Actes 21 - Ma Zhiklè

Paul a dè a kokwar Jérusalem

¹ Aman nga jèke ta ma, ngo do a wurom, a nga shkè a civèɗ ndul ndul a ma Cos; te mangoslèmaʼa Rhode; te pa a Patara.

² Aman nga ngots wurom, man a dè a kokwar Phénicie, ngo do a pa, a ngo do a géɗ iyam.

³ Aman nga rka Chypre dra, nga jèkeda a civèɗ ri gula, a ngo do a wurom man a dè a Syrie, a nga ndika a kokwar Tyre, aman te pa wurom a woya a mpeda kolongwi a hai.

⁴ Aman nga ngots ndohi Yèsu, nga nza a pa mʼmèn tsaraɗ. Ta gaɗa na Paul te Mèzhèɓ Zhiklè, aman a dè a kokwar Jérusalem azɓai.

⁵ Aman nga ndeva mʼmèn te pa, ngo do a ma. A ta feda nga a ma kokwar, tèlèba a ngurhi a ngwozi a wudahi ba. A nga gurɓahai a dzah woyam, a nga tsu rai.

⁶ Aman ngiɗè a nʼnga na mbalai a ngiɗè, ngiɗè a ngiɗè, a ngo do a wurom, a tengaʼa ta men ta a deɓa a sam ndohi ta.

⁷ A ngo do a ma a wurom te kokwar Tyre, a nga shkè a kokwar Ptolemis, a nga ga ta mbalai a kramamhi nga, a nga nza a pa mʼmèn staɗ.

⁸ Te mangoslèmaʼa ngo do, a nga shkè a kokwar Césarée, a ngo do a gi Philippe, ndo mizline Zhiklè staɗ te va tsaraɗ, a nga nza a sam na.

⁹ Dalahi nengaʼa faɗ, bidalihai, a ta hodko ma.

¹⁰ Aman nga nza a pa mʼmèn kumba, ndo nhadka ma ngiɗè a mshke te kokwar Judée, nzlembaɗ na Agabus, a mshke a sam nga.

¹¹ A nco hutèɗ Paul, a ndzawa ri nengaʼa a sak nengaʼa, a ngaɗa: Mèzhèɓ Zhiklè nkezlaʼa a goɗ ar haha: Ndo man hutèɗ a nengaʼa, ndohi Juif ta da dzawaʼa te kokwar Jérusalem, a ta feda a ri ndohi nte deɓa.

¹² Aman nga tsena ma haha, nga a ndohi a samaʼa, nga tsa na rai a Paul, aman a dè a kokwar Jérusalem azbai.

¹³ A Paul a mʼmbeɗa ta a ma: Kin kuɗai, a kin mbeɗamay ndav èhèmè? Te ndav ga amba genè, ko ta dzawyè, ko i metsi ga te kokwar Jérusalem, a géɗ nzlembaɗ Bai Yèsu.

¹⁴ Aman ta slaha ta bidè a hi ɓai, ta nza tètè, a ta gaɗa: Sèi ara man Bi Zhiklè a woyaʼa.

¹⁵ Te deb pats nasa nga hul kolongwi nga, a ngo do a kokwar Jérusalem.

¹⁶ Ndohi Yèsu te kokwar Césarée ngiɗè kètè ta shkè a nda nga, a ta de nga a sam ndo ngiɗè te kokwar Chypre, nzlembaɗ na Mnason, man a nco Yèsu a ndav halaʼa, a nga nza a mbrok a sam na.

Paul a ngela na di a Jacques

¹⁷ Aman nga ndika a kokwar Jérusalem, kramamhi nga ta ce nga a mwuffè.

¹⁸ Te mangoslèmaʼa, Paul a mdo a nda nga a sam Jacques, a ndohi nhalaʼa tèlèba ta shkè a pa.

¹⁹ Aman a nʼnga ta mbalai, a nʼngreda ta skwi staɗ staɗ tèlèba, man Zhiklè a gau te mizlinè nengaʼa te ndev ndohi nte deɓa.

²⁰ Aman ta tsenaʼa, ta slubordo Zhiklè, a ta gaɗa na: Kramam nga, ka rka ndohi Juif man ta gi gozhèm gozhèm, a haha, man ta co Yèsu a ndav, a ta gi srak a ma kita Zhiklè tèlèba.

²¹ Ndohi ngiɗè ta gaɗa ta te deɓ ngaya, ara man ka njè ta ma a ndohi Juif tèlèba, man ta zhè a sam ndohi nte deɓa, aman ta jèjèr ma Moise azɓai, a ka gaɗa, aman ta ngél ngwon wudahi tengaʼa azɓai, a ta jèjèr tsuf ta asaɓai.

