Actes 16 - Ma Zhiklè

Timothée a dè a verzi Paul a Silas

¹ A Paul a mshkè a kokwar Derbe a Lystre. Na haha gol Yèsu ngiɗè a zhè, nzlembaɗ na Timothée, kra ngwoz Juif man a nco Yèsu a ndav na. Bab nengaʼa ndo Grec.

² Labar ma nengaʼa amba a sam kramamhi te Lystre, a Icone,

³ Paul a woya, aman nengaʼa a dè a vna, a nco, a nʼngela na ngwon, a gèɗ ndohi Juif man ta zhè a samaʼa, aman tèlèba ta suna, bab nengaʼa ndo Grec.

⁴ Aman to do a kokwar, kokwar, ta fa ta ma a gèɗ a ndohai, aman ta jèjèr ma man ndohi sak a ndohi nhalaʼa te kokwar Jérusalem ta va ta.

⁵ A mpi ndohi Zhiklè tèlèba ta ngots wuɗai te ncè-a-ndav, a ndohi ta shkè na va, a va, a nciɗ sam a nciɗ sam.

Paul a rka ndo te Macédoine te nshunè

⁶ A ta bozl ndev Phrygie, a Galatie. Aman Mèzhèɓ Zhiklè a mva ta civèɗ ɓai, aman ta nju ma Zhiklè te Asie.

⁷ Aman ta shkè a Mysie, ta woy a ta bèzlè ndev Bithynie; aman Mèzhèɓ Yèsu a mva ta civèɗ ɓai.

⁸ Gar haha to do auda a tsagi Mysie, a ta shkèhai a kokwar Troas.

⁹ A nshunè a nkeɗa Paul a vaɗ, a nrka ndo Macédoine ngiɗè, nzlatsa, a ntsi rai, a gaɗa: Washkè auna a Macédoine, a ka takaha nga!

¹⁰ Mrke nshunè ma, nga slambaɗa, a ngo do Macédoine tsam tsam, aman nga suna, a vava, Zhiklè a baha nga, aman nga dè a nga njè ma mbelaʼa te pa.

Lydie a ngwèdè ndav na

¹¹ A nga jekeda kokwar Troas, a ngo do a civèɗ ndul ndulaʼa a kokwar Samothrace, te mangoslèmaʼa a kokwar Néapolis,

¹² te pa a kokwar Philippes, mbia nengaʼa te Macédoine tèlèba, kokwar sojè.

¹³ A nga nza a kokwar sa mʼmèn kètè. A pats nshèk va, ngo do auda a ma kokwar, a ma iyam mbiaʼa, aman nga hur sam ntsi rai, a nga nzahai a nga gaɗa ta ngwozai, man ta ɓica a pa ma.

¹⁴ A ngwoz ngiɗè man a gi zlau Bi Zhiklè, nzlembaɗ na Lydie, ngwoz mpre maslaka, te kokwar Thyatire, a ntsenaʼa. A Bi Zhiklè a mwina ndav na, aman a fa na zlembaɗ a ma Paul.

¹⁵ A nengaʼa, a gi nengaʼa tèlèba ta gu baptême, a ntsa nga rai, a ngaɗa: Aman kin rkayè ara ngwoz man a nco Bi Yèsu a ndav, sèi kin shkè a gi ga, a kin nzi a pa. A ngu mbuh mbuh.

Te dangai te Philippes

¹⁶ Aman ngo do a sam ntsi rai, nga zlü gèɗ a ngwoz, ɓèl ngiɗè, mèzhèɓ ambaɓiaʼa man a hodko ma, a ga na. A nhelka ta Suli gani a babgihi na kumba, a gèɗ nhèdè ma nengaʼa.

¹⁷ A sam tèlèba a ndzadzarka nga, nga a nda Paul, a ngoɗ a wuɗai: Ndohi haha bèlèlihi Zhiklè te géɗèʼa, man ta njè kinè civèɗ mʼmbel ndo!

