhèd wurom, a ndohi mpèr skwi a géɗ iyam mbiaʼa, a ndohi man ta gu gani arsa, ta zlatsa dra, a ta boho a wuɗai,

¹⁸ aman ta rka vodzok vogwa nengaʼa, a ta gaɗa: Daga zlèzlèa, kokwar mbiaʼa ngar ka a zhi ɗè?

¹⁹ A ta peda hutsoɗ a gèɗ, a ta boho a ta kuɗiaʼa, a ta lèyèʼa, a ta gaɗa: Wobau, wobau, ka kokwar mbiaʼa; a sam ngaya ndohi tèlèba, a wurom a géɗ iyam, ta ndaʼa a ndohi mèshèlè te nwèl va ngaya, a pats staɗ ngedas na ma!

²⁰ Giɗfèk, wuffa a géɗ nengaʼa! Va-wuffa, kinè ndohi Zhiklè a ndohi sak a ndohi nhadka ma! Aman Zhiklè a nʼnga na kita a gèɗ, a géɗ kinè!

²¹ A gol Zhiklè, man wuɗi na zhè, a mco kwa mbiaʼa staɗ ara vova, a nkalda a va woyam mbiaʼa, a ngaɗa: Aranta ta gedassa Babylone, kokwar mbiaʼa, ara man a gi wuɗwuɗaʼa a géɗ iyam, a ta rka te deɓaʼa asaɓai.

²² A ta da cinè ndohi ganzavar a ndohi dimèsh a ndohi shinglèk a ndohi ntsi tolom a sam ngaya asaɓai. A ndo man a gi mizline mèmè ta ngècè a sam ngaya te deɓaʼa asaɓai; nhèzlèwè vova ta cinè a sam ngaya asaɓai,

²³ vogwa pitirla a da hél sam kokwar ngaya asaɓai, ntsima dalahai ta cinè a sam ngaya asaɓai. Halaʼa ndohi gani ngaya ta bihi a géɗ herkeda, a ka pe ta ndohi herkeda tèlèba a wai a mʼmbèh skwi ngaya,

²⁴ a ta ngots Pombaz ndohi nhadka ma a ndohi Zhiklè, a ndohi tèlèba man ta bazl ta a géɗ herkeda, a sam ngaya.