Actes 20 - Ma Zhiklè

Paul a dè nshèwèlè a kokwar Macédoine a Grec

¹ Aman nrubi klèng ma, Paul a mbaha ta ndohi Yèsu a sam na, a mbid ta, te deɓaʼa a mdo, aman a dè a kokwar Macédoine.

² Aman a nsawala te kokwarhi haha tèlèba ma, a mbid ta ndohi Zhiklè kumba. A nengaʼa a mdo a kokwar Grèc, a nʼnza a pa ki makar.

³ Aman a woya a ndè a kokwar Syrie a wurom, ndohi Juif ta vhè ma a gèɗ nengaʼa. A Paul a nhuro, a ndè a deɓa, a mbizhè a ndev kokwar Macédoine.

⁴ Ndohi man to do a vna, ha ndikè a kokwar Asie: Sopater, kra Pyrrhus, te kokwar Bérée; Aristarque a Second te kokwar Thessalonique; Gaius te kokwar Derbe, a Timothée, Tychique a Trophime te kokwar Asie.

⁵ Tengaʼa to do a ma, a ta zhèr nga te kokwar Troas.

⁶ A ngo do a wurom te kokwar Philippes, te deɓ ngolala movar man skwi nshégèrè a te di ɓai; te deɓ mʼmèn zlam nga shkè a sam ta te kokwar Troas, a nga nza a pa luma staɗ.

Paul a nʼnga ta mbalai te Troas

⁷ A pats nshèlèkuraʼa te luma, aman nga ɓücko va, a ncèkè movar, Paul a njè ta, a woya man a ndè a ma a nshèwèlè te mangoslèmaʼa, a ngaɗa ta ma a ma ma, ha gèɗ vaɗ.

⁸ Pitirla kumba ta zhè a gèɗ gai, a sam man nga ɓica va.

⁹ A gol ngiɗè a nʼnza a nvakavar, nzlembaɗ na Eutycltus, nzhun a ngsama na dai, te man Paul a nju ma nʼnzi a zhè, mɓerzla a nzhunè, a nkalahai a gèɗ gi mamakaraʼa, a ta co, mʼmetsa.

¹⁰ A Paul a nshkèhai, a ntuzloma na a gèɗ, a nhumbatda a ndav, a ngaɗa ta: Kin hazlawa ɓai, aman nshèffè te pa dai!

¹¹ A mdo a géɗ gai, a ntsaka movar, a nʼndau, a ngaɗa ta ma kumba, ha sam nciɗa ta, a njèke ta.

¹² A ta cko gola a nshèffè, a ndav ta a wuffè.

Paul a shèwèlè te Troas a kokwar Milet

¹³ A ngo do a ma a wurom a kokwar Assos, a nga woy a nga cè Paul te pa a nda nga. Nengaʼa a ntul ma a hi arsa, a woya a ndè a sak.

¹⁴ Aman nga zlü gèɗ a vna te kokwar Assos, nga co a nda nga, a nga shkè a ma kokwar Mytilène.

¹⁵ Te pa ngo do a wurom, te mangoslèmaʼa, a nga shke a ma kokwar Milet.

¹⁶ Paul a nhuro, man a dè a kokwar Ephèse ɓai, a woya a ngi ndudoh te kokwar Asie ɓai, aman a woya a nvèsh va, aman a slaha a ndikè a kokwar Jérusalem a pats ngolala Pente-côte.

Paul a njè ta ndohi nhalaʼa te Ephèse

¹⁷ Te Milet a nzlündo ndo a kokwar Ephèse, a mbaha ta ndohi nhalaʼa te va mpi ndohi Zhiklè. Aman ta shkè a sam na, a ngaɗa ta:

¹⁸ Kin suna, te pats nshè-lèkuraʼa, aman i shkè a kokwar Asie, ara man i zhè a sam kinè pèc pècèk, a i gu mizlinè Bi Zhiklè;

¹⁹ i manda gèɗ ga a hai a kuda a di kumba, a matakwan a va, a géɗ ndohi Juif man ta vhèy ma a gèɗ.

