Actes 8 - Ma Zhiklè

Saul a ga ta matakwan a mpi ndohi Zhiklè

¹ A pats nasa ta hüno a ta dzar ta mpi ndohi Zhiklè te kokwar Jérusalem, a ta venda gèɗ ta a kokwar Judée a Samarie tèlèba. Sèi ndohi sak ta ksar ta bai.

² A ndohi Zhiklè ta ra Etienne, a ta kuɗu a vata.

³ A Saul a ndzakaɓa mpi ndohi Zhiklè, a mdo a gi agi a gai, a ngska ta ngurhi a ngwozi, a mpe ta a gi dangai.

Njè-ma mbelaʼa te kokwar Samarie

⁴ A ndohi man ta venda gèɗ ta, to do, a ta nju ma Zhiklè.

⁵ A Philippe a mdo a kokwar ngiɗè te Samarie, a njè ta ma Kristi.

⁶ A ndohi ta fa na zlembaɗ a vata, a ta rka nrkedi man a gau.

⁷ Aman mèzhèɓhi ambaɓihiaʼa ta shkè auda te ndohi man a ga ta, a ta tsu lalau a vata; a ndohi man ta tèfè, a ndohi vedal kumba ta mbel ta.

⁸ A mwuffe mbiaʼa a zhè te kokwar sa.

⁹ Ndo ngiɗè a zhè te kokwar, nzlembaɗ na Simon, man a mbèh skwi halaʼa, a ndzugor va, a ndohi Samarie tèlèba ta rzl ta a pa,

¹⁰ a ta pi diaʼa, ko ndo nkèshèʼa, ko ndo mbiaʼa tèlèba, a ta gaɗa: Wuɗi Zhiklè mbiaʼa.

¹¹ Ta pu diaʼa, te man ndo haha a mboh skwi a sam ta nʼnzi a zhè.

¹² Aman ta co ma kokwar-Bi-Zhi-klè, a nzlembaɗ Yèsu Kristi, a ndav, man Philippe a njè ta, a ngurhi a ngwozi ta gu baptême.

¹³ Simon ba a nco a ndav, a ngu baptême, a ngso va a Philippe. Aman a rka nrkedi a skwi man a gau, a nrzl na.

¹⁴ Aman ndohi sak te kokwar Jérusalem ta tsenaʼa, kokwar Samarie a nco ma Zhiklè, ta zlündo Pierre a Jean,

¹⁵ aman ta dè, a ta tsi rai a gèɗ tengaʼa, a ta da ngè-cè Mèzhèɓ Zhiklè nkezlaʼa.

¹⁶ Aman Mèzhèɓ Zhiklè nkezlaʼa a mshkè a gèɗ tengaʼa te kokwar Samarie di ɓai, ko staɗ, te man ta gu baptême sèi a nzlembaɗ Bi Yèsu.

¹⁷ A Pierre a Jean ta fa ta ri a gèɗ, a ndohi Samarie ta ngots Mèzhèɓ Zhiklè nkezlaʼa.

¹⁸ Aman Simon a rkaʼa, Mèzhèɓ Zhiklè nkezlaʼa a mshkè, aman ndohi sak ta fu ri a gèɗ ndo, a ngaɗa:

¹⁹ Va-vay wuɗi ba, aman i fi ri a gèɗ ndo; a nengaʼa a woya a mpa ta sulai, a ngècè Mèzhèɓ Zhiklè.

²⁰ A Pierre a ngaɗa na: kinè a Suli ngaya sèi da gedas na, a gèɗ man ka huro, skwi man Zhiklè a viaʼa, ndo a ngècè a sulai.

²¹ Ka ngècè skwi haha azɓai, te man ndav ngaya nzura ka ɓai a sam Bi Zhiklè.

²² Gar haha sèi ka menkada deɓa te mali ngaya, a ka tsi ri a Bi Zhiklè, gar a pra ka mali man ka hur arsa.

