Actes 22 - Ma Zhiklè

¹ Kinè dalahimam ga, a bababhi ga, va-tsena ma ga a sam kinè, man i tsoko gèɗ ga auda a vna.

² Aman ta tsenaʼa, a ngaɗa ta a ma aramée, ta nza tètè holholaʼa. A nengaʼa a ngaɗa:

³ I ndo Juif, ta yiyè te kokwar Tarse te Cilicie, i gra a kokwar sa, a sam Gamaliel, a ta njèy te ma kita bababhi nga zuraʼa. I gu mizlinè a vata a gèɗ Zhiklè, lèmèlèmè ara kinè a patsna.

⁴ I paraha civèɗ Zhiklè haha, ha i woy a zeda i. I dzaw ta, ngurhi a ngwozi i pe ta a gi dangai;

⁵ bi ndohi mvi skwi a Zhiklè, a ndohi nhalaʼa tèlèba ta ndohi malwuɗihi te skwi sa. I co ɗèlèwèr te ri tengaʼa, aman ta Windo a sam kramamhai, a i do a civèɗ Damas. I woya a i dzaw ta te pa, a i de ta a kokwar Jérusalem, aman ta gi kita tengaʼa.

Paul a ngreda, ara man a nco Yèsu a ndav (Actes 9,1-19; 26,12-18)

⁶ Aman i do, a i zhè ndul ndul a Damas, a gèɗ pats, a nasa nasa skwi nhel sam mbiaʼa a mshkè te zhiklè.

⁷ A i kalahai, a i tsena ngèɗè staɗ man a gaɗayè: Saul, Saul, ka parahayè èhèmè?

⁸ A i gaɗa: Bi Zhiklè, ka wa? A nengaʼa a ngaɗayè: I Yèsu ndo Nazareth, nengaʼa man ka parahayè.

⁹ Ndohi man ta zhè a sam ga, ta rka skwi nhèl sam; aman ngèɗè nengaʼa man a gaɗayè, ta tsena ɓai.

¹⁰ A i gaɗa: Bi Zhiklè, i gi mè? A Bi Zhiklè a ngaɗayè: Slambaɗa, a ko do a kokwar Damas, te pa ta da gaɗa ka skwi tèlèba man ka da giaʼa.

¹¹ A gèɗ skwi nhél sam i rka di ɓai. Ndohi man ta zhè a sam ga, ta gsyè te rai, a i ndikè a kokwar Damas.

¹² Ndo ngiɗè a zhè te pa, man a gi zlau Zhiklè, ara ma kita Zhiklè a ngra nga, nzlembaɗ na Ananias; labar ma nengaʼa amba a sam ndohi Juif tèlèba man ta nza te pa.

¹³ Nengaʼa a mshkè a sam ga, a ngaɗayè: Saul, kramam ga, pakay dai! A i pa na dai, a nasa nasa i rka dai.

¹⁴ A nengaʼa a ngaɗa: Zhiklè babhi nga a fe ka a hai, aman ka shin skwi man nengaʼa a woyaʼa, a ka rka Zhiklè zuraʼa, a ka tsena ngèɗè te ma na, aman

¹⁵ ka gi a ndo malwuɗi na a sam ndohi tèlèba, te skwi man ka rkaʼa a ka tsenaʼa.

¹⁶ Anai ka zhèr mè? Slambaɗa, a ka gu baptême, gu aman malihi ngaya ta pana, a ka tsu ri a nzlembaɗ Yèsu.

Zhiklè a baha na Paul a sam ndohi nte deɓa

¹⁷ Te deɓaʼa man i shkè a deɓa a kokwar Jérusalem, a i tsu ri te gi Zhiklè, a Zhiklè a nrkay a dai.

¹⁸ A nengaʼa a ngaɗayè: Vassa va, jèkeda kokwar Jérusalem tsam tsam, aman ta cè malwuɗi ngaya man ka gèɗèʼa a géɗ ga azɓai.

¹⁹ Aman i gaɗa: Bai, ta sun a ri ta, aman i pe ta ndohi tèlèba man ta co a ndav, a gi dangai, a i ndah ta a mènèwèɗ te gi njèngè ma Zhiklè a sam tsaɗ tsaɗ.

²⁰ Aman ta keɗa Etienne, i zlatsa a pa, mʼmetsi nengaʼa ambahayè.

²¹ Iyè a mɓüro maslaka ndohi man ta keɗaʼa. A nengaʼa a ngaɗayè: Do, aman i woy a i zlinde ka dra, a sam ndohi nte deɓa.

Paul a herda kita a ma ma

²² A ta fu zlembaɗ, ha a ngoɗ ma haha, a ta hüno ngèɗè: Sèi ta keɗa ndo arsa, ambaɓai man a nzi a nshèffè!

²³ Aman ta hèzlèwè, ta wusheda maslaka tengaʼa, a ta tsu lokotor,

²⁴ Bi sojè a ngaɗa, aman ta daʼa a gi bai aman ta ndèhaʼa a mènèwèd a ta jkedèʼa, aman a shinèʼa, a géɗ mè man ta hèzlèwè arsa.

²⁵ Aman ta dzawa a teɓa, Paul a ngaɗa na a slaslam bi sojè: Ta slaha a ta ndèhè ndo Rome a mènèwèd, ambalai, man ta ga kita nengaʼa di ɓi dè?

²⁶ Aman slaslam bi sojè a ntsenaʼa, a mdo a sam bi sojè, a nʼngra na: Ka war a ka gi mè? Ndo haha ndo Rome!

²⁷ A bi sojè a mshkè a sam na, a ngaɗa na: Sèi ka gaɗayè: ka ndo Rome ɗè? A nengaʼa a ngaɗa: Halau.

²⁸ A bi sojè a mʼmbeɗa na a ma: I pu Suli kumba, amari i ndeda va ga a ndo Rome. A Paul a ngaɗa: Aman iyè, i ndo Rome tas.

²⁹ A nasa nasa ndohi man ta gaɗa ta, aman ta jhèɗèʼa, ta jèkeda. A bi sojè a ngu zlau, aman a ntsenaʼa, a ndzawa ndo Rome.

Paul a sam kita

³⁰ Te mangoslèmaʼa a woya a njhèdè a vaʼa, a géɗ mè man ndohi Juif ta pinèʼa. A mpra cèlèlèu nengaʼa, a ngaɗa ta bihi a ndohi ncemma ta, aman ta shkè, a ta ɓicko va. Te deɓaʼa a nco Paul, a nzlatseda a ndev tengaʼa.