Actes 23 - Ma Zhiklè

¹ A Paul a mpa ta dai a ndohi ncemma, a ngaɗa: Kinè, dalahimam ga, mèzhèɓ ndav ga amba a sam di Zhiklè, ha mshke na mpatsna.

² A Ananias, bi ndohi mvì skwi a Zhiklè, a ngaɗa ta ndohi man ta zlatsa a pa, aman ta tsama na ma.

³ A Paul a ngaɗa na: Zhiklè a da tse ka, ka ndo ngwèdè ndo! Ka nzi a haha, aman ka gi kita ga ara man ma kita Zhiklè a gaɗa; aman ka gaɗa ta, aman ta tsiyè, ara man ma kita Zhiklè a ngreda bai.

⁴ A ndohi man ta zlatsa a pa, ta gaɗa: Ka dérɗè bi ndohi mvi skwi a Zhiklè dè?

⁵ A Paul a ngaɗa: Dalahimam ga, i sun a i gaɗa nengaʼa bi ndohi mvi skwi a Zhiklè bai. Aman ɗèlèwèr Zhiklè a gaɗa: Ka durɗo bi ndohi ngaya ɓai!

⁶ Aman Paul a suna, matrhiaʼa ndohi sadducée, matrhiaʼa ndohi pharisie, a ngaɗa ta ndohi ncèmma: Kinè ndohai, dalahimam ga, i ndo pharisie, kra ndo pharisie, a ta pinyè a géɗ nslambaɗkaɗauda te mʼmetsai man nga zhèrèʼa.

⁷ Aman a goɗ ma haha, ndohi pharisie a ndohi sadducée ta rubai, a nhèyè ndo nkezl na.

⁸ Aman ndohi sadducée ta gaɗa: nslambaɗkaɗauda, ko golahi Zhiklè, ko mèzhèɓ nʼazɓai. A ndohi pharisie ta gaɗa: tèlè a zhè.

⁹ A ta hèzlèwè kumba, a malamhai a ndohi pharisie matskata ta slambaɗa, ta bozl va, a ta gaɗa: Nga ngatsa skwi ambaɓiaʼa te ndo haha ɓai. Gar mèzhèɓ, gar gol Zhiklè a ngaɗa na.

¹⁰ Aman ta rubi kumba, bi sojè mbiaʼa a ngu zlau, ta da phoʼa Paul, a ngaɗa ta sojèhi man ta dè a pa, a ta ngézlè te ri ta, a ta daʼa a gi bai.

¹¹ Te mangoslèmaʼa, a vaɗ. Bi Zhiklè a nzlatsa a sam na a ngaɗa: Paul, mana ndav ngaya kangaʼa; lèmèlèmè ara man ka gu malwuɗi ga te kokwar Jérusalem, ka da gi malwuɗi te kokwar Rome ba.

Nvhè ma a géɗ Paul

¹² Aman sam nciɗa ta, ndohi Juif ngiɗè kètè ta humda ma ta, a ta goɗ a mʼmbèɗè a va ta, aman ta ndi skwi azɓai, a ta si skwi azbai, sèi man ta keɗa Paul.

¹³ Aman tengahi man ta vhe ma a gèɗ Paul a mʼmbèɗè arsa, a fena kulkul faɗ.

¹⁴ A to do a sam ndohi mvi skwi a Zhiklè mbibihiaʼa, a sam ndohi nhalaʼa, a ta gaɗa: Nga goɗ a mʼmbèɗè a va nga, aman nga ndi skwi azɓai, sei nga keɗa Paul.

¹⁵ Anai sèi kin ngreda na bi sojè, a ndohi ncèmma, aman angoslèm ta daʼa a sam kinè, ara man kin woy a kin cinè ma nengaʼa mbelambela. Aman nga zhè, nga kéɗèʼa, ga a ndikè a sam kinè.

¹⁶ A kra demam Paul a ntsena ma mʼmbèɗè tengaʼa, a mdo, a mshkè a gi bai, a nʼngreda na Paul.

