Apocalypse 1 - Ma Zhiklè

Ma nʼngrédè Yèsu Kristi auda

¹ Na haha ma nʼngrédè Yèsu Kristi auda. Bi Zhiklè a mva na, da ngreda ta ɓèlèlihi nengaʼa skwi man a da gi ndul ndul. A nzlindekoɗi gol nengaʼa, man a ngra na Jean, ɓèl nengaʼa.

² A Jean a nju ma Bi Zhiklè, a ngu malwuɗi Yèsu Kristi, a skwi tèlèba man a rkaʼa.

³ Mwuffe a sam ndo man a jèngèʼa, mwuffe a sam tengaʼa man ta cinè ma man ta hodkoɗai, a ta fi gèɗ a skwi man ta windeda pa. Aman nʼndikèmaʼa ndul ndul.

Mbalai a sam mpi ndohi Zhiklè tsaraɗ

⁴ Jean a gaɗa ta mpi ndohi Zhiklè tsaraɗ te kokwar Asie: Pombai da zhè a nda kinè, a gumai te nengaʼa, man a zhè antanta, man a zhè zlèzlèa, man a di a shkè, te Mèzhèɓhi tsaraɗ ba, man ta zhè a sam nʼnzi bi nengaʼa,

⁵ te Yèsu Kristi, ndo malwuɗi nzuraʼa, tsuvomaʼa te nslambaɗkaɗauda te va ndohi mʼmetsaʼa, bai a géɗ bihi herkeda. Nengaʼa man a woy nga a ndav na, a mpreka nga auda te mali nga a Pombaz nengaʼa,

⁶ a nge nga a bihai, a ndohi mvi skwi a Zhiklè, Bab na. A nengaʼa, nʼnjèlè, a wuɗai, te nhinkaɗ na a mèdèp. Amen.

⁷ Na haha, nengaʼa a shkè te va vanai, a di staɗ staɗ tèlèba ta da rkaʼa; a ndohi ntuzo ba, a verzi ndohi herkeda tèlèba ta da gi wobau a géɗ nengaʼa. A vava, amen.

⁸ Iyè, i Alpha a Oméga, Bi Zhiklè a gaɗa, nengaʼa man a zhè antanta, man a zhè zlèzlèa, man a di a shkè, Bi wuɗai tèlèba.

Jean a rka kra-ndo te mèzhèɓ

⁹ I, Jean, kramam kinè, ndo man nga mbi a matakwan, a kokwar-bai, a nzhèr skwia dai te Yèsu a nda kinè. I nza te Patmos, herkeda nte ndev iyam, a géɗ ma Zhiklè a ma malwuɗi Yèsu.

¹⁰ A Mèzhèɓ Zhiklè a mshkè a géɗ ga a pats Bi Zhiklè, a i tsena ngèɗè mbiaʼa te deɓ ga, ara tolom,

¹¹ man a gaɗa: Skwi man ka rkaʼa, windeda ɗèlèwèr, zlinda a sam mpi ndohi Zhiklè tsaraɗ: A Ephèse, a Smyrne, a Pergame, a Thyatire, a Sardes, a Philadelphie, a Laodicée.

¹² A i pu di a deɓa, a i wèrèʼa: ngaɗkay wa? Mpi di ga a deɓa, a i rka sam nfi vogwa guro tsaraɗ;

¹³ te ndev sam nfi vogwahai, ndo staɗ, va na lèmèlèmè ara krando, sajibèr a va, guro mʼmana te ndav.

¹⁴ Gwots gèɗ na nslekaɗa kuɗè-kuɗèa ara gogumai, di nengaʼa a vècè ara nèʼèn vogwa,

¹⁵ sak nengaʼa a si di ara züdo guro wuzlwuzlaʼa, daʼai na ara kuɗ iyam mbiaʼa.

¹⁶ Nengaʼa a bantihi tsaraɗ te ri mandi na, a kafahi gwèsh ntasla wètwè-tèa, man a zli skwi te tsagi cèw, a shkè auda te ma na, medi nengaʼa a si dai ara gol pats.

¹⁷ Aman i rka ndo matsa, i kalahi a deɓ sak nengaʼa, iyè ara ndo mʼmetsa. A nengaʼa a mfay ri mandi na a gèɗ, a ngaɗayè: Ka gu zlau ɓai, iyè ndo nshèlèkuraʼa a ndo nʼndikèma skwai,

¹⁸ ndo a nshèffe. Te va nasa i mets ga, na haha anai i nzi a nshèffe a mèdèp, a skwi mwinè a skwi mpizlè mʼmetsai, a sam mʼmetsai, nte ri ga.

¹⁹ Windo skwi man ka rkaʼa, skwi man a zhè anai, a skwi man a di a shkè dai.

²⁰ Skwi nʼnghedaʼa man a bantihi tsaraɗ, man ka rka te ri mandi ga, a skwi nfi vogwa guro tsaraɗ, aranta: Bantihi tsaraɗ, nara golahi mpi ndohi Zhiklè tsaraɗ. Skwi nfi vogwa tsaraɗ, nara mpi ndohi Zhiklè tsaraɗ.