²⁰ Aman i ngheda skwi man a takaha kinè ɓai, a i njè kinè, a i senda kinè a sam di ndohai, te gi staɗ staɗ,

²¹ a i gu malwudai a sam ndohi Juif a ndohi man Juif ka ɓai cèw ba, aman ta ngwodko ndav a sam Zhiklè, a ncè Bi Yèsu Kristi a ndav.

²² Na haha, i mana ndav ga te Mèzhèɓ Zhiklè, a i dè a kokwar Jérusalem; i sun skwi man i dè zli gèɗ a vna te pa ɓai,

²³ sèi Mèzhèɓ Zhiklè nkezlaʼa a gi malwudai, aman te kokwarhi tèlèba cèlèlèu a skwi mwuɗitpa ta zhèryè.

²⁴ Aman i hera ɓai, i rka nshèffè ga ara skwi mèshèlè ka ɓai, i woya man i ndeva nhi ga genè a mwuffe, a mizlinè man i ngots te ri Bi Yèsu, a i gi malwuɗi ma mbelaʼa a pombi Zhiklè.

²⁵ Na haha, i suna, kin da rka di ga asaɓai, kin tèlèba man i beza a sam kinè, a i njè kinè ma kokwar Bi Zhiklè.

²⁶ Gar haha i ngreda kinè a patsna: aman kin da zi kinè, mali ga ka ɓai. I nghedaha kinè skwa ɓai,

²⁷ a i njè kinè ma tèlèba man Zhiklè a huro a giaʼa.

²⁸ Anai sèi kin gi maya a géɗ va kinè, a géɗ rèwè tèlèba, te ndev tengaʼa Mèzhèɓ Zhiklè nkezlaʼa a nʼnge kinè a ndohi nwar ta, aman kin wèr mpi ndohi Zhiklè, man a sumkaɗa deɓa a Pombaz va nengaʼa.

²⁹ Aman i sun a vava, te deɓ man i da jèke kinè a pa ma, kdadihi dak ta da shkè a ndev kinè, a ta jèkeda rèwè azɓai.

³⁰ Te ndev kinè ba, ndohi ta da slèmbèɗè, aman ta ngwèdè ma njè-ma, a ta woy a ta ngazl ta ndohi Yèsu a verzi ta.

³¹ Gar haha sèi va-nza a dai, a kin hur ara man i jèka ɓai, mvi makar, a pats a vaɗ, a i büd ndo staɗ staɗ a kuda a dai.

³² Anai, i pe kinè a ri Zhiklè, a ma pombi nengaʼa. Nengaʼa a nʼngots wuɗai, man a nzal kinè a ma ma, a mva ta skwi man ta da ngècè te ri Zhiklè a ndohi tèlèba man ndav ta nkezla a nengaʼa.

³³ I tétéka verzhègenè a guro a maslaka kinè ɓai,

³⁴ a kin sun a ri kinè, ara man i gu mizlinè a ri ga, a i ngots skwi ga, a skwi ndohi mizlinè ga.

³⁵ I ngreda kinè skwi tèlèba, aman sèi nga gi mizlinè arsa, a nga takaha ta ndohi man wuɗi ta azɓai, a nga hér ma Bi Yèsu, man a gaɗa: man ka vi skwai, a wuffedè ndav ngaya a fena man ka ngècè skwai.

³⁶ Aman a goɗ ma ar haha, a ngurɓahai, a ntsu ri a nda tengaʼa.

³⁷ Ta tèlèba ta kuɗai, ta kelawa na ri a daʼai a Paul, a ta ga na mbali a ri cèw.

³⁸ Ndav tengaʼa mʼmbeɗ na, holholaʼa a géɗ man a gaɗa ta: Kin da rka di ga asaɓai. A ta feda na ma a wurom.