Actes 5 - Ma Zhiklè

¹ Ndo ngiɗè a zhè, nzlembaɗ na Ananias, ngwoz na Saphira. Ta preda gi dau ta a ma.

² Te skwi tengaʼa man ta preda ma, ta nghedaha Suli kètè. Ngwoz nengaʼa ba a suna. Njèkèdi sulai, Ananias a nhulkoɗai, a mpa ta ndohi sak.

³ A Pierre a ngaɗa: Ananias, Sadan a nʼndha ndav ngaya èhèmè, aman ka cèkèlma a sam Mèzhèɓ Zhiklè nkezlaʼa, a ka nghedaha Suli gi dau ngaya kètè?

⁴ Man ka da preda ma ɓai, skwi ngaya ka ɓi dè? Aman ka preda ma, skwi wuɗi ngaya ka ɓi dè? Ka hur te ndav ngaya ar haha èhèmè? Ka tsokol ma a sam ndohi ka ɓai, ka tsokol ma a sam Bi Zhiklè.

⁵ Aman Ananias a ntsena ma haha, a nkalahai, a mʼmets na. A zlau mbiaʼa a ndza ta ndohi tèlèba man ta tsenaʼa.

⁶ A golahi ta co nckondo, a ta da auda, a ta raʼa.

⁷ Te deɓa kètè ngwoz nengaʼa a mshkè, a sun skwi man a gu ɓai.

⁸ A Pierre a ngaɗa na: Ngrayè, kin preda gi dau kinè a ma, a Suli tar naha genè dè?

⁹ A nengaʼa a ngaɗa: Halau! A Pierre a ngaɗa na ngwoz: Kin humda ma kinè, aman kin jkedè Mèzhèɓ Bi Zhiklè èhèmè? Na haha sam sak ndohi man ta ri baki ngaya, a cinè a ntamagai. A ta da zuɓ ka lèmèlèmè.

¹⁰ A nasa nasa a nkalahai, a mʼmets na. Aman golahi ta shkè a gai, ta ngotso, mʼmetsa ma. A ta zuɓdauda, a ta raʼa a tsagi baki na.

¹¹ A mpi ndohi Zhiklè tèlèba ta gu zlau a vata.

Nrkedi te ri ndohi sak

¹² A ndohi sak ta gu nrkedi kumba a sam ndohai, a ta ngreda skwi kumba auda. Ta tèlèba ta zhè te mozodo Salomon te gi Zhiklè, nhér gèɗ ta staɗ.

¹³ Te ndev ndohi nte deɓa ko staɗ a ndzadzar ta ɓai; ta gu zlau.

¹⁴ Aman ndohi tèlèba ta nzal ta. Ndohi ngiɗè tsaɗ tsaɗ, ngurhi a ngwozi kumba ta humda ta va a va, a ta co Bi Zhiklè a ndav ta.

¹⁵ A ta hulko ndohi matakwan a civèɗ a sam mʼmènè, a telai, a sam Pierre; ko man ta bezde ta a mèzhèɓ nengaʼa genè ba.

¹⁶ A ndohi rèdèdèa ta shkè te kokwar, man a ma kokwar Jérusalem, a ta hulkoɗi ndohi matakwan a ndohi man mèzhèɓhi ambaɓihiaʼa a ga ta, a ta mbel ta a matakwan tèlèba.

Ta ga ta matakwan a ndohi sak

¹⁷ A bi mvi skwi a Zhiklè, a ndohi sad-ducée tèlèba ta slambaɗa, a ta gu srak.

¹⁸ A ta par ta ndohi sak, a ta pe ta a gi dangai.

¹⁹ Aman a vaɗ, gol Zhiklè a mwina ntamagi dangai, a nde ta auda, a ngaɗa:

²⁰ Vo-do, va-zlatsa a gi Zhiklè, va-gaɗa ta ndohi ma nshèffè haha tèlèba!

²¹ Aman ta tsena ma haha, to do a gi Zhiklè a prèk te gai, a ta senda ta ndohai. A bi mvi skwi a Zhiklè a mshkè, a ndohi man ta zhè a sam na, a ta baha ta ndohi ncèmma, a ndohi nhalaʼa te Israel tèlèba, a ta zlündo ndo a gi dangai, aman a helka ta.

