Aggée 2 - Ma Zhiklè

Nʼnjèl gi Zhiklè macecèwaʼa

¹ Aman Darius bai, te mvi macecèwaʼa ki matsaraɗaʼa, mʼmèn 21, Ndo nzi pèc pècèk a ngoɗ te ma Aggée, ndo nhadka ma:

² Gaɗa na Zorobabel, kra Shealthiel, ngomna te Juda, a Josué, kra Jotsadak, bi ndohi mvi skwi a Zhiklè, a njèkèɗi ndohai:

³ Te va kinè ndo ngiɗè a zhi ɗè, man a rka gi haha nhalaʼa te nʼnjèl nengaʼa? Anai kin rka kè? Kin hur nara skwi ambali ka ɓi ɗè?

⁴ Zorobabel, gsa ndav ngaya genè – Ndo nzi pèc pècèk a gaɗa. Ka Josué, kra Jotsadak, bi ndohi mvi skwi a Zhiklè, gsa ndav ngaya genè; kinè ndohi kokwar tèlèba, va-gsa ndav kinè, Ndo nzi pèc pècèk a gaɗa. Va-gu mizlinè! I zhè a nda kinè, Zhiklè bi mbiaʼa a gaɗa.

⁵ Mèzhèɓ ga a nzi te ndev kinè, kin gu zlau ɓai!

⁶ Njèkè kèshkata i da gudzeda giɗfèk a herkeda, a iyam mbiaʼa, a sam man iyam az a pa ɓai.

⁷ A i gudzeda ndohi herkeda, a ndohi herkeda tèlèba ta da hulkoɗi skwi mèshèlè a gi man i da gi a haha a nʼnjèlè, Zhiklè bi mbiaʼa a gaɗa.

⁸ Suli a ga ga; guro a ga ga, Ndo nzi pèc pècèk, Zhiklè bi mbiaʼa, a gaɗa.

⁹ Nʼnjèl gi haha man a ma a da fena nʼnjèl ngedas na sa, Zhiklè bi mbiaʼa a gaɗa. I woy a i vi skwi mʼmbél ndo a sam haha, Zhiklè bi mbiaʼa a gaɗa.

Ma kita

¹⁰ Aman Darius bai, te mvi macecèwaʼa, ki macüɗaʼa, mʼmèn 24, Ndo nzi pèc pècèk a ngaɗa na te ma Aggée, ndo nhadka ma:

¹¹ Zhiklè bi mbiaʼa a goɗ ar haha: Dzhaɗ ta ndohi mvi skwi a Zhiklè, a ta ngra ka a géɗ ma kita:

¹² Ndo man a mpaɗda zluèɗ nkezlaʼa a ma maslaka na, a maslaka na a lama na movar, man ɓai mokoyom, barassa, mbar, man ɓai skwi nʼndi ngiɗè tsaɗ tsaɗ, a nʼnde na a skwi nkezlaʼa ɗè? Ta gaɗa na: Aʼai!

¹³ A Aggée a ngaɗa: Aman ndo ngiɗè a lama na nckondo, man ɓai skwi ngiɗè, a nlizhè va na a vna, skwi sa a nʼnde na a skwi nlizhèʼa ɗè? Ndohi mvi skwi a Zhiklè ta mbeɗa na a ma a ta gaɗa: Skwi nlizhèʼa!

¹⁴ A Aggée a ngaɗa: Lèmèlèmè ndohi haha, lèmèlèmè ndohi kokwar haha a sam ga, Ndo nzi pèc pècèk a gaɗa. Skwi man ta gi a ri ten-gaʼa tèlèba, a skwi man ta va na Zhiklè, skwi nlizhèʼa.

¹⁵ Anai va-gu maya, va-hüno a patsna, a ndè a ma ma: Ga ta ɗizlè kwa, ngiɗè a géɗ ngiɗè te gi Zhiklè, kin nzu kè?

¹⁶ Ndo man a hur a ngècè dau agoda 20, a nʼngots agoda 10 genè. Ndo man a hur a ngècè iyam nyi wof kokwi 50, a nʼngots 20 genè.

¹⁷ Ko i zlinda cèɓè a bono a va dau kinè, a i gedassaʼa, skwi tèlèba man ri kinè a ngau, ko staɗ te ndev kinè a menkaɗa deɓa a sam ga ɓai, Ndo nzi pèc pècèk a gaɗa.

¹⁸ Gar haha va-gu maya, va-hüno a patsna a ndè a ma ma! Ki macüdaʼa, mʼmèn 24, a pats man kin pi kwa verzi gi Zhiklè, va-gu maya!

¹⁹ Tser dau a zhè te wov ɗè? Gi lak, wof kslor, wof ngurɗyök, wof tsna, ta yi skwi ɗè? Aman a hinè a patsna, i da pshè ta ma.

Ma a sam Zorobabel

²⁰ A Ndo nzi pèc pècèk a ngaɗa na ma nengaʼa a Aggée macecèwaʼa, te mʼmèn 24, a ngaɗa:

²¹ Gaɗa na Zorobabel, ngomna te Juda: I da gudzeda giɗfèk a herke-da,

²² i kèldè sam nʼnzi bihi a hai, a i gedassa wuɗi kokwar-bi ndohi herkeda. I da zukda kiki var a i wushede ndohi man a deɓa a hai, a plèsh a ndohi man a deɓ plèsh ta wushahai, a ta bèzlè va ta a tsakwal.

²³ A pats nasa — Zhiklè bi mbiaʼa a gaɗa — ka gi a ndo malwuɗi ga; aman ka, man i ngatska ka auda, Zhiklè bi mbiaʼa a gaɗa.