²² Ani kè? Ta da tsena a vava, ka shkè.

²³ Sèi ka gi ara man nga ngra ka: nga ngots ndohi faɗ, ta gso va a ma man ta gadda hai.

²⁴ Sèi ka cè tengaʼa a sam ngaya, a ka til ndav ngaya, ara man ndohi Juif ta giaʼa, a nda tengaʼa, a ka va ta sulai, aman ta shi gèɗ ta. A ndohi tèlèba ta da suna, ta tsakal ma, ka ba ka jèjèr ma kita Zhiklè.

²⁵ Aman a sam ndohi te ndev ndohi nte deɓa, man ta co Yèsu a ndav, nga basla gèɗ nga, a nga zlündo ɗèlèwèr a sam ta, aman ta gia arsa azɓai, sèi aman ta ɓir va ta te ri vrai, te ri Pombaz, te ri skwi mʼmets mʼmetsai, te ri mphömè.

²⁶ A Paul a nhul ngurhi a sam na, a ntila ndav na, a nda tengaʼa; te mangoslèmaʼa, a mdo a gi Zhiklè a sam di ndo, a ngra ta ara man a zhèr pats man ta tila zura ma, ha ta vi skwi a Zhiklè a géɗ staɗ staɗ tèlèba te va tengaʼa.

Ta gso Paul te gi Zhiklè

²⁷ Aman mʼmèn tsaraɗ haha ndul ndul klèng ma, ndohi Juif te kokwar Asie ta rka Paul te gi Zhiklè, a ta poko ta gèɗ auda a ndohi nhayaʼa tèlèba, aman ta gshèʼa, a ta boho a wuɗai:

²⁸ Kinè ndohi Israel, va-takaha nga! Nengaʼa ndo man a njè ta ndohi tèlèba, a poko ta gèɗ auda a ndohi nga, aman ta gi skwi ngiɗè, man ambaha ma kita Zhiklè haha ɓai; te deɓaʼa a nde ta ndohi Grec ba a gi Zhiklè, a lizhè sam haha, man Zhiklè a kezlaʼa.

²⁹ Aman ta rka Trophime, ndo Ephèse, te kokwar a nda nengaʼa. A ta huro, Paul a ndaʼa a gi Zhiklè.

³⁰ Te kokwar tèlèba ta hakaɗai, a ta hèzlèwè. A ta gso Paul, a ta ngazldauda te gi Zhiklè, a ta pizla ntamagi tsam tsam.

³¹ Aman ta woy a ta keɗaʼa, bi sojè a ntsena nhèzlèwè, ara man ndohi kokwar Jérusalem tèlèba ta rubai.

³² A nasa nasa a nhul sojèhai, a bi sojè a nhu a ndev ta. Aman ta rka bi sojè a sojèhai, ta jèkeda ntsi Paul.

³³ Aman bi sojè a herda na va, a nco a sam na, a ngaɗa aman ta dzawaʼa a cèlèlèu cèw, a ndzhoɗo: Nengaʼa wa, a ge mè?

³⁴ A ngiɗè a gèɗè ngiɗe, a ngiɗè a gèɗè ngiɗè te ndev ndohai, a slaha a ntsena skwi nzura ɓai a géɗ nrubai, a ngaɗa aman ta daʼa a gi bai.

³⁵ Aman a mshkè a sam skwi ntiv ntivè, sojè sèi ta zuɓda auda te va ndohai man ta ga na wuɗai.

³⁶ Aman ndohi tèlèba ta dzodzora, a ta goɗ a wuɗai: Sèi kin keɗaʼa!

Paul a tsoko gèɗ na auda a ri na

³⁷ Aman ta da Paul a gi bai, a ngaɗa na bi sojè: I slaha a i gaɗa ka ma ga ɗè? A nengaʼa a ngaɗa: Ka sun ma Grec dè?

³⁸ Ka ndo Egypte ka bi dè, man mʼmèn a zhè kètè, a rubai, a nde ta ndohi nkeɗ ndo gozhèm faɗ auda a hèshèkèɗ?

³⁹ A Paul a ngaɗa: I ndo Juif te kokwar Tarse, ndo Cilicie, kokwar mbiaʼa. I tsi ri a ka, ka vay civèɗ, aman i gèɗ ma a sam ndohai.

⁴⁰ Aman a mva na civèɗ, Paul a nzlatsa a sam skwi ntiv ntivè, a ngeda ta ri a ndohai. Aman ta nza tètè, a ngaɗa ta a ma aramée: