Actes 4 - Ma Zhiklè

¹ Aman ta gèɗè a ndohai, ndohi mvi skwi a Zhiklè, a tsuvom ndohi mɓer gi Zhiklè, a ndohi sadducée, ta shkè a sam ta.

² Ta gu ndav, aman ta rkaʼa, ta senda ta ndohai, a ta njè ta nslambaɗkaɗa Yèsu auda te ndev ndohi mʼmetsaʼa.

³ A ta gs ta; aman pats nkala, ta pe ta a gi dangai, ha angoslèm.

⁴ Aman ndohi kumba, man ta tsena maʼa, ta co a ndav. Ndohi nco a ndav, a gi gozhèm zlam.

⁵ A prèk, bihi Juif a ndohi nhalaʼa, a malamhai, ta ɓiceda va a kokwar Jérusalem.

⁶ Anne, bi mvi skwi a Zhiklè, a Caiphe, a Jean, a Alexandre, a tengahi tèlèba man ta te verzi ndohi mvi skwi a Zhiklè,

⁷ ta zlatsede ta a sam kita, a ta dzhaɗ ta: Kin gu skwi haha a wuɗi ngè, a nzlembaɗ ngè?

⁸ A Pierre, nʼndha a Mèzhèb Zhiklè nkezlaʼa, a mʼmbeɗa ta a ma: Kinè, ndohi mbibihiaʼa, te ndev ndohai, kinè, ndohi nhalaʼa!

⁹ Aman ta ga nga kita a patsna, a géɗ man nga takaha ndo vedal, a géɗ man nga takaha arsa, va-suna, kinè a ndohi Israel tèlèba!

¹⁰ Ndo vedal a nzlatsa, a mʼmbela a sam di kinè, a nzlembaɗ Yèsu Kristi ndo Nazareth, man kin gezlalaʼa, man Zhiklè a nslambaɗda te ndev ndohi mʼmetsaʼa.

¹¹ Nengaʼa kwa man kinè, ndohi nɗizlè gai, kin kwolaʼa; nʼngaʼa a kwa te verziaʼa.

¹² Skwi mʼmbel ndo te ndo ngiɗè azɓai, tʼhwaɗ giɗfèk nzlembaɗ ngiɗè azɓai, man ta vi a ndohai, aman nga mbel nga.

¹³ Aman ta rka ara Pierre a Jean ta goɗ a zlau ka ɓai, ta rzl ta, aman ta suna, ta ndohi man ta sun ɗèlèwèr ɓai. Ta sen ta tengaʼa, aman pèc pècèk ta nza a nda Yèsu pats ngiɗè.

¹⁴ Aman ta rka ndo vedal man mʼmbela, nzlatsa a tsagi ta, ta sun skwi man ta gèɗè ɓai.

¹⁵ A ta hel ta auda a sam kita, a ta cèmma,

¹⁶ a ta gaɗa: Nga da ga ta ndohi haha kè? Aman ndohi te kokwar Jérusalem tèlèba ta sun nrkedi man ta gau, a nga slaha a nga gèɗè, nʼnga ar haha ɓi ɓai.

¹⁷ Aman sèi nga guv ta a vata, da da ngreda na nzlembaɗ haha a ndo ngiɗè asaɓai, man ɓai a zlèzlèmè a ma ma.

¹⁸ A ta baha ta, a ta fa ta ma a gèɗ, da nju ma a nzlembaɗ Yèsu asaɓai.

¹⁹ A Pierre a Jean ta gaɗa ta: Va-döl a ri kinè: Mʼmbela na ngwa: aman nga cè ma kinè ɗè, ɗè aman nga jèjèr ma Zhiklè ɗè?

²⁰ Nga slaha a nga jèkè ngèɗè azɓai a géɗ skwi man nga rkaʼa, a nga tsenaʼa.

²¹ A ta guv ta zaʼa, a ta pre ta. Ta ngatsa skwi man ta ga ta kita a géɗèʼa ɓai, aman ta gu zlau ndohai. Aman ndohi ta slubordo Zhiklè a géɗ skwi tèlèba man a gau.

²² Mvi ndo vedal man mʼmbela a nrkedi haha, a fena 40.

Ntsi ri ndohi Zhiklè

²³ Aman ta pre ta ma, ta shkè a sam ndohi ta, a ta ngreda ta ma tèlè, man ndohi mvi skwi a Zhiklè mbibihiaʼa, a ndohi nhalaʼa, ta gaɗa ta.

²⁴ Aman ta tsenaʼa, ta hüno a ta tsu rai, ara ndo staɗ: Bi Zhiklè nga, ka gu giɗfèk a herkeda, a iyam mbiaʼa, a skwi tèlèba man a zhè te pa.

²⁵ Ka goɗ te ma David, ɓèl ngaya: Ndohi herkeda ta gi ndav, a ndohi ta hér skwi ambalai èhèmè?

²⁶ Bihi herkeda, a wudahi bai ta ɓicko va, aman ta slambaɗa na va a Bi Zhiklè a Kristi nengaʼa.

²⁷ A vava, Hérode a Ponce Pilate, a ndohi herkeda tsaɗ tsaɗ, a ndohi Israel, ta vhe ma, a ta gu ndav a géɗ Yèsu, kra ngaya nkezlaʼa, man ka bada na mbar a gèɗ,

²⁸ a ta gu skwi man ri ngaya a woya a ngiaʼa a ka herda hai.

²⁹ Antanta, Bi Zhiklè, sèi ka rka ngüvè tengaʼa a ka takaha ta ɓèlèlihi ngaya, aman ta nje ma ngaya a zlau ka ɓai.

³⁰ Ged ri ngaya, aman ndohi ta mbel ta, a ta rka nrkedi a skwi man nʼngreda auda a nzlembaɗ Yèsu, ndo mizline ngaya nkezlaʼa.

³¹ Aman ta tsu ri arsa ma, samaʼa man ta ɓiceda va a pa, a gudzai, a ndav tengaʼa tèlèba nʼndha a Mèzhèɓ Zhiklè nkezlaʼa, a ta nju ma Zhiklè a zlau ka bai.

Ndohi Zhiklè ta vena skwi ta

³² Ndohi kumba, man ta co Yèsu a ndav, ta zhè a nhér gèɗ ta staɗ, ta mba ma ta; ndo ngiɗè azɓai, man a goɗ te skwi nengaʼa: skwi haha a ga, skwi haha a ga,

³³ aman skwi tèlèba a tengaʼa tèlèba. A ndohi sak ta gu mai wuɗi a wuɗi mbiaʼa te nslambaɗkaɗa Bi Yèsu auda te Mʼmetsai. Pombi mbiaʼa a zhè a sam ta tèlèba.

³⁴ Ndo azɓai te ndev tengaʼa man a ngatsa skwa ɓai. Aman ta tèlèba man ta ngots gi dau, man ɓai gihai, ta preda ma, a ta cko Suli skwi man ta preda ma,

³⁵ a ta pa ta ndohi sak, a tengaʼa ta kezla na ndo staɗ staɗ a ta dèl te skwi man ta tèkwènèʼa.

³⁶ Joseph, ndohi sak ta baha na a nshi-bèn na Barnabas (ara ngèɗè kra mbid ndo), te verzi Lévi, te kokwar Chypre,

³⁷ man a ngots dak, a mpreda ma, a ncko sulai, a mpa ta ndohi sak.