Actes 26 - Ma Zhiklè

Paul a tsoko géɗ na auda a ri na a sam Agrippe

¹ Agrippe a ngaɗa na Paul: I va ka civeɗ, aman ka njè ma ngaya. A Paul a mpelaha rai, a nju ma na:

² Ambahayè kumba, bi Agrippe, aman a patsna i slaha a i tsoko gèɗ ga auda a sam ngaya, a géɗ skwi tèlèba man ndohi Juif ta pinyè.

³ Ambahayè holholaʼa, a géɗ man ka sun maya nshèffè ndohi Juif tèlèba. Gar haha i tsa ka rai, fu zlembaɗ a skwi man i gèɗèʼa!

⁴ Nshèffè ga, daga ngakaɗ ga, te gol ga, te va ndohi ga, te kokwar Jérusalem ba, ndohi Juif tèlèba ta suna. Tengaʼa ta se-nyè nʼnzi a zhè, aman ta woy a ta ngréɗèʼa.

⁵ Aman halaʼa i ndo pharisie, njèngè mwuɗitpa holholaʼa te va gi njèn-gè ma Zhiklè nga tèlèba.

⁶ Anai i zlatsa, a ta pinyè a géɗ skwi man Zhiklè a pasla ta ri a bababhi nga a géɗèʼa, man ta zhèrèʼa,

⁷ nengaʼa man verzihi nga 12 ta zhèrèʼa, a ta tsi ri a Zhiklè a maya maya pèc pècèk, a pats a vaɗ. A géɗ skwi man nga zhèrè haha, ndohi Juif ta pinyè, bi Agrippe.

⁸ Nslambaɗkaɗauda te mʼmetsai, kin hur ma ncèkèlma, èhèmè?

⁹ I ba i huro, sèi i gi mayam a nzlembaɗ Yèsu ndo Nazareth;

¹⁰ a i gau arsa te kokwar Jérusalem. Te pa i gs ta ndohi Zhiklè kumba, a i pe ta a dangai. Ndohi mvi skwi a Zhiklè mbibihiaʼa ta vay wuɗi-bi arsa a rai. Aman ta ngela ta kita mʼmetsi a gèɗ, i takaha ta a ngi kita ta.

¹¹ Te gi njèngè ma Zhiklè tèlèba, i ga ta matakwan kumba. I fa ta gèɗ a wuɗai, i woya man ta dérɗè Zhiklè, a i dzar ta, a i gu shèwa holholea, a ta hu a kokwar ngiɗè, man ta sun ɓai.

Paul a ngreda ara man a nco Yèsu a ndav (Actes 9,1-19; 22,6-16)

¹² A géɗ nengaʼa i do a kokwar Damas, a ma a wuɗi-bai te rai, man ndohi mvi skwi a Zhiklè mbibihiaʼa ta vayè.

¹³ A i rka skwi nhel sam a civèɗ, a géɗ pats, bi ga, man a su dai, a fena pats, a nhela nga sam a iyè a ndohi man to do a nda iyè.

¹⁴ Aman nga tèlèba nga kalahai, a i tsena ngèɗè staɗ a sam ga, man a gaɗa a ma aramèe: Saul, Saul, ka parahayè èhèmè? A gi wuɗitpa aman ka tsa na ma skwi ntez ka a deɓa.

¹⁵ A i mbeɗa na a ma: Bi Zhiklè, ka wa? A nengaʼa a ngaɗa: Iyè, nengaʼa man ka parahayè. Aman slambaɗa, zlatsa!

¹⁶ Aman i gudko ka va a dai, aman i ge ka a ndo mizlinè ga, a ndo malwuɗi skwi tèlè man ka rkaʼa, skwi man i da ngra ka.

¹⁷ A i woya man i ɓer ka te ri ndohi haha, te ri ndohi nte deɓa, a sam tengaʼa man i da zlinde ka.

¹⁸ A ka winè di tengaʼa, aman ta menkada deɓa te ruva a sam skwi nhel sam, te wuɗi-bi madzagai a sam Bi Zhiklè, aman ta ngècè mprè mali tengaʼa, a skwi nʼndi gai a nda tengahi tèlèba, man Zhiklè a kezla ta te ncè Zhiklè a ndav.

Ma malwuɗi Paul a sam ndohi Juif, a sam ndohi nte deɓa

¹⁹ Anai, bi Agrippe, i Sala va ɓai a sam skwi man a gudkoy va a dai te zhiklè.

²⁰ A i ngreda nshèlèkuraʼa te kokwar Damas, te kokwar Jérusalem, te Judée tèlèba, a sam ndohi nte deɓa, aman ta ngwèdè ndav, a ta menkada deɓa a sam Zhiklè, a ta ngrédèʼa auda ara man ta ngwoda ndav ta, a skwi man ta giaʼa zuraʼa.

²¹ A géɗ nengaʼa ndohi Juif ta gsyè te gi Zhiklè, a ta woy a ta keɗyè.

²² Aman Zhiklè a ntakahayè, a i slaha a i zlècè, ha ndika na ma a mpatsna, a i gi malwudai a sam ndohi nkèshèa, a sam ndohi mbibihiaʼa cèw ba, a i gèɗè ma ngiɗè azɓai, sèi ma ndohi nhadka ma a ma Moise:

²³ ara man sèi skwa a dza na Kristi, a nengaʼa a gi a ndo nshèlèkuraʼa te ndev ndohi mʼmetsaʼa man ta slambaɗkaɗauda te mʼmetsai, a ngreda ta skwi nhél sam a ndohi nte deɓa.

Paul a tsi ri a Agrippe, aman a ce Yèsu a ndav

²⁴ Aman a tsoko gèɗ na auda arsa, Festus a ngaɗa na a wuɗai: Paul, gèɗ ngaya nza! Skwi kumba man ka suna, a nzedama ka maya!

²⁵ A nengaʼa a ngaɗa: Festus ga man amba, gèɗ ga nze ɓai, aman i goâ ma nzuraʼa, a ma maya.

²⁶ Bai a sun skwi haha amba. A nengaʼa i gaɗa na ma haha a mwuffè I huro, ka sun skwi haha tèlèba, te man skwi haha a gu a sam nʼnghedaʼa ka ɓai.

²⁷ Bi Agrippe, ka co ma ndohi nhadka ma a ndav ngaya ɗè? I suna, ka co a ndav ngaya.

²⁸ Bi Agrippe a ngaɗa na Paul: Njèkè kètè, ma ngaya a dè a ndav ga, a i gi a ndo Kristi.

²⁹ A Paul a ngaɗa: I woya a sam Bi Zhiklè, ko njèkè kètè, ko njèkè a vata, aman ka staɗgenè ka ɓai, aman ndohi tèlèba man ta tsena ma ga a patsna, ta ndi a ndo ara ga, sèi a woy cèlèlèu a te ri ɓi genè.

³⁰ Aman a goɗ ma haha, bai a nslambaɗa, a ngomna, a Bernice, a ndohi man ta nza a nda tengaʼa, a to do auda, a ta tsu mbrok, a ta gaɗa:

³¹ Ndo haha nʼnga skwa ɓai, aman ta kéɗèʼa a géɗèʼa, a ta dzawaʼa.

³² Agrippe a ngaɗa na Festus: Ndo haha ar ta pra ma, aman agassa da boho César ɓai.