Actes 6 - Ma Zhiklè

Ta par ta ndohi tsaraɗ

¹ Te ndev nasa golahi Yèsu ta mana a vata, a ndohi Grec ta gu ndav a géɗ ndohi Hébreu. Ndohi Grec ta gaɗa, ngwozi mazihai ta pca ta a gèɗ a sam man ta kezli skwai pèc pècèk.

² A tengahi 12 ta baha ta golahi Yèsu tèlèba, a ta gaɗa: Ambaɓai aman nga slaha nga gi mizlinè ma Zhiklè zura ɓai, a gèɗ man nga gi mizlinè skwi nʼndai.

³ Kramamhi nga, va-woy ndohi tsaraâ te ndev kinè, man labar ma tengaʼa amba, a ndav tengaʼa nʼndha a Mèzhèɓ Zhiklè nkezlaʼa, a may a, aman ta gi mizlinè sa.

⁴ A nga, nga gi mizlinè njè ma Zhiklè a ma ma, a nga tsi rai.

⁵ Ma tengaʼa ambaha ta ndohi man ta haya va, a ta co Etienne, ndo man a nco Zhiklè a ndav na a vata, a Mèzhèɓ Zhiklè a nʼndha ndav nengaʼa, a nda Philippe, Prochore, Nicanor, Timon, Parménas, a Nicolas, te kokwar Antioche, man halaʼa a ndzodzor civèɗ ndohi Juif.

⁶ A ta zlatsede ta a ma ndohi sak, a ta tsu ri a géɗ tengaʼa, a ta fa ta ri a gèɗ.

⁷ A ma Zhiklè a zlèzlèmè, a golahi Yèsu ta shkè na va a vata te kokwar Jérusalem. A ndohi mvi skwi a Zhiklè kumba ta fu gèɗ a ma Zhiklè, a ta co a ndav.

Ta gso Etienne

⁸ A ndav Etienne nʼndha a pombai, a wuɗai, a ngu nrkedi kumba, a nʼngreda skwi mbiaʼa a sam ndohai.

⁹ A ndohi ngiɗè tsaɗ tsaɗ te gi njèngè ndohi man halaʼa ɓèlèlihai, a Cyrénée, a Alexandrie, a ndohi Cilicie a Asie, ta shkè, a ta gu gè-jau a nda Etienne.

¹⁰ Aman ta slaha ta fa na a gèɗ ɓai, a géɗ maya man Mèzhèɓ Zhiklè a va na.

¹¹ A ta poko ta gèɗ auda a ndohi tsaɗ kètè, a ta gaɗa: Nga tsena ara man a derɗè Moise a Bi Zhiklè.

¹² A ta gu aman ndohai, a ndohi nhalaʼa, a malamhai ta shkè, a ta ngozlkoɗai, a ta daʼa a sam ndohi ncèmma.

¹³ A ta Zlatseda ndohi malwuɗihai, aman ta tsokol ma, a ta gaɗa: Ndo haha a jèkè azɓai, man a gèɗè ma ambaɓiaʼa a géɗ sam nkezlaʼa haha, a géɗ ma kita.

¹⁴ Nga tsena ara man a gaɗa: Yèsu ndo Nazareth a di a gedassa sam haha, a ngwèdè tsuf haha man Moise a va nga.

¹⁵ A ndohi ncèmma tèlèba ta pa na dai, a ta rka di nengaʼa ara di gol Zhiklè.