¹⁷ A Paul a mbaha na ndo bi sojè, a ngaɗa na: Ka da ndo haha a sam bi sojè mbiaʼa, aman a gaɗa na ma na.

¹⁸ A nengaʼa a mco, a ndaʼa a sam bi sojè mbiaʼa, a ngaɗa: Paul, ndo dangai, a mbahayè a sam na, a ntsu rai, aman i da ndo haha a sam ngaya, aman a gaɗa ka ma na.

¹⁹ A bi sojè mbiaʼa a ngso te rai, a to do ta a sam ngiɗè a géɗ ta, a ndzhoɗo: Ma mè, man ka woy a ka gaɗayè?

²⁰ A nengaʼa a ngaɗa: Ndohi Juif ta humda ma ta, aman ta tsa ka rai, aman angoslèm ka da Paul a sam ncèmma, ara man ta woy a ta cinè ma nengaʼa mbelambela.

²¹ Aman sèi ka pi gèɗ cèw, aman ndohi a fena kulkul faɗ ta pi vaʼa, aman ta goɗ ma a mʼmbèɗè, ta ndi skwi azɓai, ta si skwi azɓai, sèi man ta keɗa Paul, ta zhè, a ta zhèr ma ngaya.

²² A bi sojè mbiaʼa a mpraʼa, a mfa na ma a gèɗ a ndo sa, aman a ngreda na ndo ngiɗè ɓai, aman a menda na ma haha.

Ta zlündo Paul a sam Félix

²³ A mbaha ta sojèhi cèw, a ngaɗa: Va-tül sojèhi tèmèrè cèw, aman a ta dè a kokwar Césarée, a ndohi plèsh kulkul tsaraɗ, a ndohi gwondari tèmèrè cèw.

²⁴ A prèk vaɗ, va-mana plèsh, aman ta nzeda Paul a pa, a ta daʼa a sam Félix, ngomna, a ta ɓirèʼa a civèɗ.

²⁵ A mwindo ɗèlèwèr arsa:

²⁶ Claude Lysias a sam Félix, ngomna nlèɓèslèa, Mbalai!

²⁷ Ndo haha ndohi Juif ta gso, a ta woy a ta keɗaʼa. A nga shkè a sam ta a ndohi sojè, a nga nguzlo te ri ta, a i tsenaʼa, nengaʼa ndo Rome.

²⁸ Aman i woy a i jhèɗèʼa, a géɗ mè man ta pinèʼa, a i daʼa a sam ncèmma tengaʼa.

²⁹ A i tsenaʼa, ta pinèʼa a géɗ ma tsaɗ tsaɗ te ma kita Zhiklè tengaʼa. Aman ta ngatsa ma ngiɗè ɓai, aman ta kéɗèʼa, aman ta dzawaʼa.

³⁰ Aman ta mendayè, aman ndohi Juif ngiɗè kètè ta pi vaʼa, i zlündo a sam ngaya tsam tsam, a i gaɗa ta ndohi mpinèʼa ha, aman ta gaɗa ka ma man a zhè te ndav ta a géɗ nengaʼa. Mbali ngaya di mènè!

³¹ A sojèhi ta co Paul, a ta daʼa a vaɗ a ma kokwar Antipatris, ara man ta gaɗa ta.

³² Te mangoslèmaʼa ta zlinde ndohi plèsh, man ta dè a ma ma a vna, a ndohi sak ta menkada deɓa a gi bai.

³³ Aman ta shkè a ma kokwar Césarée, a ta va na ɗèlèwèr a ngomna, a ta Zlatseda Paul a sam na.

³⁴ Aman gomna a njongo âèlèwèr, a ndzhoɗo kokwar man a shkè te pa. Aman a ntsenaʼa, nengaʼa a shkè te kokwar Cilicie, a ngaɗa:

³⁵ I woy a i gi kita ngaya, aman sèi ndohi mpin ka ba ta zhè. A ngaɗa, aman ta ɓirèʼa te gi Hérode.