Actes 2 - Ma Zhiklè

Mshkè Mèzhèɓ Zhiklè nkezlaʼa

¹ Aman pats Pentecôte a mshkè ma, ta zhè tèlèba a sam staɗ.

² Tsam tsam skwi ngiɗè a mshkè te zhiklè, a nkuɗau ara kozlar mbiaʼa, a nʼndha gi tèlèba man ta nza te pa.

³ A nèʼènhai, ara nèʼèn vogwa, a ta rkè, ta kezla gèɗ, a ta nza a gèɗ ndo staɗ staɗ.

⁴ A ndav tengaʼa tèlèba nʼndha a Mèzhèɓ Zhiklè nkezlaʼa, a ta hüno ngèɗè a daʼai tsad tsaɗ, staɗ staɗ daʼai ngiɗè, ara Mèzhèɓ Zhiklè a va na.

⁵ Te kokwar Jérusalem ndohi Juif ta zhè, man ta gi zlau Zhiklè, man ta shkè te verzi ndohi herkeda tsaɗ tsaɗ.

⁶ Aman ta tsena ma haha, ta haya va kumba, gèɗ ta ndzakaɓa, aman ta tsena staɗ staɗ a gèɗè a daʼai kokwar ta.

⁷ A ta rzl ta, a ta hur a vata, a ta gaɗa: na, haha mè? Ndohi man ta gèɗè a haha, ndohi Galilée ka ɓi dè?

⁸ A nga tsena ma tengaʼa a daʼai kokwar nga èhèmè?

⁹ Parthes, Mèdes, Elamites, ndohi kokwar Mésopotamie, Judée, Cappadoce, Pont, Asie,

¹⁰ Phrygie, Pamphylie, Egypte, Libye ndul ndul a ma Cyrène, a ndohi man ta shkè te kokwar Rome, ndohi Juif a gwoli Juif,

¹¹ a ndohi Crête a Arabes, nga tsena ara man ta gèɗè a géɗ nrkedi Zhiklè mbiaʼa a daʼai nga èhèmè?

¹² Ta tèlèba ta rzl ta, gèɗ tengaʼa ndzakaɓa, a ta goɗ a va ta: Skwi haha a da ndikè ta ahngwa?

¹³ Aman ndohi ngiɗè ta ngwoshè a pa, a ta gaɗa: Ndohi haha, ndohi zom.

Njè-ma Pierre a géɗ Pentecôte

¹⁴ A Pierre a nslambaɗa a nda tengahia 11, a nhüno man a gaɗa ta: Kinè, ndohi Juif a ndohi kokwar Jérusalem tèlèba! I woy a i ngreda kinè skwi haha, va-fa na zlembaɗ a ma ga!

¹⁵ Zom a keɗ ta ndohi haha azɓai, ara man kin huro; prèk di genè ma!

¹⁶ Aman nengaʼa skwi man Joel, ndo nhadka ma, a ngaɗa:

¹⁷ Zhiklè a gaɗa: A pats ndikèma skwai i woya man a i bèdè Mèzhèɓ ga a géɗ ndohi tèlèba, a wudahi kinè a dalahi kinè ta da hèdè ma Zhiklè; golahi kinè ta da rka skwi man a ma, a ndohi kinè nhalaʼa ta ngècè nshu-nè.

¹⁸ A pats nasa i woy a i bèdè Mèzhèɓ ga a géɗ ɓèlèlihi ga, ko nguraʼa ko ngwoz, a ta hèdè ma Zhiklè.

¹⁹ I woya man a i ngrédè nrkedi te zhiklè te géɗèʼa, a i ngré-dè skwi tʼhai tʼherkeda, Pombaz a vogwa, a vodzok.

²⁰ Pats a da ngwèdè va na a ruva, a kia a da ngwèdè va na a Pombaz; te deɓaʼa pats kita Bi Zhiklè a shkè, pats mbiaʼa a nʼnjèlè.

²¹ Te deɓaʼa ko wawa man a tsi rai a nzlembaɗ Bi Zhiklè, a mbél na.

²² Kinè, ndohi Israel, va-tsena ma ga! Yèsu ndo Nazareth, nasa ndo man Zhiklè a nfau a mizlinè a nrkedai a skwi man Zhiklè a gau a nengaʼa a sam kinè (ara man kinè ba kin suna).

²³ Te deɓaʼa, aman ta feda a kita ma, ara Zhiklè a nhur zlèzlèa a woya a ngiaʼa, kin gezlalaʼa, a kin va ta a ri a ndohi malihai a ta keɗaʼa.

²⁴ Zhiklè a nslambaɗkaɗauda, a mprokoɗauda te matakwan mʼmetsai. Mʼmetsi a slaha man a ngsa ɓai.

