Apocalypse 13 - Ma Zhiklè

¹ A i rka skwi dak ngiɗè man a shkè auda te va iyam mbiaʼa, a drom kula te gèɗ; a géɗ dromhi na skwi mpèɗè gèɗ kula; a géɗ gèɗhi nengaʼa staɗ staɗ, nzlembaɗ ndérɗè Zhiklè a pa.

² A skwi dak man i rkaʼa nara kokoya, sak na ara nvalaval, ma na ara ma marzihèlè. A skwi man nara kedam a mva na wuɗi na, a sam nʼnzi bi na, a wuɗi-bi na mbiaʼa.

³ A i rka te va gèɗhi na, staɗ, ara mblè mʼmetsi a pa; aman mblè mʼmetsi a mpkwe na.

⁴ A herkeda tèlèba a rzle na a géɗ skwi dak sa, a ta tsi ri a skwi man nara kedam, te man a mva na wuɗi-bai a skwi dak; a ta slubordo skwi dak ba, a ta gaɗa: Nlèmdè va a skwi dak wa, nslaha a ngi var a nengaʼa wa?

⁵ A ta va na ma, aman a gèɗè skwi mbiaʼa, a ndérɗè Zhiklè, a ta va na wuɗi-bai, aman a gi bi ki 42.

⁶ A nengaʼa a mwina ma, a ndurɗo Zhiklè, a nzlembaɗ nengaʼa, a gi nengaʼa, a ndohi nenga nte pa.

⁷ A ta va na wuɗi-bai, aman a gi var a shèwa a ndohi Zhiklè, aman a gi a ngul ta. A ta va na wuɗai a géɗ verzi ndohi tèlèba, a ndohi kokwar, a ndohi a daʼai ta tsaɗ tsaɗ, a ndohi herkeda tèlèba.

⁸ A ndohi tèlèba a géɗ herkeda ta da tsi ri a nengaʼa. Tengaʼa man nzlembaɗ tengaʼa mwindèʼa te ɗèlèwèr nshèffè kra tambak, man ta zlama na daʼai, daga nhinkaɗ herkeda ma, ta tsi ri a nengaʼa azɓai.

⁹ Ndo man zlembaɗ na a zhè, da tsenaʼa!

¹⁰ Ndo man a pe ta ndohi ngiɗè a dangai, a dè a gi dangai lèmèlèmè. Ndo man a keɗa ndo a kafahi gwèsh, ta da kéɗèʼa a kafahi gwèsh lèmèlèmè. Na haha, nzhèr skwia dai a ncè-a-ndav ndohi Zhiklè!

¹¹ A i rka skwi dak man a shkè auda tʼherkeda, a dromhi cèw lèmèlèmè ara kra tambak, a goɗ ngèɗè ara skwi man nara kedam.

¹² A gi wuɗi tèlèba lèmèlèmè ara skwi dak nshèlèkuraʼa, man mblè mʼmetsi nengaʼa mpkwe na.

¹³ A nʼngreda skwi mbiaʼa tsaɗ tsaɗ, a gi aman vogwa a kalkaɗahai te zhiklè a géɗ herkeda, a sam di ndohai.

¹⁴ A mpe ta ndohi a géɗ herkeda a wai a skwi man a slaha a ngrédè tsaɗ tsaɗ a sam di skwi dak. A ngaɗa ta ndohi a géɗ herkeda, aman ta gi mèzhèɓ skwi dak, a mblè kafahi gwèsh a va, man a mbel na zaʼa.

¹⁵ A ta gu aman mèzhèɓ skwi dak a shèffè, a slaha a ngèɗè, a ngi aman ta bazl ta ndohi tèlèba man ta tsi ri a mèzhèɓ skwi dak azɓai.

¹⁶ A gi aman ndohi tèlèba, ndohi nkèshèa a ndohi mbibihiaʼa, ndohi mèshèlè a ndohi ntawassaʼa, ndohi ngwai a ɓèlèlihai, ta kèl ri mandai, a ta bèzl medai.

¹⁷ Ndo a slaha a ngi gani azɓai, ko nshum skwai, ko mprè skwai, man lamba skwi dak az a va ɓai, gar ngrè-lamba na, gar nzlembaɗ na.

¹⁸ Na haha verziaʼa: ko wawa man maya na zhè, da ngum nʼngér-lamba skwi dak sa, aman nengaʼa nzlembaɗ ndo, nʼngér nengaʼa ara 666.