Actes 24 - Ma Zhiklè

Ma man ta pin Paul a géɗèʼa

¹ Te deɓ mʼmèn zlam, Ananias, bi ndohi mvi skwi a Zhiklè, a ndohi nhalaʼa, a Tertulle, ndo ngèɗ ma, ta shkèhai, a ta zlatsa a sam ngomna, aman ta pin Paul.

² Aman ta baha na Paul, Tertulle a hüno man a pin Paul, a ngaɗa: Félix man amba! Nga nza a gumai a sam ngaya, a géɗ man ka gu skwi man amba kumba a sam ndohi kokwar haha,

³ a ka tila kokwar haha a mizlinè ngaya, a nga shid gèɗ a vna pèc pècèk.

⁴ Nga vakeda ka a hi azɓai, a nga tsi ri a ka, aman ka tsena ma nga kètè.

⁵ Nga ngots ndo haha, a gedassa kokwar, a gi nrubai te ndev ndohi Juif, a gèɗ herkeda tèlèba; ndo ncè ta ma ndohi te gi njèngè Nazarée,

⁶ a woya a nlizhè gi Zhiklè ba, a nga gso. [Nga woy a nga na kita ara ma kita nga,

⁷ aman, Lysias, bi soje, a nsheke, a nguzlko nga awda te rai.]

⁸ Ka slaha ka shindè skwi haha tèlèba a sam nengaʼa, a géɗ mè nga pinèʼa, aman ka woyaʼa.

⁹ A ndohi Juif ba ta da na va, a ta gaɗa: Narsa gokwèn!

Paul a tsoko gèɗ na auda a sam Félix

¹⁰ Aman ngomna a ngeda na ri a Paul, man a gèɗè, a Paul a mʼmbeɗa na a ma: I suna, ka ndo kita ndohi haha mvi kumba, a i woy man i tsoko gèɗ ga auda a mwuffe.

¹¹ Ka slaha ka shinèʼa a ri ngaya. A fena mʼmèn 12 azɓai, a i do a kokwar Jérusalem, aman i tsi rai.

¹² Ta ngatsyè te gi Zhiklè ɓai, a i tsa tsaval a ndo ɓai, i ruba te ndev ndohi ɓai, ko te gi njèngè ma Zhiklè, ko te kokwar.

¹³ A ta slaha ta ngreda ma tengaʼa man ta pinyè a géɗèʼa, a malwuɗi ɓai.

¹⁴ Aman i ngreda a sam ngaya, i gi mizlinè Zhiklè babhi nga arsa a civèɗ Zhiklè mɓuaʼa haha (man ta baha na njèngè Zhiklè tsaɗ), a i co ma tèlèba a ndav ga, man ta Windo te ɗèlèwèr ma kita Zhiklè a ndohi nhadka ma,

¹⁵ a i zhèr skwi te ndav te ri Zhiklè, lèmèlèmè ara tengaʼa; aman ndohi mʼmetsaʼa a di ta slambaɗkaɗauda, ndohi nzuraʼa a ndohi malihi cèw ba.

¹⁶ Te deɓaʼa i ba i shindè aman mèzhèɓ ndav ga amba pèc pècèk a sam Zhiklè, a sam ndohai.

¹⁷ Aman te deɓ mvi kumba i shkè, a i cèkè skwi a ndohi ga, a i va na skwi a Zhiklè.

¹⁸ A ta ngatsyè a pa, aman i til ndav ga te gi Zhiklè, a nhèzlèwè ka ɓai, a nrubi ka ɓai.

¹⁹ Ndohi Juif ngiɗè kètè ta zhè te kokwar Asie, a woy tengaʼa ta zhè a sam ngaya haha, a ta pinyè, aman ta ngots ma a géɗ ga.

²⁰ Aman anai ta azɓai, sèi ka jhèdè a sam tengaʼa haha, aman ta ngots skwi man ambaɓai a sam ga.

²¹ Wa ngiɗè ba ta diyè a sam ncèmma sèi a géɗ man i gaɗa ta: nslambaɗkaɗauda te mʼmetsi a zhè.

Ta gseda Paul a hai a sam kita

²² Aman Felix a ntsena ma haha, a njè-keda kita a pats nasa, te man a sun civèɗ Zhiklè haha amba, a ngaɗa: Aman Lysias, bi sojè, a shkè, i woy a i tsena ma kinè.

²³ A ngaɗa na bi sojè, aman a ɓir Paul, da nza a gumai, da gedassa civèɗ ndohi nengaʼa ɓai, aman ta takaha a ta shkè a sam na.

²⁴ Te deɓ mʼmèn kètè Félix a mshkè a Drusille, ngwoz na, dem Juif, a ndzhoɗo Paul, a woya man a tsena ma ncè Kristi a ndav.

²⁵ Aman Paul a goɗ a géɗ ngi-zuraʼa, a géɗ ngshè va, a géɗ kita man a di a shke, Félix a ngu zlau, a ngaɗa: Ka slaha ka de ngaya antanta; aman i da ngots riaʼa, i da baha ka a sam ga.

²⁶ A nhuro, ar Paul a va na sulai, aman a mpraʼa; gar haha a mbaha na pats ngiɗè pats ngiɗè kumba, a ta goɗ a vna.

²⁷ Te deɓ mvi cèw, ta menda Porcius Festus a sam nʼnzi bi Félix. A Félix a woya man a gi skwi man ambaha ta ndohi Juif, a njèkeda Paul a dangai.