Apocalypse 17 - Ma Zhiklè

Kita ngwoz mphömè mbiaʼa

¹ Staɗ te va golahi Zhiklè tsaraɗ, man kokwi tsaraɗ te ri ta, a mshke, a ngaɗayè: Washkè, i woy a i ngra ka kita a géɗ ngwoz mphömè mbiaʼa, man a nzi a géɗ Woyamhi kumba,

² man bihi herkeda ta gu mphömè a vna. Mphömè man ta gu a vna a nkeɗ ta ara zom.

³ A ndiyè a hèshèkèɗ te Mèzhèɓ. A i rka ngwoz nʼnza a deɓ skwi dak, ngi na ara vèvèzh, a nzlembaɗ nderɗe Zhiklè kumba, a gèɗhi tsaraɗ a dromhi kula.

⁴ Ngwoz a maslaka nduzoa a vèvèzh a va, mbè te pa a guro a kwahi mbelaʼa, a skwi ngiɗè ara jimkaya, a kokwi guro te rai, nʼndha a skwi man a ndèrè ndo, a skwi nlizhèʼa a mphömè na.

⁵ A medi nengaʼa mwindèʼa nzlembaɗ ngiɗè, man ndo a sun verzia ɓai: Babylone mbiaʼa, mam mphömè, mam skwi tèlèba man a ndèrè ndo a géɗ herkeda.

⁶ A i rka ngwoz Pombaz ndohi nkezlaʼa a Pombaz ndohi malwuɗi Yèsu a nkeɗaʼa ara zom. A i rzl ga kumba, aman i rka ngwoz sa.

⁷ A gol Zhiklè a ngaɗayè: Ka rzl ngaya èhèmè? I war a i ngra ka skwi nʼnghedaʼa te ngwoz haha, a skwi dak man a zhüɓaʼa, man gèɗhi tsaraɗ a dromhi kula.

⁸ Skwi dak man ka rkaʼa, a zhè a matsa, ani asaɓai, a da skè auda zaʼa te vèvèɗ mpèltemtemaʼa, a da hi na a sam ngedassaʼa, a ndohi a géɗ herkeda ta da rzl ta, ndohi man nzlembaɗ ta mwindèa te ɗèlèwèr nshèffè ɓai, daga nhinkaɗ herkeda, aman ta rka skwi dak ara man a nza, antanta asaɓai, a da zhè zaʼa.

⁹ Na haha skwi man ndohi, man maya ta zhè, ta hérèʼa. Gèɗhi tsaraɗ nara zahi tsaraɗ, a géɗ tengaʼa ngwoz a nʼnza a pa. Ta ara bihi tsaraɗ ba.

¹⁰ Zlam ta goko bi ma, staɗ a zhè, ngiɗè a mshkè di ɓai. Man nskè ma, a nzi kèshkata genè.

¹¹ A skwi dak man a nza, man antanta asaɓai, nengaʼa bi matsamakaɗaʼa, man a shkè auda te va ntsaraɗa sa, aman a dè na a sam ngédèshè.

¹² Dromhi kula, man ka rkaʼa, nara bihi kula, man ta ngatsa kokwarbihi tengaʼa di ɓai, aman ta ngècè wuɗibai ara bihai, a nda skwi dak, nshèk va kèshkata.

¹³ Ta mba ma ta, ta va na wuɗi-bi ta a nʼnjèl bi ta a skwi dak.

¹⁴ Ta da gi wuɗi a kra tambak, a kra tambak a da gi a ngul ta, aman nengaʼa mbiaʼa a géɗ mbibihiaʼa, bai a géɗ bihai, a ndohi man ta dzodzora, man Zhiklè a baha ta, a mpar ta mpèrè, a ta lèɓèslè, ta mbi a ngi a ngula a nda nengaʼa.

¹⁵ A nengaʼa a ngaɗayè: Iyam man ka rkaʼa, a sam man ngwoz mphömè a nza a pa, nara ndohi herkeda, nhèyè ndohi herkeda, a ndohi verzi tsaɗ tsaɗ, a ndohi man daʼai ta tsaɗ tsaɗ.

¹⁶ Dromhi kula man ka rkaʼa, a skwi dak, ta da gi shèwa a ngwoz mphömè, a ta da jèkeda a pa a gèɗ na, a ta ndi zluèɗ va nengaʼa, a ta fa na vogwa a njèkèɗiaʼa.

¹⁷ Aman Zhiklè a ngra ta te ndav ta arsa, a ta rufa skwi man a huro, ara man a woya a ngiaʼa, a ta vi wuɗi-bi tengaʼa a skwi dak ha ma Zhiklè tèlèba nʼndika ma.

¹⁸ A ngwoz man ka rkaʼa, nengaʼa kokwar mbiaʼa, man a gi bai a géɗ bihi a géɗ herkeda.