Actes 27 - Ma Zhiklè

Paul a dè a kokwar Rome a géɗ iyam

¹ A ta tsomma, aman nga dè a Italie a wurom, ta feda Paul a ndohi dangai ngiɗè kètè a ri bi sojè, nzlembaɗ na Julius, te ndev sojèhi mbibihiaʼa.

² Aman ngo do a wurom Adramytte, nga beza a tsagi Asie a gèɗ iyam, a nga jèkeda dzah. A Aristarque te Macédoine te Thessalonique a zhè a nda nga.

³ Te mangoslèmaʼa nga ndika a kokwar Sidon, a Julius a ngau amba a sam Paul, a mpraʼa, aman a dè a sam mandalahi nengaʼa, aman ta wara na dai.

⁴ Te pa nga jèkeda dzah, a nga beza a tsagi kokwar Chypre, a gèɗ iyam.

⁵ Aman kozlar a erɗe nga a deɓa, nga beza a tsagi kokwar Cilicie a Pamphylie, ngo do a géɗ iyam mbiàʼa, a nga shkè a ma kokwar Myra te Lycie.

⁶ Te pa bi sojè a nʼngots wurom te kokwar Alexandrie, man a dè a Italie a géɗ iyam, a ngo do a pa.

⁷ Aman nga wurr zhèhèɗ zhèhèɗèʼa, te deɓ mʼmèn kumba, nga ndika a kokwar Cnide, aman a wuɗai (kozlar a erɗka nga a deɓa),

⁸ a nga beza a tsagi Crête a sam Salmoné, a nga beza a tsagiaʼa a wuɗi a va, a nga ndika a sam ngiɗè, man ta baha na sam nhèyè wurom mbelaʼa, ndul ndul a ma kokwar Lasée.

⁹ Aman nga gu ndudoh a vata, ndè a wurom ba wuɗitpa, a pats njèkeda skwi nʼndi klèng ma, Paul a mbid ta, a ngaɗa ta:

¹⁰ Dalahimam ga, i rka, aman nga dè a wurom antanta a matakwan, a skwi a da zi kumba, kolongwi genè ka ɓai, aman ko wurom a nshèffè nga.

¹¹ Aman bi sojè a nco ma ndo nhèdè wurom, a bi wurom, a nkwola ma Paul.

¹² Aman sam nhèyè wurom ambaɓai aman ta nzi a pa a via, matrhiaʼa kumba ta woya a ta dè a ma, aman ta woya a ta ndikè a kokwar Phé-nix, a ta nzi a pa a via. Phénix sam nhèyè wurom Crête te civèɗ dukwaɗ, te civèɗ nkèl pats.

Ndombozlor a géɗ iyam mbiaʼa

¹³ A kozlar a ngu te civèɗ dukwaɗ, a ta hur skwi man ta woy a ta giaʼa, a gi amba, a ta slambaɗa, a ta herda na va a Crête.

¹⁴ Aman te deɓ kètè ndombozlor a nslambaɗa te civèɗ Euraquillon, man a ngedassa skwi man nga woya a nga giaʼa.

¹⁵ A ngso wurom, a nga slaha nga zlècè a sam kozlar ɓai, a nga jèkeda, a ngau gagang-gagang kata.

¹⁶ A nga shkè a sam herkeda te ndev iyam, man ta baha na Claude, te pa nga slaha nga gshè wurom nkèshèa sèi a wuɗai.

¹⁷ Nga co nengaʼa, a nga mana wurom a züdo, te man nga gu zlau, a da kèl na hai, a nga preda maslaka wurom a hai, a ngo do a géɗ iyam arsa.

¹⁸ Aman ndombozlor a ngu a vata, te mangoslèmaʼa nga wusheda skwi a va iyam.

¹⁹ Te mʼmèn mamakaraʼa nga wusheda kolongwi wurom a va iyam.

²⁰ Aman mʼmèn kumba ko pats ko bantai a rkè azɓai, a ndombozlor mbiaʼa a erɗe nga, ha nga hur a nga gaɗa nga da nzi a nshèffè ɓai.

²¹ Aman nʼnzi a zhè ta nda skwi ɓai, Paul a nzlatsa te ndev tengaʼa, a ngaɗa: Dalahimam ga, a matsa mʼmbela man ta dzodzor ma ga, a ta jèkeda Crête ɓai, matakwan a skwi ngedassa nga haha ar nʼnga nga ɓai.

