Apocalypse 15 - Ma Zhiklè

Nʼndikè ma matakwan

¹ A i rka skwi ngiɗè man nʼngrédè auda a giɗfèk, mbiaʼa nara nrkedai. Golahi Zhiklè tsaraɗ ta ngots matakwan tsaraɗ, nasa matakwan a ndikedè ndzoan Zhiklè.

² A i rka nara woyam mbiaʼa man a si dai, ndzakaɓaʼa a vogwa. Tengaʼa man ta gu a ngul skwi dak, a skwi man ta gu ara va nengaʼa, a nʼngér nzlembaɗ nengaʼa, ta zlatsa a ma woyam mbiaʼa man a si dai, a ganzavar Zhiklè te rai,

³ a ta slu dimèsh Moise, ɓèl Zhiklè, a dimèsh kra tambak, a ta gaɗa: Skwi man ka gau, skwi mbiaʼa, skwi nrkedai, Bi Zhiklè, Bi wuɗi tèlèba! Civèɗ ngaya nzuraʼa a vava, ka Bi ndohi herkeda.

⁴ Ndo man a gi zlau ngaya azɓi wa, Bi Zhiklè. Ndo man a slébèrdè nzlembaɗ ngaya azɓi wa? Aman ka staɗ, ka kezla! A vava ndohi herkeda tèlèba ta da shkè, a ta tsi ri a sam ngaya, aman kita ngaya nzuraʼa nʼngreda auda ma.

⁵ Te deɓaʼa i rka: ta winè gi Zhiklè, gi nkezlaʼa te zhiklè,

⁶ a golahi Zhiklè tsaraɗ ta shkè auda te gi Zhiklè, tengaʼa man ta ngots matakwan tsaraɗ, a maslaka bata nslekaɗaʼa a va, nslekaɗaʼa kuɗè-kuɗèa, guro mʼmana te ndav.

⁷ Staɗ te va skwihi faɗ a nshèffe a mva ta kokwihi tsaraɗ a ri a golahi tsaraɗ, nʼndha a ndzoan Zhiklè man a nzi a nshèffe te nhinkaɗ na a mèdèp.

⁸ A gi Zhiklè nʼndha a vodzok nʼnjèl Zhiklè a wuɗi na, ndo a slaha a ndè a gi Zhiklè azɓai, ha ta ndeva mizlinè matakwan golahi tsaraɗ.