Actes 9 - Ma Zhiklè

Saul a ngwèdè ndav na

¹ Saul, nengaʼa a vèɗ htsan a golahi Bi Yèsu, a mdo a sam bi ndohi mvi skwi a Zhiklè,

² a ndzhoɗo ɗèlèwèr, man a woya a ndèʼa a gi njèngè ma Zhiklè te kokwar Damas, man a va na civèɗ, aman a ndzaw ta ngurhi a ngwozi man ta jèjèr njè-ma mɓuaʼa, a nde ta a kokwar Jérusalem.

³ Aman a mdo, ndul ndul a ndikè a kokwar Damas, a nasa nasa skwi nhél sam a mshkè te zhiklè.

⁴ A Saul a nkalahai, a ntsena ngèɗè ngiɗè man a gaɗa na: Saul, Saul, ka parahayè èhèmè?

⁵ A nengaʼa a ngaɗa: Bai, ka wa? A ngèɗè a mʼmbeɗka na a pa: I Yèsu, nengaʼa man ka parahayè.

⁶ Slambaɗa, a ko do a kokwar! Te pa ta da gaɗa ka skwi man ka da giaʼa.

⁷ Ndohi man to do tèlè, ta zlatsa a pa, a ta rzl ta; aman ta tsena ngèɗè, aman ta rka ndo ɓai.

⁸ A Saul a nslambaɗa tʼhai, aman a winè di na, a rka di ɓai. A ta gso te rai, a ta daʼa a kokwar Damas.

⁹ Te pa mʼmèn makar a rka di ɓai, a nʼnda skwa ɓai, a nsa skwa ɓai.

¹⁰ Gol Yèsu ngiɗè a zhè te kokwar Damas, nzlembaɗ na Ananias. Bi Zhiklè a ngaɗa na:

¹¹ Slambaɗa, a ko do a civèɗ, man ta baha na civèɗ njèraʼa, a ka dzhoɗo gi Jude. Ndo ngiɗè te pa, nzlembaɗ na Saul te kokwar Tarse. Na haha, nengaʼa a tsi rai.

¹² Te nshun nengaʼa a nrka ndo ngiɗè, nzlembaɗ nengaʼa Ananias, man a shkè a sam na, a mfa na ri a gèɗ, aman a nrka dai.

¹³ Ananias a mʼmbeɗa na a ma, a ngaɗa: Bai, i tsena labar ma ndo haha te ma ndohi kumba, ara man a gu skwi ambaɓiaʼa kumba a sam ndohi Zhiklè te kokwar Jérusalem.

¹⁴ Te kokwar haha a nʼngotsko wuɗi bai, man ndohi mvi skwi a Zhiklè mbibihiaʼa ta va na, aman a ndzaw ta ndohi tèlèba, man ta tsi ri a nzlembaɗ ngaya.

¹⁵ Bi Zhiklè a ngaɗa na: Do, aman nengaʼa ndo mizlinè ga man i ngotskoɗauda, aman a dè nzlembaɗ ga a sam ndohi herkeda, a sam bihai, a sam ndohi Israel.

¹⁶ I woya man i ngra na matakwan tèlèba man a da siaʼa a géɗ nzlembaɗ ga.

¹⁷ A Ananias a mdo, a mshkè a gi matsa, a mfa na ri a gèɗ, a ngaɗa: Saul, kramam ga, Bai Yèsu a nzlindekayè a sam ngaya, nengaʼa man a ngudko ka va a dai a civèɗ, aman ka shkè a haha: a woya aman ka rka di zaʼa, a ndav ngaya a ndhè a Mèzhèɓ Zhiklè nkezlaʼa.

¹⁸ A nasa nasa di nengaʼa a mwin na, a nrka di ma, a nslambaɗa, a nʼngots baptême,

¹⁹ a nʼndau skwi nʼndai, a nʼngots wuɗai. Saul a nʼnza a sam golahi Yèsu te kokwar Damas kètè.

Saul a njè ma Zhiklè te Damas

²⁰ A njè ma Yèsu te gi njengè ma Zhiklè langa, a ngaɗa: Yèsu, nengaʼa kra Zhiklè.

²¹ Tèlèba man ta tsenaʼa, ta rzl ta, a ta gaɗa: Nengaʼa ndo man a gedas ta ndohi tèlèba man ta tsu ri a nzlembaɗ haha te kokwar Jérusalem ka bi dè? A mshkè haha, man a dzaw ta, a de ta a sam ndohi mvi skwi a Zhiklè mbibihiaʼa ka bi dè?

²² Aman wuɗi Saul a grè a ma ma, a ndzakaɓama ta gèɗ a ndohi Juif te kokwar Damas, a géɗ man a ngreda Yèsu, nengaʼa Kristi.

