Actes 28 - Ma Zhiklè

Paul te Malte

¹ Aman nga mbel nga ma, nga tsenaʼa, herkeda nte ndev iyam matsa, nzlembaɗ na Malte.

² A ndohi ta ce nga amba a vata. Ta vatsa vogwa, a géɗ man iyam a gai, a mtasl a keɗ nga.

³ Aman Paul a mpor shègwa, a mpeda a vogwa, ntümsho a mshkè auda, aman vogwa a dza na, a mpaɗa na va a ri a Paul.

⁴ Aman ndohi ta rka zhüzhok a zhutera a ri Paül, ta goɗ a va ta: Ndo haha ndo nkeɗ ndo, ko a mbel na te va iyam mbiaʼa, Zhiklè a da jèka na nshèffè azɓai.

⁵ Aman Paul a nktsaɓda zhüzhok a va vogwa, a skwi ambaɓiaʼa a nʼnga na ɓai.

⁶ A tengahi ta zhoro, aman ri nengaʼa a da hézl na, a kèlèhai, a metsi na. Aman ta zhoro nʼnzi a zhè, ta rka skwi ambaɓiaʼa a ga na azɓai, ta hur tsaɗ, a ta gaɗa: Nengaʼa a zhiklè.

⁷ A samaʼa ndo mbiaʼa, nzlembaɗ na Publius, na a gi mbiaʼa, a mpe nga a gi a mbrok, a ndav amba, mʼmèn makar.

⁸ A bab Publius mʼmana tʼhai, vogwa a va, hwaɗ a hada. A Paul a mdo a sam na, a ntsu rai, a mfa na ri a gèɗ, a mbelaʼa.

⁹ Aman a gu arsa, ko ndohi ngiɗè a samaʼa te ndev iyam, man skwa a dza ta, ta shkè, a ta mbel ta te matakwan.

¹⁰ A ta nzal nga a vata. Aman ngo do a ma, ta va nga skwi tèlèba man nga tèkwènèʼa.

Paul a ndikè a kokwar Rome

¹¹ Te deɓ ki makar, nga jèkeda samaʼa te wurom Alexandrie, man a nza a sam nte ndev iyam a via, nzlembaɗ na Tsakalai.

¹² Aman nga ndika a kokwar Syracuse, nga nza a pa mʼmèn makar.

¹³ Aman nga tèuda a wurom, nga ndika a ma Reggio. Te deɓ mʼmèn staɗ, aman kozlar te dukwaɗ a nslambaɗa, nga ndika a Pouzzoles, te mangoslèmaʼa.

¹⁴ Te pa nga ngots kramamhai, a ta tsa nga rai, aman nga nzi a sam ta mʼmèn tsaraɗ.

¹⁵ Arsa nga ndika a kokwar Rome. Te pa, aman kramamhi ta tsena labar ma nga, ta shkè, aman ta zli gèɗ a nga, te kokwar Appius, a Trois-Tavernes. Aman Paul a rka ta, a nshüd gèɗ a Zhiklè, a mʼmana ndav na.

¹⁶ Aman nga ndika a kokwar Rome ma, Paul a nʼngots civèɗ, aman a nzi a géɗ na, ta a sojè man a ɓirèʼa.

Paul a nje ma Zhiklè te kokwar Rome

¹⁷ Te deɓ mʼmèn makar, Paul a mbaha ta ndohi mbibihiaʼa te ndev ndohi Juif teleba. Aman ta ɓica va, a ngaɗa ta: Kinè ndohai, kramamhi ga, ko i ga ta skwi a ndohi nga ɓai, a i gedassa skwi man bababhi nga ta gia ɓai, i shkè te kokwar Jé-rusalem, ndzawaʼa, a ta viyè a ri a ndohi Rome.

¹⁸ Tengahi man ta tsena ma ga, ta woy a ta priyè, te man ta ngatsa ma a sam ga ɓai, a géɗ nengaʼa man i da metsi ga.

¹⁹ Aman ndohi Juif ta woya ɓai, sèi i boho bi César. I baha ɓai, a géɗ man i pin ta ndohi kokwar ga.

²⁰ A géɗ nengaʼa i tsu rai, aman i rka kinè, a i gaɗa kinè. I zhè te cèlèlèu haha a géɗ skwi man Israel a zhèrèʼa,

²¹ A tengaʼa ta gaɗa na: Nga ngots ɗèlèwèr te kokwar Judée a géɗ ngaya ɓai, a kramam nga ngiɗè a mshkè ɓai, aman a ngreda nga skwi man ambaɓai a géɗ ngaya.

²² Aman nga woy a nga tsena ma man ka suna; nga sun skwi ngiɗè a géɗ civèɗ haha ɓai, sèi ara man ta gèɗe skwi ambaɓiaʼa a gèɗèʼa.

²³ Aman ta pasla ri a gèɗ pats staɗ, a ndohi kumba ta shkè a sam na, a gi man nte pa, nengaʼa a njè ta, a nʼngreda ta kokwar Bi Zhiklè, a nsenda ta ma Yèsu, a hüno te ma kita Zhiklè, a nda na ma a ndohi nhadka ma; a hüno a prèk te gai, ha ndè a ma vaɗ.

²⁴ Matrhiaʼa ta co ma nengaʼa, matrhiaʼa ta ca bai.

²⁵ Aman ndav tengaʼa ndzakaɓa, ta venda gèɗ, aman Paul a goɗ ma staɗ: Mèzhèɓ Zhiklè a ngaɗa ta bababhi kinè amba te ma Esaie, ndo nhadka ma, man a gaɗa:

²⁶ Do a sam ndohi haha, a ka gaɗa ta: Kin fi zlembaɗ, aman kin tsena ɓai, a kin pi dai, aman kin rka ɓai.

²⁷ Aman ndav ndohi haha nsassaya, a ta ndè zlembaɗ dislèʼa, a ta pizlè di ticèʼa, a géɗ man pats ngiɗè ta rka di asaɓai, a ta tsena zlembaɗ asaɓai, a ndav tengaʼa a sun asaɓai, a ta menkada deɓa ɓai aman i mbél ta.

²⁸ Anai i ngreda kinè, aman skwi mʼmbel ndo Zhiklè haha, ta zlündo a sam ndohi nte deɓa; a tengaʼa ta da cinèʼa.

²⁹ Te deɓ ngede Paul haha, a ndohi Juif a ta do ta, a ta versle a va ta.

³⁰ A Paul a nʼnza a pa mvi cèw, a nce ta ndohi tèlèba man ta shkè a sam na.

³¹ A njè ta ma kokwar Bi Zhiklè tèlèba, a mʼmenda ta ma Bi Yèsu Kristi a mwuffe, ndo a ngedassa civèɗ nengaʼa ɓai.