Actes 19 - Ma Zhiklè

Paul te kokwar Ephèse

¹ Te deɓaʼa aman Apollos a zhè te kokwar Corinthe, Paul a shèwèlè te kokwarhi te géɗèʼa, a mshkè a ma kokwar Ephèse, a nʼngats ta golahi Yèsu kètè,

² a ngaɗa ta: Kin ngots Mèzhèɓ Zhiklè dè, aman kin co Yèsu a ndav? Ta gaɗa na: Nga tsena ma va na haha ɓai, aman Mèzhèɓ Zhiklè a zhè.

³ A ngaɗa ta: Kin bu baptême a nzlembaɗ ngè? Ta gaɗa: Baptême Jean.

⁴ Paul a ngaɗa: Jean a ngu baptême a géɗ nʼngwèdè ndav, a ngaɗa ta ndohi man ta cè nengaʼa a ndav, man a di a shkè te deɓ nengaʼa: Nengaʼa Yèsu.

⁵ A géɗ ma haha, ta gau baptême a nzlembaɗ Bi Yèsu.

⁶ Aman Paul a nfa ta ri a gèɗ, Mèzhèɓ Zhiklè a mshkè a géɗ tengaʼa, a ta goɗ ma a néʼèn tsaɗ tsaɗ, a ta hodko ma.

⁷ A ndohi tèlèba ta gi 12.

⁸ A Paul a mdo a gi njèngè ma Zhiklè, a njè ma Zhiklè, a njè ta ma auda tèlè, ki makar, a nsenda ta, a nʼngreda ta ma kokwar Bi Zhiklè.

⁹ Aman ndav ndohi ngiɗè ngwora, ta ca a ndav ɓai, a ta durdo civèɗ Zhiklè a sam di mpi ndohi Zhiklè tèlèba; te deɓaʼa Paul a njèke ta a pa, a nhelka ta golahi Yèsu a tsagi nengaʼa, a njènga ta pèc pècèk te gi njèngè Tyrannus.

¹⁰ Skwi haha a ngu mvi cèw, aman ndohi tèlèba te kokwar Asie ta tsena ma Bi Yèsu, ndohi Juif ba a ndohi man Juif ka ɓi ba.

Wudahi Scéva

¹¹ A Zhiklè a ngu nrkedi mbiaʼa a Paul.

¹² Aman ta co maslaka nkèpaʼa, a di maslaka a va nengaʼa, a ta fa ta a gèɗ ndohi matakwan, matakwan tengaʼa a ndal na, a mèzhèɓhi ambaɓihiaʼa ta jèke ta.

¹³ A ndohi Juif ngiɗè matskata man ta sawala a pa, ndohi mʼmbèh skwai man ta mboh skwi a géɗ mèzhèɓhi ambaɓihiaʼa a nzlembaɗ Bi Yèsu, a ta gaɗa: Nga dzam kinè a nzlembaɗ Yèsu, man Paul a njèʼa!

¹⁴ Tenga wud ndo Juif, Scèva, ndo mvi skwi a Zhiklè, tsaraɗ, man ta gu arsa.

¹⁵ Aman mèzhèɓ ambaɓai a mʼmbeɗa ta a ma: Yèsu, i sun amba; Paul, i sun amba; aman kinè, kin wa?

¹⁶ A ndo man Mèzhèɓ ambaɓai a ga na, a nkala ta a va, a ngu a ngul ta, a ta hu ta adai, te gi matsa, a mblè a va.

¹⁷ A skwi haha, ndohi tèlèba man ta nza te kokwar Ephèse, ta tsenaʼa, ndohi Juif a ndohi man Juif ka ɓai; a zlau a ndza ta tèlèba, a ta slubordo nzlembaɗ Bi Yèsu a vata.

¹⁸ A ndohi kumba te ndev ndohi man ta co Yèsu a ndav, a ta shkè, a ta ngreda malai a skwi man ta gau, auda.

¹⁹ Ndohi kumba man ta mboh skwai, ta hulko ɗèlèwèrhai, a ta fa ta vogwa, a sam di ndohai, a ta ngra gani ɗèlèwèr, a gi Suli 50.000.

²⁰ Ma Bi Yèsu a zlèzlèmè a ma ma arsa a wuɗai.

Nrubai te kokwar Ephèse

²¹ Aman skwi haha klèng ma, Paul a nhuro, a woya a mbizhè a ndev Macédoine a Achaie, aman a dè a kokwar Jérusalem, a ngaɗa: Te deɓaʼa man i do a pa, sèi i dè aman i rka kokwar Rome ba.

