Amos 4 - Ma Zhiklè

¹ Va-tsena ma haha, dalahi zlèhi te Basan, te za Samarie, man kin ga ta matakwan a ndohi ntawassaʼa, a kin zumda ta gèɗ a mbelawhai. Man kin gaɗa ta ndohi kine mbibihiaʼa: Va-hulko skwi man nga siaʼa!

² Bi Zhiklè Ndo nzi pèc pècèk a mʼmbaɗa a sam nshèffè nengaʼa nkezlaʼa: na haha patsa a di a shkè, man ta da par kinè a gada züdo nhurmaʼa,

³ a ta pèr wudahi kinè a jir. Te deɓaʼa kin da bizhè auda a slrats gai, staɗ staɗ tèlèba a géɗ na, a ta wushede kinè a der za Hermon, Ndo nzi pèc pècèk a gada.

⁴ Vo-washkè a kokwar Béthel, va-gu malai! Te Guilgal va-gu mali holholaʼa! Va-zla na skwi a deɓ a vrai a prèk langa, a skwi 1 teva 10, 10, tʼhwaɗ mʼmèn makar, tʼhwaɗ mʼmèn makar.

⁵ Va-fa na vogwa a movar man skwi nshégèrè te dai a mbar ɓurdi, vo-boho a ta cèkèlè skwai, ko wawa ara man ndav nengaʼa a woyaʼa. Aman skwi haha ambaha kinè, ndohi Israel, Ndo nzi pèc pècèk a gaɗa.

Zhiklè a guv ta

⁶ Ko skwi zlèʼèn i va kinè ɓai te kokwar kinè tèlèba; movar a slra kinè ɓai a sam kinè tèlèba; aman kin menkada deɓa a sam ga ɓai, Ndo nzi pèc pècèk a gaɗa.

⁷ Iyè i va kinè iyam ɓai, ko a gi ki a ma makar, man a skwi a nslai. A kokwar ngiɗè i ga ta iyam, a kokwar ngiɗè i ga ta iyam ɓai. Gi dau ngidè a nʼngots iyam, gi dau ngidè a nʼngatsa ɓai, ngwora.

⁸ Kokwar cèw, makar, ta hu a kokwar ngidè staɗ, a ta da si iyam te pa. Aman iyam a ngeza ta ɓai; ko ar haha kin menkada deɓa a sam ga ɓai, Ndo nzi pèc pècèk a gaɗa.

⁹ I ga kinè matakwan a hüfa man a ndi dau, a cèɓè a bono ta gedasseda gi dau a gi lak kinè aussa, a wof kslor a wof tsna, dzarai a nʼndeda ma; ko ar haha kin menkada deɓa a sam ga ɓai, Ndo nzi pèc pècèk a gaɗa.

¹⁰ I pra kinè gidiɓèr a va, ara man i gu te kokwar Egypte, i bazl ta golahi kinè a tsakwal, a ta helda plèsh kinè a ma. A sam man kin ɓiceda pa, skwi man a zhkèha kinè dukedukeʼa. Ko ar haha kin menkada deɓa a sam ga ɓai, Ndo nzi pèc pècèk a gaɗa.

¹¹ I zede kinè lèmèlèmè ara man Zhiklè a gu te Sodome a Gomorrhe, a kin nʼngaʼa a gada shègwa nlussoaʼa, man ta ckoɗauda te va vogwa. Ko ar haha kin menkada deɓa a sam ga ɓai, Ndo nzi pèc pècèk a gada.

¹² A géɗ nengaʼa i woy a i ga ka skwi haha, Israel. A géɗ man i da ga ka skwi haha, tila ndav ngaya, Israel, a kin da zli gèɗ a Zhiklè ngaya!

¹³ Aman nengaʼa a ngu za, nengaʼa a ngu kozlar, nengaʼa a ngra na skwi man a hérèʼa a ndo, nengaʼa a ngu gu skwi nhél sam gu ruva, nengaʼa a dè a géɗ za tʼherkeda. Nzlembaɗ na Zhiklè bi mbiaʼa.