Actes 17 - Ma Zhiklè

Nrubai te kokwar Thessalonique

¹ Aman ta bozl ndev kokwar Amphipolis a Apollonie, ta do a kokwar Thessalonique man gi njèngè ndohi Juif te pa.

² Ara man Paul a gia pèc pècèk, a mdo a sam ta a gai, a nslebda ta âèlèwèr Zhiklè a pats nshèk va, pats nshèk va, sak makar,

³ a nsenda ta, a ngreda ta, ara man sèi skwa a dza na Kristi, ara man a nslambaɗkaɗauda te mʼmetsai ndèzl, a ngaɗa: Yèsu haha, man i njè kinè, nengaʼa Kristi.

⁴ Matrhiaʼa te ndev tengaʼa ta basla gèɗ, a ta humda a Paul a Silas; ndohi Grec ba kumba, man ta gu zlau Zhiklè, a ngwozi ndohi mbibihiaʼa ba kumba kètè.

⁵ Aman ndohi Juif ta gu srak, a ta hul fali ndohi ngiɗè, a ta ɓic ta, a ta rubu te kokwar, a ta shkè a ma gi Jason, a ta woy a ta de ta Paul a Silas a sam ndohi kokwar.

⁶ Aman ta ngats ta ɓai, ta ngazlda Jason a kramamhi ngiɗè kètè a sam ndohi mbibihiaʼa te kokwar, a ta goɗ a wuɗai: Ndohi man ta dzulvaɗa herkeda tèlèba; ta a haha!

⁷ A Jason a nhel ta a gai, ta tèlèba ta gi skwi man ambaha bi Cèsar azɓai, a ta gaɗa: bi ngiɗè azɓai, sèi Yèsu!

⁸ A fali ndohi sa ta poko ta geɗ auda a ndohai, a ndohi mbibihiaʼa te kokwar, aman ta fu zlembaɗ a ma haha.

⁹ A Jason a ndohi ngiɗè ta pul gèɗ a ndohi mbibihiaʼa, a ta pre ta.

Ndo sak te Bérée

¹⁰ Nkézhèw sam langa, kramamhi ta feda ta ma a nda Paul a Silas tsam tsam a kokwar Bérée. Aman to do a pa, to do a gi njèngè ndohi Juif.

¹¹ Aman nlèɓèslè ndohi Bérée a fena man a ndohi te kokwar Thessalonique. Ta woy a ta tsena ma Zhiklè, a ta war te ɗèlèwèr Zhiklè a nciɗ sam a nciɗ sam, aman ta rkaʼa: arsa a vava ɗè?

¹² Ta kumba te ndev tengaʼa, ndohi Grec kumba, ngurhi a ngwozihi ndohi mbibihiaʼa, ta co a ndav.

¹³ Aman ndohi Juif te kokwar Thessalonique ta tsenaʼa, Paul a njè ta ma Zhiklè te kokwar Bérée ba, ta shkè, a ta poko ta gèɗ auda, a ndohi te pa.

¹⁴ A kramamhi ta feda na ma Paul tsam tsam a ma iyam mbiaʼa. A Silas a Timothée ta nza te pa.

¹⁵ A ndohi man ta feda na ma Paul, a ta daʼa a kokwar Athène; a ta shkè a deɓa, aman ta menda ta ma Paul a nda Silas a Timothée, ara man a gaɗa ta: vo-washkè a sam ga tsam tsam!

Paul te kokwar Athène

¹⁶ Aman Paul a zhèr ta te kokwar Athène, ndav nengaʼa a hubètè, aman a rka kokwar Athène tèlèba, nʼndha a vrai a skwi mbèh skwai.

¹⁷ A njè ta ndohi Juif a ndohi man verzi ta tsaɗ, man ta tsu ri te gi njèngè ma Zhiklè, a ndohi kumba, a nciɗ sam a nciɗ sam.

