Amos 5 - Ma Zhiklè

Va-ngwoda ndav kinè!

¹ Kinè ndohi Israel, va-tsena ma haha man i gèɗè a géɗ kinè, ma kuda.

² Dem Israel a nkal na hai, a nslambaɗkaɗa asaɓai, ntangala tʼhai tʼherkeda, ndo nslambaɗda azɓai.

³ Bi Zhiklè Ndo nzi pèc pècèk a ngaɗa ta ndohi Israel: Kokwar man ndohi var ta shkè auda te pa 1.000, njèkèɗia te pa 100. Aman ta shkè auda te pa 100, njèkèdia te pa 10.

⁴ Ndo nzi pèc pècèk a ngaɗa ta ndohi Israel ar haha:

⁵ Va-woy iyè, a kin da nzi a nshèffè. Kin hoss Béthel ɓai! Kin do Guilgal ɓai, kin do aussa a Beer-Shéba ɓai; aman Guilgal a vava a dè dangai, a Béthel a da gedas na.

⁶ Va-woy Ndo nzi pèc pècèk, a kin da nzi a nshèffè. Man ɓai a da fa na vogwa a gi ndohi Joseph, a ndeda ma, a ndo a mbècè azɓai, ko te Béthel ba.

⁷ Kin ngwoda kita a skwi nduzlekzlekaʼa, a kin jèkeda ngi-zuraʼa.

⁸ Nengaʼa man a gi mavar prèk a ntèkocèk, man a ngwoda ruva a sam prèk, man a ngu gu pats, gu vaɗ, man a mbaha na iyam tʼwoyam a hakaɗauda a dzah, a pizlèda herkeda a pa. Nzlembaɗ na Ndo nzi pèc pècèk.

⁹ Nengaʼa a gi a ta duma gi ndo mbiaʼa, a ngedassa gi bi ba.

¹⁰ Ndo mbèzlè kita a ntamagi kokwar a gi shèwa a ndo man a gada na ma a dai; ndo man a gèɗè ma nzuraʼa, ta dérɗèʼa.

¹¹ Gar haha a géɗ man kin ga na kita a ndo ntawassaʼa a pil gèɗ a vata, a kin cèkèlè dau te ri nengaʼa: kin gu gi a kwa mpasla ma ba, aman kin da nzi a pa azɓai. Kin gi gi wof barassa mbelaʼa ma ba, aman kin tèr barassa te pa azɓai.

¹² Aman i suna, mali kinè a zhè mbiaʼa, a kin gu skwi man ambaɓi kumba. Kin gi shèwa a ndo nzuraʼa, kin co skwi man ta ruɓ kinè a vna, kin ngwoda ta kita a gèɗ a ndohi ntawassaʼa.

¹³ Gar haha ndo man maya na zhe, a pats nasa, a nzi tètè, a géɗ man pats nasa ambaɓai.

¹⁴ Va-woy skwi man amba, kin woy skwi man ambaɓi ɓai! A kin nzi a nshèf-fè, a Ndo nzi pèc pècèk Zhiklè bi mbiaʼa a da zhè a sam kinè ara man kin goɗo.

¹⁵ Va-gu shèwa a skwi man ambaɓai, va-woy skwi man amba, va-gu kita nzuraʼa a ntamagi kokwar, wa ngiɗè ba Ndo nzi pèc pècèk, Zhiklè bi mbiaʼa, a da va ta pombai a njèkèdi ndohi te gi Joseph.

Pats kita

¹⁶ Gar haha Ndo nzi pèc pècèk, Zhiklè bi mbiaʼa, Bi Zhiklè, a goɗ ar haha: A dal kokwar tèlèba ta gi wobau, a civèɗ tèlèba ta tsi lalau. Ta baha na ndo mpizhè a ndo man a sun nkudi ndo a sam kuda.

¹⁷ Te gi wof barassa tèlèba ta da gi wobau, aman i da bizhè a ndev kinè, Ndo nzi pèc pècèk a gada.

¹⁸ Wobau a géɗ tengaʼa man ta woy pats kita Ndo nzi pèc pècèk a shkè. Pats Ndo nzi pèc pècèk a takaha kinè te mè?

¹⁹ Nengaʼa ruva, skwi nhél sam ka ɓai. A da gi ara ndo man a hi na a marizhèlè, a ta zli gèɗ a kokoya. Aman a ndo a gai, a ngu va a dergai, a zhüzhok a njo.

²⁰ Pats Ndo nzi pèc pècèk, ruva, skwi nhél sam ka ɓai, mʼmadza, di a rkè a pa azɓai.

Zhiklè a woy skwi Israel ɓai

²¹ Ngolala kinè ambahayè bai, a nda-rayè. I wuffè a géɗ mɓicè-va kinè azɓai.

²² Aman kin ndaray skwai, i wuffè a géɗ skwi man kin vayè azɓai. A i pi di a mari man kin zlayè a nshid gèɗ azɓai.

²³ Kazlay auda a tsagai a dimèsh ngaya! I woy a i tsena ganzavar ngaya ɓai!

²⁴ Aman kita nzuraʼa da gau, ara man iyam a hai, a ngi-zuraʼa da gudkoɗa, ara iyam man a hakaɗai.

²⁵ Kinè ndohi Israel, kin zlay skwai, kin vay skwai mvi 40 tʼheshèkèɗ dè?

²⁶ Kin zuɓ mblom, bi kinè, a skwi mbèh skwai man kin fu a zhiklè kinè, skwi mbèh skwi kinè man kin gau a ri kinè.

²⁷ I da hel kine a ɓèlè a wud kokwar Damas, Ndo nzi pèc pècèk a gaɗa, man nzlembaɗ na Zhiklè bi mbiaʼa.