Actes 15 - Ma Zhiklè

Ncèmma te Jérusalem

¹ Ndohi ngiɗè ta shkè te kokwar Judée, a ta slebda ta kramamhai: Aman kin ngél ngwon azbai, ara man Moise a gaɗa, kin slaha a kin mbel kinè azɓai.

² Aman ta gu ma a Paul, a Barnabas, a ta vursl ma kumba a nda tengaʼa. A ta basla gèɗ ta, aman Paul a Barnabas a ndohi ngiɗè te kokwar Antioche ta dè a kokwar Jérusalem a sam ndohi sak a ndohi nhalaʼa, a ta gèɗè, a ta jhèɗ ma haha.

³ A mpi ndohi Zhiklè ta feda ta ma a civèɗ, a ta bozl ndev kokwar Phénicie a Samarie, a ta ngreda, ara man ndohi nte deɓa ta ngwodko ndav ta a sam Bi Zhiklè. A ndohi Zhiklè te pa tèlèba ta wuffè a géɗ ma haha.

⁴ Aman ta shkè a kokwar Jérusalem, mpi ndohi Zhiklè a ndohi sak a ndohi mɓer ndohi Zhiklè ta ce ta. A ta ngreda skwi tèlèba man Zhiklè a gau a nda tengaʼa.

⁵ A ndohi ngiɗè te va ndohi pharisie, man ta co Yèsu a ndav ta, ta slambaɗa, a ta gaɗa: Sèi ta ngél ngwon, a ta gi skwi tèlèba, ara ma kita Zhiklè man Moise a va nga, a gaɗa.

⁶ A ndohi sak a ndohi nhalaʼa ta ɓica va, a ta tsomma a géɗ ma haha.

⁷ Aman ta tsama ma kumba ma, Pierre a nslambaɗa, a ngaɗa ta: Dalahimam ga, kin suna, nʼnzi a zhè Zhiklè a nco ndo auda te ndev kinè, a woya ndohi nte deɓa ta tsena ma mbelaʼa te ma ga, a ta cè a ndav.

⁸ A Zhiklè man a sun ndav ndohai, a ngu malwudai a sam tengaʼa, a mva ta Mèzhèɓ Zhiklè lèmèlèmè ara man a nga,

⁹ a pèr ndo mpèrè ka ɓai, a mpana ndav tengaʼa man ta co a ndav lèmèlèmè ara man a nga.

¹⁰ Kin jkeda Zhiklè èhèmè; kin woy a kin kelawa ta wof a daʼai a ndohi Yèsu, man ko bababhi nga, ko kinè, ta slaha ta zhüɓa ɓai.

¹¹ Aman nga co a ndav, nga mbel nga a géɗ pombi Bi Yèsu Kristi, tenga ba lèmèlèmè.

¹² Nhèy ndo tèlèba ta nza tètè, a ta tsena ma Paul a Barnabas, ara man ta ngreda nrkedihai a skwi kumba man Zhiklè a ngau a nda tengaʼa a sam ndohi nte deɓa.

¹³ Te deɓaʼa man ta gaɗa ma klèng ma, Jacques a ngaɗa:

¹⁴ Dalahimam ga, va-tsenaʼa! Simon a nʼngra nga, ara man Zhiklè a baha ta ndohi nengaʼa te va ndohi nte deɓa, aman ta cè nzlembaɗ na.

¹⁵ Gar haha ma ndohi nhadka ma, ma nzuraʼa, ara man ta Windo te ɗèlèwèr Zhiklè:

¹⁶ I woy a i shkè deɓa, a i rèm gi David zaʼa, man mʼmbeɗ na hai. A i woya man i til njèkèɗiaʼa, a i Zlatseda a pa zaʼa,

¹⁷ a ta jhèdè ma Bi Zhiklè – njèkèɗi ndohi herkeda tèlèba, a ndohi nte deɓa man i woy ta a ndohi ga.

¹⁸ Bi Zhiklè a goɗ ar haha, nengaʼa man a gi skwi haha tèlèba, a ngreda auda nʼnzi a zhè.

¹⁹ Gar haha i gaɗa: Da dzakaɓama ta gèɗ a ndohi nte deɓa, man ta ngwoda ndav ta, ɓai!

