Aggée 1 - Ma Zhiklè

Nrèm gi Zhiklè zaʼa

¹ Aman Darius bai, te mvi macecè-waʼa, ki mamokwaʼa, a pats nshèlèkuraʼa, Ndo nzi pèc pècèk a ngaɗa na Zorobabel, kra Shealthiel, ngomna te Juda, a Josué, kra Jotsadak bi ndohi mvi skwi a Zhiklè, te ma Aggé, ndo nhadka ma Zhiklè:

² Zhiklè bi mbiaʼa a goɗ aranta: Ndohi haha ta gaɗa: Tiɗè sama di ka ɓai, njèkédai a nga rèm gi Zhiklè zaʼa.

³ Aman Ndo nzi pèc pècèk a goɗ te ma Aggée, ndo nhadka ma:

⁴ Kos tiɗè sama ma, kin nzi a gi züdo, a gi ga a haha a mbeɗ na?

⁵ Anai Zhiklè bi mbiaʼa a gaɗa: Va-war skwi man a ga kinè!

⁶ Kin zleki skwi a vata, kin ɓicè kèshkata gené. Skwi nʼndi kinè a zhè, aman a ngeza kinè azɓai. Skwi nsi kinè a zhè, aman a ngeza hwaɗ azɓai. Maslaka kinè a zhè, aman a slaha a ntsa kinè mtasl azɓai. Ndo mizlinè a ngècè sulai, aman verzi gozhèm nengaʼa nzlina.

⁷ Zhiklè bi mbiaʼa a goɗ ar haha: Va-war skwi man a ga kinè!

⁸ Vo-do a géɗ za, va-ngul wof, va-gu gai, a i wuffè a géɗ nengaʼa, a i ngreda va gate nʼnjèl ga, Ndo nzi pèc pècèk a gaɗa.

⁹ Kin zhor skwi kumba, a kin ngots kèshkata. A skwi man kin ckoɗa ngwai, i ksardaussa, èhèmè? Zhiklè bi mbiaʼa a gaɗa: a géɗ man gi ga mʼmbeɗ na, a kinè, staɗ staɗ tèlèba ta wuffè te gi ta.

¹⁰ Gar haha a géɗ kinè, giɗfèk a goko minmèn azɓai, a skwi a gi azɓai.

¹¹ A i gu aman herkeda a gwor na, ko tʼhai, ko te za, a dau ba a marori ba; a mbar ba a she na, ko tʼhai, ko te za, a dau ba a marori ba; a mbar ba a she na. A skwi mèmè man a fcè tʼherkeda, a ndohi ba, a skwi ba, a skwi ntul mizlinè ndohai, a gedas na.

¹² Te deɓaʼa Zorobabel, kra Shealthiel, a Josué, bi ndohi mvi skwi a Zhiklè, kra Jotsadak, a njèkèɗi ndohi tèlèba ta fu gèɗ a ma Ndo nzi pèc pècèk, Zhiklè tengaʼa, ara man Aggée, ndo nhadka ma a gaɗa ta, ma man Ndo nzi pèc pècèk, Zhiklè tengaʼa, a nzlinda na; a ndohi ta gu zlau Ndo nzi pèc pècèk.

¹³ Te deɓaʼa Aggée, ndo sak Ndo nzi pèc pècèk, a mʼmenda ta ma Ndo nzi pèc pècèk a ndohai, a ngaɗa: I zhè a nda kinè, Ndo nzi pèc pècèk a gaɗa.

¹⁴ A Ndo nzi pèc pècèk a mpoko na gèɗ auda a srak a Zorobabel, kra Shealthiel, ngomna te Juda, a Josué kra Jotsadak, bi ndohi mvi skwi a Zhiklè, a njèkèɗi ndohi tèlèba. A ta shkè a ta gu mizlinè gi Zhiklè bi mbiaʼa, Zhiklè tengaʼa,

¹⁵ te ki mamokwaʼa, mʼmèn 24.