Amos 2 - Ma Zhiklè

Moab

¹ Ndo nzi pèc pècèk a goɗ ar haha: A géɗ mali kokwar Moab man a gi makar, a gi faɗ, i méndè kita a deɓa azɓai, a géɗ man ta fa na vogwa a vatasl bi Edom.

² I da fa na vogwa a kokwar Moab, a da ndeda gi-bihi te Kerijoth a ma. Moab a da metsi na te ndev nrubai, te nguzli var, a sam ntsi tolom,

³ a i da zede ta ndohi kita tèlèba a sam na, a i da bazl ta wud bihi nengaʼa tèlèba, Ndo nzi pèc pècèk a gada.

Juda

⁴ Ndo nzi pèc pècèk a goɗ ar haha: A géɗ mali kokwar Juda man a gi makar, a gi faɗ, i méndè kita a deɓa azɓai, a géɗ man ta kwola ma kita Ndo nzi pèc pècèk, a ta dzadzara ma nkwèr nengaʼa ɓai, ta gau ara babhi ta, ncèkèlma tengaʼa a nzlakede ta.

⁵ I da fa na vogwa a Juda, a da ndeda gi-bihi te Jérusalem a ma.

Israel

⁶ Ndo nzi pèc pècèk a goɗ ar haha: A géɗ mali Israel man a gi makar, a gi faɗ, i méndè kita a deɓa azɓai, a géɗ man ta preda ndo man nʼnga mali ɓai a ma a sulai, a ta preda ndo ntawassaʼa a ma te di kotokoroh.

⁷ Ta zler ta ndohi ntawassaʼa a sak, a ta dzam ta mbelaw ndohai. Kra a bab kra ta mbi a fali dam staɗ, a ta dérɗè nzlembaɗ ga nkezlaʼa a vna.

⁸ Ta manahi a tsagi sam mvi skwi a Zhiklè, a maslaka man ta va ta hi a slembelom. A ta si skwi nsai a sam mblom tengaʼa, man ndohi ta pil gèɗ a vna.

Israel a shid gèɗ azɓai

⁹ Iyè i zede ta ndohi Amor a ma kinè, man ngur tengaʼa nara ngur wof lakalak, man wuɗi ta a zhè ara wof ɗawai. I gedassa nyi wof nengaʼa te gédèʼa, a zluzlor tʼhai tèlèba.

¹⁰ Iyè, i helka kinè auda te kokwar Egypte, a i de kinè te hèshèkèd mvi 40, aman kin da kwèr kokwar ndohi Amor.

¹¹ Te va wudahi kinè i baha ta ndohi nhadka ma Zhiklè, te va golahi kinè, ndohi nkezlaʼa. Arsa ka ɓi dè, ndohi Israel? Ndo nzi pèc pècèk a gada.

¹² Aman kin va ta zom a ndohi nkezlaʼa a ta siaʼa. Kin gada ta ndohi nhadka ma: Kin hodko ma ɓai!

¹³ Gar haha iyè i da gudzeda herkeda tʼhwaɗ sak kinè, ara kiki man a hejèkeda va man nʼndha a dau.

¹⁴ Ko ndo mwoslaʼa a zhè, a slaha a nhi na ɓai. Ko ndo wuɗi a zhè, wuɗi nengaʼa a takaha azɓai. Ngul ndo ba a da mbél nshèffè na azɓai.

¹⁵ Ndo lèkèɗ a zlècèdè lèkèɗ azɓai, ndo mwoslaʼa a hi na aman a mbél na azɓai, ndo plèsh a slaha a mbela nshèffè na ɓai;

¹⁶ ndo slagama te va ngul ndohai a hi na, adai, a pats nasa, Ndo nzi pèc pècèk a gada.