²² Anai i bid kinè, aman kin mana ndav kinè, ko nshèffè staɗ te ndev nga a da zi azɓai, sèi wurom genè.

²³ Aman a vaɗ haha gol Zhiklè, man iyè a nengaʼa, a i gi mizlinè nengaʼa, nzlatsa a tsagi ga,

²⁴ a ngaɗa: Paul, ka gu zlau ɓai, sèi ta da zlatsede ka a sam César. Na haha, Zhiklè a mva ka ndohi tèlèba man ta zhè te wurom a nda ka, a ri a ka.

²⁵ Gar haha, dalahimam ga, kin gu zlau ɓai. Aman i co ma Zhiklè a ndav, aman a gi tèlèba, ara man a gaɗayè.

²⁶ Aman sèi nga dè a herkeda te ndev iyam.

²⁷ Aman te mʼmèn 14, nga zhè a géɗ iyam mbiaʼa Adria, a géɗ vaɗ, ndohi wurom ta huro ta ndikè a ma herkeda.

²⁸ A ta wusheda ndeval a iyam, a gi drav te pa, zur pandar 20. Te deɓ kètè ta wusheda a pa zaʼa, a ta ngots zur pandar 15.

²⁹ A ta gu zlau, gèɗ wurom a kèlè a sam nsassayaʼa, a ta wusheda jir wurom faɗ te verzi wurom, a ta huro, mʼmbela sam da ciɗa nga dai.

³⁰ Aman ndohi wurom ta woy a ta hi ta auda te wurom, a ta da wurom nkèshèa a va iyam, a ta gaɗa ta woy a ta wusheda jir wurom a ma wurom,

³¹ Paul a ngaɗa ta bi sojè a sojèhai: Aman ndohi haha ta nzi a wurom azɓai, kin slaha a kin nzi a nshèffè azɓai.

³² A sojèhi ta ratsa teɓa te wurom, a ta praʼa.

³³ Aman pats guduzluzlaʼa, Paul a ngaɗa ta tèlèba, aman ta ndi skwi nʼndai, a ngaɗa: A patsna mʼmèn 14, aman kin zhèrèʼa, a kin nda skwa ɓai.

³⁴ Anai i bid kinè mua, aman kin ndi skwi nʼndai, a wuɗai kinè; aman ko gwots gèɗ kinè staɗ a da kèlè azɓai.

³⁵ Aman a goɗ ma haha, a nco movar, a nshüd gèɗ a Zhiklè, a sam di tengahi tèlèba, a ntsakaʼa, a hüno a ndiaʼa.

³⁶ A ta tèlèba ta mana ndav ta, a ta gu langlangaʼa, a ta ndau skwi nʼndai.

³⁷ Nga tèlèba man nga zhè te wurom, ndohi 276.

³⁸ Aman ta ngeza ma, ta co skwi man a njèl te wurom auda, a ta wusheda dau a va iyam mbiaʼa.

Wurom a gedas na

³⁹ Aman sam nciɗa ta ma, ta sun herkeda ɓai, aman ta rka sam nhèyè wurom a dzah, ta woy a ta wurr wurom a pa.

⁴⁰ A ta hulkoɗi jir wurom, a ta jèkeda te va iyam mbiaʼa, ta pra teɓa skwi nwurr wurom, a ta ngwode maslaka wurom aman a civèɗ kozlar, a ta woy a ta dè a dzah.

⁴¹ Aman nga zhè a sam man iyam mbiaʼa a hi a civèɗ cèw cèw, wurom a nkol gèɗ a vna, a verzi wurom a ngedas na a wuɗi iyam.

⁴² A sojèhi ta woy a ta bazl ta ndohi dangai, aman ta slaha a ta tsi madandav a ta wuc ta ɓai.

⁴³ Aman bi sojè a woyaa mɓir Paul, a ngedassa skwi man ta woy a ta giaʼa, a ngaɗa ta ndohi man ta sun ntsi madandav nshèlèkuraʼa, aman ta dè a va iyam, a ta dè a dzah.

⁴⁴ A ndohi ngiɗè, matrhiaʼa a géɗ kaf, matrhiaʼa a géɗ njèkèɗi wurom. A gu arsa, aman ta tèlèba ta ndikè auda a herkeda, a ta mbel ta.