²² Aman sojèhi tengaʼa a ta shkè, ta ngats ta te gi dangi ɓai, a to do a deɓa, a ta ngreda a ndohi mbibihiaʼa, a ta gaɗa:

²³ Nga ngots ntamagi dangai, mɓara zuraʼa, a ndohi mɓer ntamagi ta zlatsa a ntamagai. Aman nga wina ntamagai, ndo a te pa ɓai.

²⁴ Aman ndohi mvi skwi a Zhiklè mbibihiaʼa, a tsuvom ndohi mɓer gi Zhiklè, ta tsenaʼa, ta huro:

²⁵ Skwi haha a gu nkèkèkè? A ndo ngiɗè a mshkè, a ngaɗa ta: Na haha, ndohi man kin pe ta a gi dangai, ta zlatsa te gi Zhiklè, ta senda ta ndohai.

²⁶ A tsuvom ndohi mɓer gi Zhiklè, a sojèhi nengaʼa to do, a ta helka ta, a wuɗi ka ɓai, aman ta gu zlau ndohai; ta gaɗa, ta da kal nga a kwa.

²⁷ Aman ta helka ta, a ta zlatsede ta a sam ndohi ncèmma, a bi ndohi mvi skwi a Zhiklè a ndzhad ta:

²⁸ Nga fa kinè ma a gèɗ, aman kin senda ta ndohi a nzlembaɗ haha ɓai, na haha kin ndha kokwar Jérusalem tèlèba a njè-ma kinè, a kin woy a kin gi aman ta jhèɗè Pombaz ndo haha te ri nga.

²⁹ A Pierre a ndohi sak ta mbeɗa ta a ma: Ndo da fu gèɗ a ma Zhiklè, a fena ma ndohai.

³⁰ Zhiklè babhi nga a nslambaɗda Yèsu te mʼmetsai, nengaʼa man kin keɗaʼa, a kin gezlalaʼa.

³¹ Nengaʼa, Zhiklè a nzalaʼa a ri mandi nengaʼa, aman a gi a ndo ncè ta ma ndohai, a ndo mʼmbel ndo, aman kokwar Israel a ngwèdè ndav na, a ngècè mpre malai.

³² Nga ndohi malwuɗihi te skwi sa; nga a Mèzhèɓ Zhiklè nkezlaʼa, man Zhiklè a va ta tengaʼa man ta fi gèɗ a ma nengaʼa.

³³ Aman ta tsena ma haha, ta gu ndav a vata, a ta huro ta woy a ta bazl ta.

³⁴ Aman ndo ngiɗè te ndev ndohi ncèmma a nslambaɗa, ndo pharisie, nzlembaɗ nengaʼa Gamaliel, ndo malam man ndohi tèlèba ta slébèrdèʼa, a ngaɗa ta aman ta de ta ndohi sak auda kètè.

³⁵ A ngaɗa: Kinè, ndohi Israel, va-gu maya a skwi man kin ga ta ndohi haha.

³⁶ Nʼnzi a zhè kètè, Theudas a nslambaɗa, a ndzugor va, a ndohi ngiɗè tèmèrè Gad ta dzodzora. Aman ndo ngiɗè a nkeɗaʼa, a ndohi tèlèba man ta fa gèɗ a ma nengaʼa, a ta venda gèɗ ta.

³⁷ Te deɓaʼa Jude, ndo Galilée, a nslambaɗa, a pats man ta nger ta ndohai; a ta gu aman ndohi kumba ta dzodzora. Aman nengaʼa ba a mʼmets na, a ndohi man ta fu gèɗ a ma nengaʼa, ta venda gèɗ ta.

³⁸ Anai i gaɗa kinè: Va-jèke ta ndohi haha, a kin pre ta! Aman skwi man ta hérèʼa a ta giaʼa a shkè te ndo, a di a gédèsh na.

³⁹ Aman a shkè te Bi Zhiklè, a vava, kin slaha a kin zede ta ɓai. Da da ngats kinè ɓai ara ndohi man ta gi var a Bi Zhiklè!

⁴⁰ A ta co ma nengaʼa. A ta baha ta ndohi sak, ta ndah ta, a ta fa ta ma a gèɗ, aman da goɗ ma a nzlembaɗ Yèsu asaɓai, a ta pre ta.

⁴¹ A ndohi sak to do auda a sam ncèmma a mwuffe, a gèɗ man ta slaha a ta si matakwan a nzlembaɗ Yèsu.

⁴² Pèc pècèk ta senda ta, ndohai, a ta njè ta ma Yèsu, nengaʼa Kristi, te gi Zhiklè, te gi tsaɗ tsaɗ, ta jèka ɓai.