Amos 3 - Ma Zhiklè

Zhiklè a wara na di a Israel

¹ Va-tsena ma haha, man Ndo nzi pèc pècèk a goɗ a géɗ kinè, ndohi Israel, a géɗ ndohi te verzi kinè tèlèba, man i helka ta auda te kokwar Egypte.

² I parka kinè auda staɗgenè te va ndohi herkeda tèlèba, kinè genè. A géɗ nengaʼa, i ga kinè kita a géɗ mali kinè tèlèba.

³ Ndohi cèw ta slaha ta shèwèlè, man ta mba ma ta ka ɓi dè?

⁴ Marizhèlè tʼhèshèkèɗ a bebrè ambalai, man a ngsa skwi ɓi dè? Kra marizhèlè a goɓa man a ngsa skwi ɓi dè?

⁵ Ɗiak a kèlèhi a herkeda, ga votok a gshè dè? Ɓalai a mbeɗè, man skwi a te pa ɓi dè?

⁶ Ta tsi tolom te kokwar, a ndohi ta gudzi azɓi dè? Matakwan ngidè a zhè te kokwar, man Ndo nzi pèc pècèk a sun ɓi dè?

⁷ Bi Zhiklè Ndo nzi pèc pècèk a gi skwi ngidè azɓai, sèi a ngreda ta skwi man a woya a ngiaʼa a ndohi nhadka ma, ɓèlèlihi na.

⁸ Aman marizhèlè a kuɗai, ngi zlau azɓi wa? Bi Zhiklè, Ndo nzi pèc pècèk, a goɗa, nhèdè ma azɓi wa?

Ta duma Samarie

⁹ Va-gaɗa ta te gi-bihi Assyrie, te gi-bihi Egypte: Va-ɓica va a géɗ za Samarie, va-pu di a nrubi mbiaʼa te pa,

¹⁰ wuɗi man ta ga ta ndohi te pa! Ta sun ngi skwi nzura ɓai, Ndo nzi pèc pècèk a gada. Ta hil skwi a wuɗai, a ta shèkèdè mali te gi bihai.

¹¹ Gar haha Bi Zhiklè Ndo nzi pèc pècèk a gada: Ndo mayam a da tèuda kokwar a pa, a da mbeɗa zlazlar ngaya, a da duma gi-bi ngaya, a hil skwi te pa.

Ndohi Israel te Samarie

¹² Ndo nzi pèc pècèk a goɗ ar haha: Lè-mèlèmè ara ndo mɓer skwai a nguzlkoɗi sak cèw, man ɓai tsagi zlembaɗ staɗ, auda te ma marizhèlè, lèmèlèmè ndohi Israel ta dè mbél ta, tengaʼa man ta nzi a géɗ sam mʼmènè te Samarie, a géɗ sam mʼmènè man ta sumko a gani kumba.

¹³ Va-tsenaʼa, va-gu malwudai a géɗ ndohi Jacob, Bi Zhiklè Ndo nzi pèc pècèk, Zhiklè bi mbiaʼa, a gaɗa.

Vrihi Israel ambalai

¹⁴ A pats man i da ga ta kita a ndohi Israel a géɗ mali ta, i da gi kita a géɗ vrihai te Béthel. A i pasla zlogomhiaʼa, a ta wushahai a herkeda.

¹⁵ A i da mbeda hwaɗ gala, a gi mʼmènè. Klèng gi zlèʼèn fakawai; klèng gi bihi mbiaʼa, Ndo nzi pèc pècèk a gaɗa.