²⁰ Aman sèi da winda ta ɗèlèwèr, aman ta jèkeda mbèh skwai, a mphömè, a skwi mʼmets mʼmetsai, a ta si Pombaz azɓai.

²¹ Daga zlèzlèa, ndohi Moise ta nju ma Moise te kokwar tèlèba, a ta jèngèʼa te gi njèngè ma Zhiklè a pats nshèk va pèc pècèk.

Ndohi ncèmma ta menda ma a deɓa

²² A ndohi sak a ndohi nhalaʼa a mpi ndohi Zhiklè tèlèba ta hur amba, a ta por ndohi te va tengaʼa, a ta zlinde ta a kokwar Antioche a verzi nda Paul a Barnabas: Jude, man nshibèn na Barsabas; a Silas, nsal-salhiaʼa te va kramamhi ta.

²³ A ta va ta ɗèlèwèr a rai, aman mwindèa te pa: Ndohi sak a ndohi nhalaʼa, a sam kramamhi nga a civèɗ Zhiklè, te va ndohi nte deɓa te kokwar Antioche a Syrie a Cilicie: Vo-mbali kinè!

²⁴ Aman nga tsenaʼa, ndohi ngiɗè te ndev nga, man nga nzlinde ta ka ɓai, to do, a ta dzakaɓama kinè gèɗ, a njè-ma tengaʼa,

²⁵ nga basla gèɗ nga, tèlèba a ndav staɗ, a nga por ndohi man nga zlinde ta a sam kinè a verzi nda Barnabas a Paul, man nga woy ta,

²⁶ ndohi man ta pi ndav a mizlinè Bi Yèsu Kristi.

²⁷ A nga zlündo Jude a Silas, aman ta da menda kinè ma ɗèlèwèr haha a ma ba.

²⁸ Ma Mèzhèɓ Zhiklè, a ma nga ba, aman nga fa kinè skwi mwuɗitpa ngiɗè a gèɗ azɓai, sèi skwi haha, man sèi kin giaʼa ndèzl:

²⁹ Va-jèkeda nʼndi vrai, kin sau Pombaz ɓai, kin ndau skwi mʼmets mʼmetsi ɓai, a kin gu mphömè ɓai! Aman kin ɓir va kinè te skwi haha, kin gi amba. Va-mbali di mènè!

³⁰ Aman ta zlinde ta ma, to do a kokwar Antioche, a ta ɓic ta ndohi Zhiklè tèlèba, a ta va ta ɗèlèwèr.

³¹ Aman ta jongo, ta wuffè a gèɗ ma man ta bid ta a vna.

³² A Juda a Silas, tengahia ba ndohi nhadka ma, ta bid ta kramamhi ta a ma kumba, a ta va ta wuɗai.

³³ Aman ta nza a pa nʼnzi kètè, kramamhi ta ta fedoko ta ma a civèɗ, a ta men ta a deɓa a sam ndohi nzlinde ta.

³⁴ [Aman Silas, nengaʼa a nhur amba man a nzi a pa, a kokwar Antioche.]

³⁵ A Paul a Barnabas ta nza a kokwar Antioche, ta senda ta, a ta njè ta ma Bi Zhiklè a nda ndohi ngiɗè kumba.

Paul a Barnabas ta kezli gèɗ

³⁶ Te deɓa kètè Paul a ngaɗa na Barnabas: Ngo-dokoy a deɓa a kokwar tèlèba, man nga nju ma Bi Zhiklè te pa, a nga da rka kramamhi nga, ta gu kè?

³⁷ Barnabas a woy a ta cè Jean, nshibèn na Marc, a nda tengaʼa.

³⁸ Aman Paul a woya ɓai, a nhur ndo man a wuckaɗ na te kokwar Pamphylie, a nʼnga mizlinè a ma ma a nda tengaʼa ɓai, amba aman ta cè a a nda tengaʼa ɓai.

³⁹ A ta vursl ma a géɗèʼa kumba, a ta kezla gèɗ ta, a Barnabas a nco Marc, a mdo a Chypre a wurom.

⁴⁰ A Paul a nco Silas, a to do a vna, a kramamhi ta, ta pe ta a ri pombi Zhiklè.

⁴¹ A nengaʼa a mbozl ndev kokwar Syrie a Cilicie, a mva ta wuɗai a mpi ndohi Zhiklè.