²³ Aman i rkaʼa, ka ndha a mèdètèr nduzlekzlekaʼa, mali a ndzaw ka.

²⁴ A Simon a mʼmbeɗa na a ma: Sèi kin tsi ri a Bi Zhiklè a gèɗ ga a ri kinè, a skwi man ka goɗ haha, ko staɗ da shkè a gèɗ ga ɓai.

²⁵ A tengaʼa man ta gu malwudai ma Bi Zhiklè, ta menkada deɓa a kokwar Jérusalem, a ta njè ma mbelaʼa te kokwar Samarie tsaɗ tsaɗ.

Philippe a ntokotasl-bai te Ethiopie

²⁶ A gol Bi Zhiklè a ngaɗa na Philippe: Slambaɗa, a ko do man a dukwaɗ, a civèɗ man a shkè te Jérusalem, a ndè Gaza, civèɗ hèshèkèɗ.

²⁷ A nengaʼa a nslambaɗa, a mdo. A nrka ndo ngiɗè te Ethiopie, ntokotasl-bai, ndo mɓer gi bai Candace ngwozaʼa, te Ethiopie, ndo mɓer gi mèshèlè nengaʼa ba, man a shkè a kokwar Jérusalem, aman a ntsi ri a Bi Zhiklè.

²⁸ A minè a deɓa a ngwai, a nʼnza a kiki nengaʼa, a njongo ma ndo nhadka ma Esaie.

²⁹ A Mèzhèɓ Zhiklè a ngaɗa na Philippe: Do a tsagi kiki sa!

³⁰ A Philippe a mhau, a ntsena ara man a jongo ma ndo nhadka ma Esaie, a ngaɗa: Ka tsena skwi man ka jèngè dè?

³¹ A nengaʼa a ngaɗa: I sun ko tema, man ndo a ngray ɓai? A mbaha na Philippe a kikai, a nzi a tsagi nengaʼa.

³² Ma ɗèlèwèr Zhiklè, man a jongo, na nta: Ta da nengaʼa ara tambak man ta dè a sam man ta zli daiaʼa a pa, ara tambak man ta zli mamliaʼa.

³³ A mʼmanda gèɗ na a hai, a Zhiklè a nco kita nengaʼa, a nco nshèffè nengaʼa auda tʼherkeda. Nslaha a ngrédè tser nengaʼa wa?

³⁴ A ntokotasl-bai a ngaɗa na Philippe: Sèi ka gaɗayè, ndo nhadka ma a goɗ ma haha a géɗ ngè? A goɗ a géɗ va nengaʼa dè, dè a géɗ ndo ngiɗè dè?

³⁵ A Philippe a hüno a sam ɗèlèwèr Zhiklè haha, a nʼngreda na ma mbelaʼa a géɗ Yèsu.

³⁶ Aman ta dè a civèɗ, ta shkè a ma woyam; a ndo mɓer gi bai a ngaɗa: Na haha, iyam a zhè; ka gay baptême azɓi èhèmè?

³⁷ A Philippe a ngaɗa: Aman ka co a ndav ngaya tèlèba, ka slaha a ka gi baptême. A nengaʼa a mʼmbeɗa na a ma: I co a ndav ga: Yèsu Kristi, nengaʼa kra Zhiklè.

³⁸ A nzlatseda kiki a hai, a ta suloma a iyam, cèw ba, Philippe a nda ntokotasl-bai. A Philippe a nʼnga na baptême.

³⁹ Aman ta shkè auda te iyam, Mè-zhèɓ Bi Zhiklè a nco Philippe auda a sam di na, a ndo mɓer gi bai a nrkaʼa te deɓaʼa asaɓai. Aman nengaʼa a ndo a ma a civèɗ na a mwuffè.

⁴⁰ A Philippe a mshkè a kokwar Azot, aman a shèwèldè ma mbelaʼa te pa, te kokwarhi tèlèba, ha a ndikè a kokwar Césarée.