Apocalypse 11 - Ma Zhiklè

Ndohi malwuɗihi cèw

¹ A ta vay pandar, nara gada nlivè skwai, a ta gaɗayè: Slambaɗa, a ka lüv gi Zhiklè, sam mvi skwi a Zhiklè, a ka ngra ta tengahiaʼa man ta tsi ri te pa!

² Aman dalmagi Zhiklè jèkeda, ka lüv nenga ɓai! Aman nengaʼa ta va na a ndohi herkeda, a ta da gatseda kokwar nkezlaʼa a pa ki 42.

³ A i woy a i gi aman ndohi malwuɗihi ga cèw ta hodko ma Zhiklè mʼmèn 1.260, a maslaka sam kuɗa a va.

⁴ Ndohi ncèwa sa, tengaʼa wofhi tsna cèw a sam nfi vogwa cèw, man ta zlatsa a ma Bi Zhiklè man a kwèr herkeda.

⁵ Aman ndo a woya a nga ta matakwan, vogwa a da shkè auda te ma tengaʼa, a nde ta mayamhi tengaʼa a ma. Aman ndo a woya a nga ta matakwan, sèi ta keɗaʼa, arsa.

⁶ Tengaʼa ta ngots wuɗi-bai a ta pizlè giɗfèk, aman iyam a shkèhi azɓai, a pats man ta hodko ma. A ta ngots wuɗi-bai a géɗ iyamhi aman ta ngwèdè ta a pombaz, a ta faha matakwan tsaɗ tsaɗ a herkeda, pèc pècèk ara man ndav ta a woyaʼa.

⁷ Aman ta da ndeva malwuɗi tengaʼa ma, skwi dak man a da shkè auda te vèvèɗ mpèltemtemaʼa a da gi var a tengaʼa, a gi a ngul ta, a bazl ta.

⁸ A ta jèkeda nckondohi tengaʼa a dal kokwar mbiaʼa, man ta baha na a ma Zhiklè: Sodome a Egypte, a sam man ta gezlala Bi tengaʼa ba a pa.

⁹ Mʼmèn makar a rèta, ndohi tsaɗ tsaɗ te va ndohi kokwar, verzi ndohi tsaɗ tsaɗ, a daʼai ta tsaɗ tsaɗ, a ndohi herkeda tsaɗ tsaɗ ta da rka nckondohi tengaʼa, a ta vi civèɗ azɓai, aman ta re ta.

¹⁰ A ndohi a géɗ herkeda ta wuffè a géɗ tengaʼa, ta gi langlangaʼa, ta vi skwi mbalai a va, aman ndohi nhadka ma cèw haha ta ga ta matakwan a ndohi a géɗ herkeda tèlèba.

¹¹ Te deɓ mʼmèn makar a rèta, Zhiklè a mva ta Mèzhèɓ nshèffè a ndav tengaʼa, a ta slèmbèɗè, a zlau mbiaʼa a mbazl ta ndohi tèlèba man ta rka ta.

¹² A ta tsena ngèɗè mbiaʼa te zhiklè, man a gaɗa ta: Va-tevkaɗa haha! A to do a zhiklè te va vanai, a mayamhi tengaʼa ta rka ta.

¹³ A nasa nasa herkeda a ngudzau a vata, a kokwar mbiaʼa man ta kezla kula, mʼmbeɗ na. Ngudzi herkeda haha, ndohi gozhèm tsaraɗ ta bazl ta. Njèkèɗiaʼa ta gu zlau kworkworaʼa, a ta slubordo Zhiklè te géɗèʼa.

¹⁴ Wobau macecèwaʼa kala auda ma: Na haha, wobau mamakaraʼa a shkè tsam tsam.

Tolom matsaraɗaʼa

¹⁵ A gol Zhiklè matsaraɗaʼa a ntsu tolom: a ngèɗè mbiaʼa a ntsenka te zhiklè, man a gaɗa: Ta va na kokwar-bihi herkeda a ri a Bi Zhiklè, a Kristi nengaʼa. Nengaʼa a gi Bai a ma ma a mèdèp.

¹⁶ A ndohi nhala 24 man ta nza a géɗ sam nʼnzi bi ta a sam di Zhiklè, ta tseda medi a hai, a ta slubordo Zhiklè, a ta gaɗa:

¹⁷ Nga shid gèɗ, Bi Zhiklè, Zhiklè wuɗi tèlèba, man ka zhè, ka nza daga zlèzlèa, a géɗ man ka gi Bai a nʼnjèlè ngaya mbiaʼa.

¹⁸ Ndohi herkeda ta gu ndav. Aman ndzoan ngaya a mshkè ma. Pats kita ndohi mʼmetsaʼa, pats man ta va ta ɓèlèlihi ngaya skwi ntul ta, ndohi nhadka ma ba, a ndohi Zhiklè ba, a tengahiaʼa mar ta gu zlau nzlembaɗ ngaya, ndohi nkèshèa a ndohi mbiaʼa, mshkè ma. A ndohi man ta gedassa herkeda, ta gedas ta.

¹⁹ A ta wina gi Bi Zhiklè te zhiklè, a koti nderzlè-ma nengaʼa a rkè te gi Zhiklè, a iyam a nʼndi dai, a iyam a ntsai, a herkeda a ngudzai, a vandzal a nshkè.