Amos 9 - Ma Zhiklè

Kita a mèdèp

¹ A i rka Bi Zhiklè a nzlatsa a géɗ sam mvi skwi a Zhiklè, a ngaɗa: Tsau sak gai, a sam man ndohi ta mbècè a pa a gudzai! Batsama ta gèɗ a vna, a njè-kèɗiaʼa i woy a i bazl ta tèlèba a tsakwal. Ko staɗ te ndev tengaʼa da mbel na ɓai! A ndo man a hi na a mbélè auda azɓai.

² Aman a ta wuc ta a gi dzavai, i ngatska ta auda genè. Aman ta tivè a zhiklè, i parka ta a hi genè.

³ Aman ta ngheda va te za Carmel, i da woy ta a i ngazlka ta. Aman ta nghédè va a hwaɗ iyam, i da gaɗa na zhüzhok te pa, aman a je ta.

⁴ Aman ta dè a ma mayamhi tengaʼa, ndzawaʼa, i hil tsakwal a i bazl ta. I pa ta di ambaɓiaʼa, a i pa ta di mbelaʼa azɓai.

⁵ Bi Zhiklè Ndo nzi pèc pècèk, Zhiklè bi mbiaʼa, a lama na herkeda, a herkeda a gudzai, a ndohi a géɗ herkeda tèlèba ta kuɗai. Nengaʼa ara woyam Nil, man a grè a grè, te deɓaʼa a shèha va na ara woyam Egypte.

⁶ Nengaʼa man a mpeda balak na a giɗfèk, a sak gi na a géɗ herkeda, nengaʼa man a baha na iyam te woyam, a hakaɗauda a géɗ herkeda, nzlembaɗ na Ndo nzi pèc pècèk!

⁷ Kinè ndohi Israel a sam ga ara ndohi Ehtiopie ka ɓi dè? Ndo nzi pèc pècèk a gada. I helka ta ndohi Israel auda te kokwar Egypte ka ɓi dè? Ndohi Philistie, te Caphtor? Ndohi Syrie, te Kir?

⁸ Na haha Bi Zhiklè a pi di a kokwar-bi man a gi malai. Ar i woya a i zede nengaʼa tʼherkeda. Aman i woya a i zede ta ndohi gi Jacob tèlè ɓai, Ndo nzi pèc pècèk a gada.

Njèkèɗi ndohi ta mbel ta

⁹ I gèɗè a wuɗai: i dambalka ta ndohi Israel te va ndohi herkeda tèlèba, ara dau man ta dèmbèlèʼa, ko tser dau nshfaʼa staɗ a da kèlèhi a herkeda azɓai.

¹⁰ Ndohi ga man ta gu malai a ta gada: skwi mwuɗitpa a da ga nga azɓai, matakwan a da ngatsa nga azɓai – a di ta da bazl ta a tsakwal.

¹¹ A pats nasa i da ɗèɗèyè gi David man mʼmbeɗ na a pa, a i ndè zlerɗi mbazlaʼa, a i cèpè sam man i ɗaɗayda a pa, a i rèmeʼa ara zlèzleʼa zaʼa.

¹² A ta ngècè njèkèɗi Edom a njèkèɗi ndohi herkeda tèlèba, man ta tsu ri a nzlembaɗ ga, a skwi nʼndi gi tengaʼa, Ndo nzi pèc pècèk a gaɗa, nengaʼa man a gi skwi haha tèlèba.

¹³ Na haha, pats a di a shkè, Ndo nzi pèc pècèk a gaɗa, a ndo mpizhè a ndo ntsi dau ta zli gèɗ; a ndo nkèl skwai a ta zli gèɗ te klok a ndo nzlekai; a barassa a da hakaɗi te za, te ngègèdhai.

¹⁴ Te deɓaʼa, i da helka ta ndohi Israel, ndohi ga, a deɓa te ɓèlè. Ta da ɗaɗaya kokwar ngedassaʼa a ta nzi a pa zaʼa, a ta gi gi wof barassa, a ta ngècè barassa ta te pa, a ta gi gi dau, a ta ngècè skwi nʼndi ta te pa.

¹⁵ I da nge ta a herkeda ta, a ta da dzam ta auda asaɓai tʼherkeda ta man i va ta, Ndo nzi pèc pècèk, Zhiklè ngaya, a gaɗa.