Apocalypse 16 - Ma Zhiklè

Kokwi ndzoan Zhiklè

¹ A i tsena ngèɗè ngiɗè mbiaʼa te gi Zhiklè, man a gaɗa ta golahi Zhiklè ntsaraɗa sa: Vo-do, va-bada kokwihi tsaraɗ a ndzoan Zhiklè te pa a géɗ herkeda!

² A nshèlèkuraʼa a mdo, a, mbada kokwi na a géɗ herkeda, a mblè ambaɓiaʼa ara gurdzo a nkala ta a va ndohi man di mbazla a lamba skwi dak, a ta tsi ri a skwi man ta gu ara va nengaʼa.

³ A gol Zhiklè macecèwaʼa a mbada kokwi na a woyam mbiaʼa, a iyam a nʼngwode na a pombaz, ara pombaz ndo man ta keɗaʼa. A skwi man a nshèffe te woyam mbiaʼa tèlèba ta bazl ta.

⁴ A gol Zhiklè mamakaraʼa a mbada kokwi na a woyamhai a nlèlè iyamhai, a ta ngwode ta a pombaz.

⁵ A i tsena gol Zhiklè man a nzlatsa a ma iyam, man a gaɗa: Ka nzuraʼa, ka man ka zhè, ka zhè zlèzlèa, ka Zhiklè nkezlaʼa, man ka gu kita aranta:

⁶ Tengaʼa sa a mbada Pombaz ndohi nhadka ma; a ka, ka va ta Pombaz aman a ta siaʼa. Amba aman ta ngotso arsa.

⁷ A i tsena sam mvi skwi a Zhiklè man a bèhè: A vava, Bi Zhiklè, Zhiklè wuɗi tèlèba, kita ngaya amba zuraʼa.

⁸ A gol Zhiklè mafaɗaʼa a mbada kokwi na a va pats. A pats a nʼngots wuɗai, aman vogwa nengaʼa a ndar ta ndohi a ma,

⁹ a ndar ta a vata. A ndohi ta durɗo nzlembaɗ Zhiklè, man a ngots wuɗai a géɗ matakwan haha; aman ta ngwode ndav ta ɓai, a ta slebarda nengaʼa ɓai.

¹⁰ A gol Zhiklè mazlamaʼa a mbada kokwi na a géɗ sam nʼnzi bi skwi dak. A kokwar-bi nengaʼa a nʼnde na a ruva, a ta jè nèʼèn ta te skwi ndza ta,

¹¹ a ta durɗo nzlembaɗ Zhiklè, a géɗ skwi man a dza ta, a géɗ mblè tengaʼa. Aman ta ngwode ndav ɓai a géɗ skwi man ta gau.

¹² A gol Zhiklè mamokwaʼa a mbada kokwi na a géɗ Euphrate, woyam mbiaʼa. A iyam nengaʼa a nshe na, aman civèɗ ntila, man a bihi te man a mvèng pats.

¹³ A i rka mèzhèɓhi ambaɓihiaʼa makar, ta ara kudofihai, a ta shkè auda te ma skwi man nara kedam, te ma skwi dak ngiɗè, te ma ndo nhadka ncèkèlma.

¹⁴ Mèzhèɓhi sa, madzagihai, a ta gi nrkedai. A ta de ta a sam bihi herkeda tèlèba, aman ta ɓic ta, a pats var mbiaʼa man a Bi Zhiklè, Zhiklè wuɗi tèlèba.

¹⁵ Na haha i shkè ara ndo metsar. Mwuffè a sam nengaʼa man a nzi a dai, a maslaka a va, man a dè adi azɓai, a ta rka hori nengaʼa man adi azɓai.

¹⁶ A ta ɓic ta a sam staɗ, man ta baha na a ma Hébreu Harmaguèdon.

¹⁷ A gol Zhiklè matsaraɗaʼa a mbada kokwi na a giɗfèk, a ngèɗè mbiaʼa a mshkè auda te gi Zhiklè, a sam nʼnzi bai, man a gaɗa: Nʼnga ma!

¹⁸ A iyam a nʼndi dai, a iyam a ntsai, a herkeda a ngudzai a vata, daga man ndo a zhè tʼherkeda ngudzu arsa ɓai.

¹⁹ A kokwar mbiaʼa, nkezla na te va makar; a kokwarhi mbibihiaʼa tʼherkeda ta mbeɗ ta. A Bi Zhiklè a nhur Babylone, kokwar mbiaʼa, a mva na kokwai, nʼndha a ndzoan Zhiklè, man a gi ndav worworaʼa, aman a nsiaʼa.

²⁰ A herkedahi te ndev iyam ta ze ta. A za ba, ta rka te deɓaʼa asaɓai.

²¹ A vandzal mbiaʼa tar vova a nkalkaɗahai te zhiklè a géɗ ndohai. A ndohai ta durɗo Zhiklè a géɗ matakwan vandzal, aman matakwan nengaʼa mbiaʼa a vata.