¹⁸ A ngu arsa mʼmèn kumba. A skwi haha a ndza na a ndav a Paul, a nʼngwoda ma a deɓa, a ngaɗa na mèzhèɓ ambaɓia sa: I gaɗa ka a ma staɗ, a nzlembaɗ Yèsu Kristi: Do auda te nengaʼa! A nasa nasa mezheɓ a njèkeda.

¹⁹ Aman babgihi nengaʼa ta rka, Suli gani tengaʼa a nze na, ta co Paul a Silas, a ta ngazl ta a sam ncèmma, a sam ndohi mbibihiaʼa.

²⁰ A to do a sam bihi sojè, a ta gaɗa: Ndohi haha ta dzakaɓa kokwar nga, tenga ndohi Juif,

²¹ a ta njè maya nshèffè, man nga, ndohi Rome, nga slaha a nga cèʼa a nga gia ɓai.

²² A ndohi ta gu ndav a gèɗ tengaʼa, a bihi sojè ta kuratsa maslaka tengaʼa a ta gaɗa, aman ta ndah ta a mènèwèd.

²³ Aman ta ndah ta ma, ta pe ta a gi dangai, a ta gaɗa na ndo mɓer dangai, aman a ɓer ta mbelembela.

²⁴ A ndo mɓer dangai a mpe ta a gi dangai ntʼhwaɗaʼa, a mpa ta shèla a sak.

²⁵ A gèɗ vaɗ, Paul a Silas ta tsu rai, a ta slu dimèsh nslébèrdè Zhiklè. A ndohi dangai tèlèba ta tsenaʼa.

²⁶ A nasa nasa herkeda a gudzai, a verzi gi dangai a gudzai, a ntamagihai ta win ta, a cèlèlèu ndohi dangi ta wush ta hai.

²⁷ Aman ndo mɓer dangai a mpiɗèkwe na, a nrka ntamagi dangai mwinèa, a mpho gwèsh, a woya a nzli daʼai na, a nhur ndohi dangai tèlèba ta hu ta.

²⁸ Aman Paul a mbaha na a wuɗai, a ngaɗa: Ka lama na va ngaya ɓai, nga tèlèba nga zhè!

²⁹ A ndo mɓer dangai a ndzhoɗo vogwa, a mhu a pa, a ngudzai, a nkalahi a deɓ sak Paul a Silas,

³⁰ a nde ta auda, a ngaɗa: Bihi ga, i gi be kè, aman i mbél ga?

³¹ Ta gaɗa: Co Bi Yèsu Kristi a ndav ngaya, a ka, a gi ngaya kin mbel kinè.

³² A ta ngra na ma Zhiklè, a nengaʼa, a ndohi tèlèba man ta zhè te gi na.

³³ A vaɗ sa, a nasa nasa a nhel ta a sam na, a mpana ta sam man ta ndah ta a pa murmuraʼa, a ngau baptême a ndohi nengaʼa tèlèba.

³⁴ A nde ta a gi nengaʼa, a mva ta skwi nʼndai, a ta wuffè a ndohi gi nengaʼa tèlèba, a géɗ man a nco Zhiklè a ndav na.

³⁵ Aman sam nciɗa ta, bihi sojè ta zlinde ta sojèhai, a ta gaɗa:

³⁶ Va-pre ta ndohi sa! A ndo mɓer dangai a nʼngra na ma haha a Paul: Bihi sojè ta zlündo ndo, aman kin praʼa. Anai vo-do a gumai!

³⁷ Aman Paul a ngaɗa ta: Ta ndah nga a mènèwèd ambalai a sam di ndohi tèlèba, ta ga kita ɓai, nga ndohi Rome, a ta pe nga a gi dangai, a ta woy a ta pre nga a metsar dè? Az arsa ɓai! Sèi ta shkè a ta de nga auda a ri ta.

³⁸ A sojèhi ta ngra ta ma haha a bihi sojè. A ta gu zlau, aman ta tsenaʼa, ta ndohi Rome.

³⁹ A ta shkè, a ta bid ta, a ta de ta auda, a ta tsu rai, aman ta jèkeda kokwar.

⁴⁰ A to do auda te gi dangai, a to do a gi Lydie. Aman ta rka kramamhi ta, a ta bid ta ma, to do ta.