Apocalypse 12 - Ma Zhiklè

Ngwoz a skwi nara kedam

¹ A skwi mbiaʼa a nʼngreda auda te giɗfèk: ngwoz, pats a va, kia tʼhwaɗ sak na, gèɗ mpaɗaʼa a bantihi 12.

² Ngwoz, na hwaɗ, a kuɗai, a ɗish va, man a yi kra a matakwan a va.

³ A skwi ngiɗè nʼngreda auda te giɗfèk: Skwi ngiɗè mbiaʼa ara kedam nteva, a gèɗhi tsaraɗ, a dromhi 10; a géɗ gèɗhi skwi mpèɗè gèɗ tsaraɗ.

⁴ Hutor na a mpatseda bantihi te zhiklè, man ta kezla makar aussa, a nwushede ta a hai a herkeda. A skwi man nara kedam matsa a nzlatsa a sam ngwoz man a ɗish va, a woya a ndeda kra man a da yiaʼa a ma.

⁵ A ngwoz a nyu kra nguraʼa, man a di a war ta ndohi herkeda tèlèba a gada züdo. Aman ta ceda kra nengaʼa a zhiklè a sam Bi Zhiklè, a sam nʼnzi bi nengaʼa.

⁶ A ngwoz a mhu na a sam ngiɗè, man Zhiklè a ntila na, aman te pa ta va na skwi nʼndi mʼmèn 1.260.

⁷ A ta hüno mbèzl va te zhiklè: Michel a golahi nengaʼa ta bozl va a nda skwi man nara kedam matsa. A skwi man nara kedam a golahi nengaʼa ta bozl va a Michel.

⁸ Aman ta slaha ta gi a ngula ɓai, a ta ngatsa sam nʼnzi te zhiklè te deɓaʼa asaɓai.

⁹ A ta kalda skwi man nara kedam matsa aussa, zhüzhok nzlèzlèa, man nzlembaɗ na madzagai a Sadan, man a peda herkeda tèlèba a wai. Ta kalda a herkeda a nda golahi nengaʼa.

¹⁰ A i tsena ngèɗè ngiɗè mbiaʼa man a gaɗa te zhiklè: Antanta skwi mʼmbel ndo a wuɗai a kokwar-bai a Zhiklè nga a zhè, a wuɗi-bai a sam Kristi nengaʼa, a géɗ man ta kalda ndo mpin ta kramamhi nga, man a pin ta a pats a vaɗ a sam Zhiklè nga.

¹¹ A ta gaʼa a ngulaʼa a Pombaz kra tambak, a ma malwuɗi tengaʼa, a ta woy a ta ɓir nshèffe ta azɓai, ha ta bazl ta.

¹² Gar haha va-wuffa, giɗfèkihai, a kinè man kin te pa! Aman wobau a géɗ herkeda, a géɗ iyam mbiaʼa! Aman bi madzagai a shkèhai a sam kinè, a gi shèwa mbiaʼa, a suna, njèkè patshi nengaʼa kèshkata mènè.

¹³ Aman skwi man nara kedam a rka ta kaldaussa a géɗ herkeda, a ndzodzor ngwoz man a yu kra nguraʼa.

¹⁴ A ta va na kelpasl Vezi mbiaʼa cèw a ngwoz, aman a slaha a nhi na a hèshèkèɗ, a sam nʼnzi na. Te pa ta va na skwi nʼndi mvi staɗ, a mvi ngiɗè cèw a rètaʼa, dra a sam zhüzhok.

¹⁵ A zhüzhok a mbod iyam te ma, ara woyam mbiaʼa, a verzi ngwoz, a woya man iyam a nceda ngwoz a ma.

¹⁶ Aman herkeda a ntakaha ngwoz, a mwinè ma, a nseda iyam a ma, man skwi man nara kedam a bada.

¹⁷ A skwi man nara kedam a ngu ndav a géɗ ngwoz, a mdo man a gi var a ndohi verzi nengaʼa, ta tèlèba man ta dzodzor ma nkwèr Zhiklè, a ta ɓür ma malwuɗi Yèsu.

¹⁸ A mdo, a nzlatsa a dzah iyam mbiaʼa.