Saul a wuc na te ri ndohi Juif

²³ Te deɓ mʼmèn kumba, ndohi Juif ta hur maya, aman ta keɗaʼa.

²⁴ Aman ndohi ngiɗè ta ngra na skwi man ta huro, a Saul. A ndohi kokwar ta ɓer ntamagi pèc pècèk, aman ta keɗaʼa.

²⁵ A golahi Yèsu ta co a vaɗ, a ta da auda a zlazlar kokwar, a ta sulomdekoɗahai te gwa.

Saul te kokwar Jérusalem

²⁶ Aman Saul a mshkè a kokwar Jérusalem, a woya man a nhumdè va a va golahi Yèsu, ta gu zlauaʼa, ta fa na gèɗ a ta gaɗa nengaʼa gol Yèsu ɓai.

²⁷ A Barnabas a nco, a ndaʼa a sam ndohi sak, a ngreda ta ara man Saul a rka Bi Yèsu a civèɗ, a ntsena ma na, ara man te kokwar Damas a njoko ma a nzlembaɗ Yèsu auda a zlau ka bai.

²⁸ A nengaʼa a nʼnza a sam ta, a shèwèlè te kokwar Jérusalem, a njoko ma a nzlembaɗ Bi Yèsu auda a mwuffè.

²⁹ A ngaɗa ta ma a ndohi Juif man ta tsena daʼai grec, a ngu gèjau a nda tengaʼa. Aman tengaʼa ta woy a ta keɗaʼa.

³⁰ Aman kramamhi na ta tsenaʼa, ta daʼa a kokwar Césarée, a ta zlündo a kokwar Tarse.

³¹ A mpi ndohi Zhiklè te kokwar Ju-dée, te kokwar Galilee, te kokwar Samarie tèlèba, ta nza a gumai, a ta ngots wuɗai, a to do a ma ma te zlau Bi Zhiklè, ta ndha a Mèzhèɓ Zhiklè nkezlaʼa man a bid ta. A ndohi ta zlèzlèmè a ma ma.

Enée mʼmbela te matakwan

³² A Pierre a nsawala a sam tèlèba, a mshkè a sam ndohi Zhiklè te kokwar Lydde ba.

³³ Te pa a nʼngots ndo ngiɗè, nzlembaɗ na Enée, mʼmana tʼhai mvi tsamakaɗ, ndo vedal.

³⁴ A Pierre a ngaɗa na: Enée, Yèsu Kristi a mbel ka! Slambaɗa, tila sam mʼmènè ngaya a ri ngaya! A nasa nasa a nslambaɗa.

³⁵ A ndohi tèlèba man ta nza te kokwar Lydde a Saron, ta rkaʼa, a ta ngwode ndav ta a sam Bi Zhiklè.

Dorcas a nʼngots nshèffè

³⁶ Te Joppé, dem Yèsu ngiɗè a zhè, nzlembaɗ na Tabitha (a daʼai grec Dorcas, ara ngèɗè ‘mènèɗ’). Nengaʼa a ngu skwi man amba kumba, a mva ta skwi a ndohai.

³⁷ A pats nasa mbelakaɓai, a mʼmets na. A ta panaʼa, a ta feda a gi te géɗèʼa.

³⁸ Lydde a zhè ndul ndul a ma Joppé, a golahi Yèsu ta tsena, Pierre a zhè te pa, a ta zlündo ngurhi cèw a sam na, a ta bidèʼa, da ndawalka va ɓai, da shkè a sam ta tsam tsam.

³⁹ A Pierre a nslambaɗa, a ndo a sam ta. Aman a mshkè, ta da a gi man a géɗèʼa, a ngwozi mazihi tèlèba ta tèuda a pa, a ta kuɗai, a ta ngra na maslaka nshüɗkè nshüɗkè man Dorcas a ɗoho, te va man a nza a nshèffè dai.

⁴⁰ Aman Pierre a ndzar ta tèlèba auda ma, a nkalahi a deɓ sak nengaʼa, a ntsu rai, a nʼngwoda na ma a dem mʼmetsaʼa, a ngaɗa: Tabitha, slambaɗa! A nengaʼa a mwina dai, a nrka Pierre, a nʼnza a verzai.

⁴¹ A Pierre a ngeda na ri nengaʼa, a nslambaɗda, a mbaha ta ndohi Zhiklè, a ngwozi mazihai, a nzlatseda dem matsa a sam di ta a nshèffè.

⁴² A ta tsena te kokwar Joppè tèlèba, a ta kumba ta co Bi Yèsu a ndav.

⁴³ A Pierre a nʼnza a gi Simon, ndo ngürv bkwai, nʼnzi kètè.