²⁵ Aman David a goɗ a géɗ nengaʼa: Bi Zhiklè a zhè a sam di ga pèc pècèk, na zhè a tsagi ga, aman i gidè va azɓai.

²⁶ Gar haha ndav ga langlangaʼa, a i gèɗè ma mwuffe, a gèɗ man ko va ga a nʼnza, a i zhèrè te ndav.

²⁷ Aman ka jèkeda ndav ga a ri a kokwar-Bi-mʼmetsi azɓai, a ka gi aman ndo ngaya nkezlaʼa a huslè azɓai.

²⁸ Ka ngray civèɗ nshèffè, a ka da ndha ndav ga a mwuffe a sam di ngaya.

²⁹ Kinè, dalahimam ga, i woya aman i njè kinè ma auda tèlè, a géɗ David, babab nga halaʼa.

³⁰ Nengaʼa ba a mʼmets na, a ta raʼa. Gi dzavi nengaʼa a zhè a sam nga, ha patsna. Nengaʼa ndo nhadka ma, a suna Zhiklè a ngaɗa na a mbèɗè, a woya a ngi aman verzi nengaʼa a nzi a géɗ sam nʼnzi bi nengaʼa.

³¹ A hod ma a géɗ nslambaɗkaɗa Kristi, man a gaɗa: Zhiklè a njèkeda a sam mʼmetsi ɓai, a zluèɗ va nengaʼa a nhusla ɓai.

³² Yèsu haha, Zhiklè a nslambaɗda. Nga tèlèba ndohi malwuɗihi a géɗ skwi sa.

³³ Antanta ri mandi Zhiklè a nzalaʼa, a nʼngots Mèzhèɓ Zhiklè nkezlaʼa, man Bab Zhiklè a mpasla na rai, a foko nga skwi haha man kin rkaʼa, a kin tsenaʼa.

³⁴ David a nda a zhiklè ɓai. Nengaʼa a ngaɗa: ɓai a ngaâa na Bi ga: nzahai a civèɗ ri mandi ga,

³⁵ ha pats man i ge ta ndohi mayamhi ngaya a skwi nfi sak ngaya.

³⁶ Gar haha ndohi Israel tèlèba sèi da suna a vava, Zhiklè a nʼnga Yèsu haha, man kin gezlalaʼa, a Bai a Kristi.

³⁷ Aman ta tsena ma haha, a mʼmbeɗama ta ndav, a ta gaɗa na Pierre a ndohi sak ngiɗè: Dalahimam nga, nga da gi ma kè?

³⁸ A Pierre a ngaɗa ta: Va-ngwoda ndav kinè, va-gu baptême staɗ staɗ tèlèba a nzlembaɗ Yèsu Kristi a mpra mali kinè, a kin ngècè Mèzhèɓ Zhiklè nkezlaʼa.

³⁹ Skwi man Zhiklè a mpasla kinè rai, skwi kinè, a wudahi kinè, a ndohi tèlèba man ta dra, tèlèba man Bai, Zhiklè nga, a woy a mbaha ta.

⁴⁰ Ma haha, a ma ngiɗè tsaɗ tsaɗ a nʼngreda ta, a mbid ta, a ngaɗa ta: Va-gu aman kin mbél kinè te ndev ndohi ambaɓihiaʼa haha a géɗ herkeda!

⁴¹ A ndohi man ta co ma nengaʼa, ta gu baptême. A ta shkè na va va. A pats nasa ndohi ngu baptême gozhèm makar.

⁴² A ta slebau ma ndohi sak, a to do a ma ma te pa, a ta humda va, a ta tsaka movar, a ta tsu rai.

Maya nshèffè ndohi Zhiklè

⁴³ A zlau a ndza ta ndohi tèlèba, a ta rka nrkedi kumba, a skwi man ndohi sak ta ngreda ta tsaɗ tsaɗ.

⁴⁴ Aman ndohi téléba man ta co a ndav, ta nza a sam staɗ, a ta humda skwi ta tèlèba.

⁴⁵ Skwi tengaʼa, a kolongwi tengaʼa, ta preda ma, a ta kezla ta ndohi man ta ngatsa skwa ɓai.

⁴⁶ A nciɗ sam a nciɗ sam ta ɓiceda va a gi Zhiklè, ta mba ma ta, ta ndau skwi nʼndai a mwuffe te gi ngiɗè te gi ngiɗè,

⁴⁷ a ta slubordo Bi Zhiklè, a ta ngots pombai a sam ndohi tèlèba. Aman a nciɗ sam a nciɗ sam Zhiklè a mpe ta ndohi man a mbel ta a va mpi ndohi Zhiklè.