Apocalypse 10 - Ma Zhiklè

Gol Zhiklè a ɗèlèwèr nkèshèa

¹ A i rka gol Zhiklè ngiɗè, man wuɗi na zhè, man a shkèhai te zhiklè, a vani a va, a kwarai a gèɗ, a medi na ara pats, a sak na ara nèʼèn vogwa,

² ɗèlèwèr nkèshèa ngiɗè te ri na, mwinèʼa. A mfeda sak ri mandi nengaʼa a géɗ iyam mbiaʼa, a sak ri gula a géɗ herkeda,

³ a mboho a wuɗai, ara marzihèlè man a kuɗai. A deɓ mbèhè nengaʼa, ntsi iyam tsaraɗ ta mbeɗka na ma a deɓa.

⁴ Aman ntsi iyam ta mbeɗka na ma a deɓa klèng ma, i woy a i windè maʼa. A i tsena ngèɗè te zhiklè, man a gaɗayè: Ma man ntsi iyam tsaraɗ ta mbeɗkaɗ a deɓa, ɓür te ndav ngaya, ngheda dai, ka Windo ɓai!

⁵ A gol Zhiklè man i rka nzlatsa a géɗ iyam mbiaʼa, a géɗ herkeda ba, a nzlatsede ri mandi nengaʼa,

⁶ a mʼmbaɗa a nzlembaɗ nengaʼa man a nzi a nshèffè te nhinkaɗ na a mèdèp, man a gau giɗfèk a skwi tèlè te pa, a herkeda a skwi tèlè te pa, a iyam mbiaʼa a skwi tèlè te pa: Anai patshi ngiɗè asaɓai;

⁷ aman ta da cinèʼa man gol Zhiklè matsaraɗaʼa a da tsi tolom, skwi man Zhiklè a ngheda, a ndikeda, ara man a njè ta ɓèlèlihi nengaʼa a ndohi nhadka ma nengaʼa.

⁸ A ngèɗè man i tsena te zhiklè, a ngaɗayè zaʼa: Do, co ɗèlèwèr nkèshèʼa mwinèʼa te ri gol Zhiklè man a zlatsa a géɗ iyam mbiaʼa, a géɗ herkeda ba.

⁹ A i do a sam gol Zhiklè, a i gaɗa na: Vay ɗèlèwèr nkèshèʼa! A nengaʼa a ngaɗayè: Co, ndau! A da dza ka tʼhwaɗ rutsutsaʼa, aman te ma a jèn ara vongwom.

¹⁰ A i co ɗèlèwèr nkèshèʼa te ri gol Zhiklè, a i ndau, a jèn te ma ara vongwom, te deɓaʼa man i ndau, a ndzay tʼhwaɗ rutsutsaʼa.

¹¹ Ta gaɗayè: Sèi ka hada ta ma zaʼa a ndohi kokwar a ndohi herkeda a ndohi a daʼai ta tsaɗ tsaɗ kumba, a bihi kumba.