Apocalypse 14 - Ma Zhiklè

Dimesh ndohi 144.000

¹ A i rka kra tambak nzlatsa a géɗ za Sion, a nda ndohi 144.000, nzlembaɗ nengaʼa, a nzlembaɗ Bab na, mwindèʼa a medi tengaʼa.

² A i tsena, ngèɗè te zhiklè, ara kuɗ iyam mbiaʼa, ara ntsi iyam mbiaʼa. Ngèɗè man i tsenaʼa, nara ndohi ntsi ganzavar.

³ A ta slu dimèsh mɓuaʼa a sam nʼnzi bai, a sam skwihi faɗ a nshèffè, a sam ndohi nhalaʼa, ndo ngiɗè a slaha a nslebi dimèsh ɓai, sèi ndohi 144.000 man ta sumka ta a deɓa tʼherkeda.

⁴ Nasa ndohi man ta lizha va ta a ngwozi ɓai, a ta ɓür va ta, ta sossur ɓai, a ta dè a verzi kra tambak a sam tèlè man a dè a pa. Ndohi haha ta sumka ta a deɓa te va ndohai, a tsuvomhi Zhiklè, a tsuvomhi kra tambak.

⁵ Te ma tengaʼa ncèkèlma azɓai, mali az a gèɗ tengaʼa ɓai.

Njè-ma golahi Zhiklè makar

⁶ A i rka gol Zhiklè ngiɗè, man a hi ara ɗiak te ndev giɗfèk, a nʼngots ma mbelaʼa man a nzi a mèdèp, man a njè ta ndohi a géɗ herkeda tsaɗ tsaɗ tèlèba, a verzi ndohi herkeda, a ndohi a daʼai ta tsaɗ tsaɗ, man ndo genè,

⁷ a ngoɗ a ngèɗè mbiaʼa: Va-gu zlau Zhiklè, va-nzala nengaʼa! Aman pats kita nengaʼa mshkè ma. Va-tsu ri a nengaʼa man a gu giɗfèk a herkeda a iyam mbiaʼa a nlèlè iyam.

⁸ A gol Zhiklè macecèwaʼa a ndzudzorko te deɓa, a ngaɗa: Babylone, kokwar mbiaʼa, mʼmbeɗ na; aman nengaʼa a ngu aman ndohi herkeda tèlèba ta sau skwi nsi ndzoan a mphömè nengaʼa.

⁹ A gol Zhiklè mamakaraʼa a ndzudzorko te deɓa, a ngoɗ a ngèɗè mbiaʼa: Ndo man a tsi ri a skwi dak, a skwi man ta gu ara nengaʼa, a nkala rai, a mbazla medi a lamba nengaʼa,

¹⁰ sèi a si kokwi ndzoan Zhiklè a géɗagèɗ; a ta da ga na matakwan a vogwa man skwi nvècè vogwa te pa, a sam di golahi Zhiklè nkezlaʼa, a sam di kra tambak.

¹¹ A vodzok matakwan tengaʼa a dè a géɗèʼa a ma ma a mèdèp, a tengahi man ta tsi ri a skwi dak a skwi man ta gu ara nengaʼa, a ndohi a lamba nzlemba na a va, ta ngècè nshèk va azɓai, ko a pats ba ko a vaɗ ba.

¹² Na haha ndohi Zhiklè man ta zhèr skwia dai! Na haha tengahi man ta ɓür ma nkwèr Zhiklè, a ncè Yèsu a ndav.

¹³ A i tsena ngèɗè te zhiklè, man a gaɗayè: Windo! Mwuffè a sam ndohi man ta mets ta te Kristi. Mèzhèɓ Zhiklè a gaɗa: Ani haha ta shèk va te mizlinè tengaʼa. Aman skwi man ta gau, a dzadzar ta te deɓa.

Mɓicè skwai a géɗ herkeda

¹⁴ A i rka vani nslekaɗaʼa. Ndo nʼnza a géɗ vanai, nara kra ndo, gèɗ mpaɗaʼa a guro, gwodza wètwètèʼa te rai.

¹⁵ A gol Zhiklè ngiɗè a mshkè auda te gi Zhiklè, a mbaha na ndo man a géɗ vanai a ngèɗè mbiaʼa: Sèi ka tsiaʼa a gwodza ngaya, a ka ɓicè skwai! Aman pats mɓicè skwi a zhè ma, a skwi a géɗ herkeda nsla ma.

¹⁶ Ndo a géɗ vanai a nkalde gwodza a herkeda, a ta ɓicè skwi herkeda.

¹⁷ A gol Zhiklè ngiɗè a mshkè auda te gi Bi Zhiklè te zhiklè, nengaʼa ba a gwodza wètwètèa te rai.

¹⁸ A gol Zhiklè ngiɗè, man a ngots wuɗai a géɗ vogwa, a mshkè auda a sam mvi skwi a Zhiklè, a mbaha na nengaʼa man gwodza te rai a ngèɗè mbiaʼa: Tsau a gwodza ngaya nwèt-wètèa, zlau nyi barassa tʼherkeda! Aman nyi wofaʼa nʼndha ma.

¹⁹ A gol Zhiklè a ntsau herkeda a gwodza nengaʼa, a nzlu nyi barassa a géɗ herkeda, a nwusheda a klok ndzoan Zhiklè.

²⁰ Klok tʼuda a dal kokwar, a ta kèlèʼa tʼuda, ha Pombaz te klok a mbèdè bambasl-mbaslaʼa, a ndikè na ma a dzala plèsh, a hi dra ara km 300.