Amos 6 - Ma Zhiklè

Wobau a géɗ ndohi Sion

¹ Wobau a géɗ ndohi te Sion, man ta hér skwi ngidè azɓai, man ta gshè va a za Samarie, a ta nzi a géɗ za, man ta baha ta ndohi mbiaʼa te va ndohi herkeda, bihi ndohi gi Israel.

² Vo-do Calné, a kin rkaʼa! Vo-do a ma ma a Hamath, kokwar mbiaʼa. Te deɓaʼa vo-do a kokwar Gath, kokwar Philistie. Kin fena kokwar-bi te pa dè? Mba kokwar-bi kinè aman a tengaʼa ɗè?

³ Kin woy a kin herda pats matakwan a ma ma, a mvi man wuɗitpa a herdaka kinè a va ma.

⁴ Kin mana a sam mʼmènè zlèʼèn fakawai, kin tangala ntèngèlè a huba, kin par ta wud tambakihai a wud zlèhai nhudbassaʼa a ma,

⁵ kin sli dimèsh a deɓ ganzavar, kin fi dimèsh ara David,

⁶ kin si barassa, njé-naʼa te cil mbiaʼa, kin fèdè mbar mbelaʼa a va, a matakwan Joseph a lèyde kinè azɓai.

⁷ Gar haha sèi ta dè ɓèlè te va ndohi nshèlèkuraʼa; mwuffè tengaʼa man ta tangalahi ntèngèlè a ndev na.

Kita a géɗ nfi va

⁸ Bi Zhiklè Ndo nzi pèc pècèk a goɗ a mʼmbèdè. Ndo nzi pèc pècèk, Zhiklè bi mbiaʼa, a gaɗa: Nfi va Jacob ambahay ɓai, gi-bihi nengaʼa ta ndarayè. I woy a i zede kokwar a skwi tèlè te pa.

⁹ Ko njèkèɗi ndohi kula te gi staɗ, ta da bèzl ta tèlèba.

¹⁰ Ko ndo ngidè a dè a gi ndo ngidè, a nzuɓkoɗi nckondohi te gai, a ngaɗa na ndo man a nza te gi tʼhwadaʼa: Njèkèdia a zhè a sam ngaya di dè? A nengaʼa a gèɗè: Aʼai, i mbèɗè a nzlembaɗ Ndo nzi pèc pècèk azɓai!

¹¹ Ndo nzi pèc pècèk a goɗ ma bi nengaʼa: Gi mbiaʼa a da wal na.

¹² Gi nkèshèa a bèc na wècwècèʼa. Plèshi ta hi te za dè? Ta pizhè za a zlèhi dè? A kin ngwoda kita a dèrè, a ngi-zuraʼa a skwi nduzlekzlekaʼa!

¹³ Kin wuffè a géɗ skwi ambalai, a kin gada: nga ngots wuɗi a ri nga ka ɓi dè?

¹⁴ Na haha, ndohi Israel, i pra kinè ndohi herkeda ngidè a gèɗ, Ndo nzi pèc pècèk a gada. Ta da ga kinè matakwan, a civèd ndè Hamath, ha ndè a ma woyam Araba.