Actes 25 - Ma Zhiklè

Paul a jhèɗè Bi César

¹ Aman Festus a mshke a kokwar, te deɓ mʼmèn makar a njèkeda kokwar Césarée, aman a dè Jérusalem.

² Te pa, ndohi mvi skwi a Zhiklè, a ndohi Juif mbibihiaʼa, ta shke a sam na a géɗ Paul,

³ a ta jhèɗèʼa, aman a cko Paul a kokwar Jérusalem, a ta woy a ta jénjèrèʼa te pa, aman ta kéɗèʼa a civèɗ.

⁴ A Festus a mʼmbeɗa ta a ma: I ɓer Paul te kokwar Césarée.

⁵ I da minè a deɓa a pa te deɓ kètè: ndohi te ndev kinè man ta slaha, ta dè a nda iye, a ta pinèʼa, man ma a zhè a géɗ nengaʼa.

⁶ Aman a nza a sam tengaʼa, a gi mʼmèn kula gene, a ndo a deɓa a kokwar Césarée. Te mangoslèmaʼa a nʼnza a sam nʼnzi kita, a ngoɗo aman ta cko Paul.

⁷ Aman Paul a mshkè ma, ndohi Juif man ta shke te kokwar Jérusalem, ta tèuda a pa, a ta hüno a ta pinèʼa a ma kumba mwuɗitpa, aman ta slaha ta ngrédèʼa a malwuɗi ɓai.

⁸ A Paul a ntsoko gèɗ na auda: I ga mali a sam ma kita Juif ɓai, i ga malai a sam gi Zhiklè, a bi César ɓai.

⁹ A Festus a woya a ngi skwi man ambaha ta ndohi Juif, a mʼmbeɗa na ma a Paul: Ka woy a ka dè a kokwar Jérusalem, aman i ga ka kita ngaya te pa dè?

¹⁰ Paul a ngaɗa: I zlatsa a sam kita César haha, sèi ta gay kita a haha; i ga ta matakwan a ndohi Juif ɓai, ara man ka ba, ka suna.

¹¹ Aman i gu malai aman a ta kéɗyè a géɗèʼa, i da mets ga mènè. Aman skwi man ta pinyè a géɗèʼa azɓai, ko ndo staɗ a slaha a nfiyè a ri tengaʼa ɓai. Sèi i bèhè bi César.

¹² A Festus a goɗ ma a nda ndohi kita, a mʼmbeɗa na a ma: Ka bèhè bi César, sèi ka dè a sam César mènè!

Ta cko Paul a sam Agrippe a Bernice

¹³ Te deɓ mʼmèn kètè, bi Agrippe a Bernice ta shkè a kokwar Césarée, aman ta ga na mbalai a Festus.

¹⁴ Aman mʼmèn kumba ta nza a pa, Festus a nʼngreda na ma Paul a bai, a ngaɗa:

¹⁵ Félix a njèkeda ndo ngiɗè a dangai, a géɗ nengaʼa ndohi mvi skwi a Zhiklè a ndohi nhalaʼa te ndev ndohi Juif ta shkè a sam ga, te va man i zhè te kokwar Jérusalem, a ta tsay rai, aman i ga na kita.

¹⁶ A i gaɗa ta: ndohi Rome ta gi arsa azɓai; ta gshè ndo a ta kéɗèʼa azɓai, sèi man ndohi mpinèʼa ta zhè, man a nju ma na auda dai.

¹⁷ Aman ta shkè, i ga ndudoh ɓai, a i gu kita te mangoslèmaʼa, a i baha na ndoʼa.

¹⁸ Aman ndohi mpinèʼa ta zlatsa, a i rka ara man ta slaha ta ngrédè ma tengaʼa a malwuɗi ɓai.

¹⁹ Aman ta ngots ma ngiɗè kètè a géɗ nengaʼa, a géɗ civèɗ ma Zhiklè tengaʼa, a géɗ Yèsu ngiɗè man a mets na, te nengaʼa Paul a gaɗa, a vava a zhè a nshèffè.

²⁰ Aman i sun ma haha ɓai, i dzhoɗo man a woya a ndè a kokwar Jérusalem, a ta gi kita nengaʼa te pa.

²¹ Aman Paul a gaɗa, aman ta ɓirèʼa, ha César a ga na kita. A i gaɗa, aman ta ɓirèʼa, ha pats man i zlindèʼa a sam César.

²² Agrippe a ngaɗa na Festus: I woya man i tsena ma ndo haha. A nengaʼa a ngaɗa: Angoslèm ka da cinèʼa.

²³ Te mangoslèmaʼa, aman Agrippe a Bernice ta shkè, a golahi a verzia kumba, ara te ngolala, to do a gi kita a bihi sojè, a ndohi mbibihiaʼa te kokwar, a Festus a ngaɗa, aman ta cko Paul.

²⁴ A Festus a ngaɗa: Bi Agrippe ga, a ndohi tèlèba, man kin ɓica va a haha, kin rka ndo haha, a géɗ nengaʼa nhèyè ndohi Juif ta tsay rai te kokwar Jérusalem ba, te kokwar haha ba, a ta goɗ a wuɗai, da nza a nshèffè ɓai.

²⁵ Aman iyè, aman i tsenaʼa, nʼnga skwa ɓai, aman ta slaha ta kéɗèʼa a géɗèʼa, a nengaʼa a bèhè bi Cè-sar, i huro, i zlindèʼa.

²⁶ Aman i ngots ma man i windè a ɗèlèwèr a bi César a géɗ nengaʼa zura ɓai. Anai i ckoɗa a sam di kinè, nshèlèkuraʼa a sam di ngaya, bi Agrippe, aman te deɓaʼa aman nga dzhoɗo, i ngots ma man i windèʼa.

²⁷ Aman i hur ambaɓai, aman i zlindè ndo dangai, a i ngatsa ma a géɗ nengaʼa ɓai.