¹⁸ A ndohi épicu-rie a ndohi stoirie, ta gu ma a nengaʼa, a ta gaɗa: Ndo tsaval ambali haha a war mè? Matrhiaʼa ta gaɗa: Ara man a woya a senda nga, a til ma zhiklè mɓuaʼa a hai (aman a njè ta ma Yèsu, a ma nslambaɗkaɗauda te mʼmetsai).

¹⁹ A ta co, a ta daʼa a sam kita, a ta gaɗa: Ka woy a ka ngra nga ma ngaya mɓuaʼa man ka njè haha ɗè?

²⁰ Ka hadka nga ma mɓuaʼa a zlembaɗ nga, a nga woya a nga sun verziaʼa.

²¹ Ndohi Athène tèlèba, a ndohi man ta zhè te kokwar Athène a mbrok ta nzaʼa, ta woy a ta tsena ma mɓuaʼa a ta gèɗè ma mɓuaʼa genè.

²² A Paul a nzlatsa te ndev sam kita, a ngaɗa: Kinè ndohi Athène, i rka, aman kin hér Zhiklè kumba.

²³ I beza a civèɗ, a i rka gi njèngè ma Zhiklè te kokwar kinè, a i ngots sam man kin va na skwi a Zhiklè man ta windeda pa: A Zhiklè man nga sun ɓai. Anai i njè kinè nengaʼa, man kin tsi ri a nengaʼa, man kin sun ɓai.

²⁴ Bi Zhiklè man a gu herkeda a skwi tèlèba te pa, nengaʼa Bi giɗfèk a herkeda, a nzi te gi mʼmbèh skwi azɓai, man ri ndo a ngau.

²⁵ Ri ndo a wara na di azɓai, ko skwi mèmè; aman nengaʼa a vi nshèffè a mèzhèɓ a ndo tèlè, a skwi tèlè.

²⁶ A nengaʼa a ngu aman te godozlom staɗ, verzi ndohi tèlèba ta zlèzlèmè a géɗ herkeda, a pa ta kuma a sam nʼnzi tengaʼa.

²⁷ Ta zhè aman ta woy Zhiklè, a ta slaha ta shin nengaʼa, a ta slaha ta ngècèʼa. Na haha, nengaʼa az dra a sam ndo staɗ staɗ te ndev nga ɓai.

²⁸ Aman te nengaʼa nga zhè, nga gidè va, a nga nzi a nshèffè, lèmèlèmè ara ndohi mwindè dimèsh kinè kètè man ta gaɗa: Nga verzi nengaʼa.

²⁹ Aman nga verzi Zhiklè, sèi nga hurokona ɓai, Zhiklè lèmèlèmè ara skwi man ta gu a guro a verzhègenè a kwa, man ndohi ta roma a maya ta.

³⁰ Zhiklè a hér pats man kin sun nengaʼa ɓai, ani asaɓai. Aman antanta a ngaɗa ta ndohi tèlèba, a sam herkeda tèlèba, aman ta ngwèdè ndav ta, a ta tsi rai.

³¹ A vava, pats ngiɗè man a woyaʼa, a da gi kita ndohi herkeda tèlèba zuraʼa. Ndo staɗ man a fedahai a ngiaʼa. Aman a slambaɗdekoɗauda te ndev ndohi mʼmetsaʼa, a ngreda nga, a da gi arsa a vava.

³² Aman ta tsena ma nslambaɗkaɗauda te ndev ndohi mʼmetsaʼa, ndohi ngiɗè ta ngwossaha, ndohi ngiɗè ta gaɗa: Nga woy a nga cinè ma ngaya haha a vaʼa.

³³ A Paul a njèke ta arsa,

³⁴ A ndohi ngiɗè ta dzodzora, ta co Zhiklè a ndav. Te va tengaʼa Denys, staɗ te ndev ndohi kita, a ngwoz ngiɗè, nzlembaɗ na Damaris, a ndohi ngiɗè a nda tengaʼa.