²² A nzlinde ta ndohi cèw, Timothée a Erastus, a kokwar Macédoine, aman ta takaha. A nengaʼa a nʼnza a kokwar Asie kètè.

²³ Te ndev nasa, ndav ndohi kètè a hu-bètè a géɗ ma civèɗ Bi Yèsu.

²⁴ Aman ndo ngiɗè, nzlembaɗ na Démetrius, ngwozla nviɗ verzhègenè, a nvüdo skwi ngiɗè ara Diane, a verzhègenè, a ndohi mizlinè nengaʼa ta ngots Suli a vna kumba.

²⁵ A mɓic ta tengahiaʼa, a ndohi ntakaha ta te mizlinè matsa, a ngaɗa: Ndohi ga, kin suna, nga ngots Suli kumba te mizlinè haha, a kin rkaʼa, a kin tsenaʼa, aman te kokwar Ephèse gene ka ɓai, aman ko te Asie tèlèba,

²⁶ Paul matsa a fi ma a hai, a gi aman ndohi kumba ta jèke nga, a mfa ta ma a gèɗ, a gaɗa: Zhiklèhai, man ri ndo a ngau, ta zhiklèhi ka bi fèt.

²⁷ Aman mizline gani nga genè ka ɓai, man a di a ndi a skwi ambalai; aman ko gi Diane, man Asie a herkeda tèlèba ta tsi ri a nengaʼa, ngwoz man ta sla na zhiklè mbiaʼa, ta da rka ara skwi ambalai, a nʼnjèl nengaʼa a di a ndiv na.

²⁸ Aman ta tsenaʼa, ta gu ndav a vata, a ta goɗ a wuɗai: Diane ndohi Ephèse, mbiaʼa!

²⁹ A kokwar tèlèba a rubai, a ta tèlèba ta hu ara ndo staɗ a sam nrubai, a ta gso Gajus a Aristarque, te kokwar Macédoine, golahi Paul.

³⁰ Aman Paul a woya a ndè a ndev ndohai, golahi Yèsu ta va na civèɗ ɓai.

³¹ A ndohi mbibihiaʼa kètè te Asie, mandalahi Paul, ta zlündo ndo a sam na lèmèlèmè, a ta bidèʼa, aman a dè a dal nrubi azɓai.

³² Matrhiaʼa ngiɗè ta hèzlèwè a wuɗi arsa, ngiɗè ar haha, a ndohi mɓicaʼa ta dzakaɓa, a ta sun ɓai, èhèmè ta haya va.

³³ A ndohi ngiɗè ta ngozlo Alexandre, man ndohi Juif ta zukda a ma. A Alexandre a ngeda ta rai, a woya a ntsoko gèɗ na auda a sam ndohai.

³⁴ Aman ta rka, nengaʼa ndo Juif, ta hüno a ta goɗ a ma staɗ, a ta hèzlèwè nʼnzi a zhè (ara lʼheure cèw): Diane ndohi Ephèse, mbiaʼa!

³⁵ Aman ndo kita a mbatsedaha gèɗ ndohi a hai, a ngaɗa: Kinè ndohi Ephèse: kokwar Ephèse a wara na di a Diane ngwozaʼa, man ta sla na zhiklè mbiaʼa, a nkalka te zhiklè te gèɗèʼa, nsun ɓi wa?

³⁶ Aman tèlè ta sun skwi haha, sèi kin nzi tètè, a kin vassa skwi ɓai!

³⁷ Kin helka ta ndohi haha, man ta ga metsar a gi Zhiklè ɓai, a ta derɗa ngwoz man kin sla na zhiklè kinè ɓai.

³⁸ Aman ma Démetrius a ndohi mizlinè nengaʼa a zhè a gèɗ ndo sa, sèi ta dè kita. Ngomna a zhè, man ta gi mizlinè sa. Sèi ndohi ta dè a ta pin va.

³⁹ Aman kin woy a kin cèmma ngiɗè, sèi ta til ma te va ndohi kita mɓicaʼa.

⁴⁰ Man ɓai ta da pin nga a gèɗ nrubai a patsna. Aman skwi man nga rubi a géɗèʼa azɓai, a nga slaha a nga ngreda verzi nrubi ɓai. Aman a goɗ arsa, a mpre ta ndohai.