Actes 14 - Ma Zhiklè

Paul a Barnabas te kokwar Icone

¹ Te kokwar Icone, ta ɓica va lèmèlèmè, a ta nju ma Zhiklè te gi njèngè ndohi Juif. A ndohi Juif a ndohi man Juif ka ɓai kumba ta co Yèsu a ndav.

² Aman ndohi Juif man ta ca a ndav ɓai, ta poko ta gèɗ auda a ndohi nte deɓa, ha ta gu ndav a géɗ kramamhi ta man ta a civèɗ Zhiklè.

³ A ta nza a pa nʼnzi a zhè, a ta nju ma Bi Yèsu a mwuffè, a Bi Zhiklè a ngu malwuɗi a ma pombi nengaʼa, a ngu nrkedai a skwi tsaɗ tsaɗ a tengaʼa.

⁴ A nhèy ndo te kokwar, nkezla te va. Matrhiaʼa ta humda a ndohi Juif, matrhiaʼa a ndohi sak.

⁵ Aman ndohi Juif a ndohi nte deɓa, a ndohi mbibihiaʼa tengaʼa ta bozl va, ta derɗ ta, ta woy a ta kal ta ndohi sak a kwa.

⁶ Aman Paul a Barnabas ta tsenaʼa, ta hu ta a kokwar Lycaonie, Lystre a Derbe.

⁷ A sam tèlèba ta nju ma mbelaʼa.

Ta kol Paul a kwa te Lystre

⁸ Ndo vedal ngiɗè a zhè te kokwar Lystre, man a nza a verzai, te ngakaɗ na a nʼnda a sak ɓai.

⁹ A ntsena ngèɗè Paul. Aman nengaʼa a mpa na dai, a nrka ncè-a-ndav nengaʼa, a slaha a ntakaha, a goɗ ngèɗè a wuɗai:

¹⁰ Slambaɗa, zlatsa a sak ngaya! A nengaʼa a nzevau, a ndè.

¹¹ Aman ndohi ta rka skwi man Paul a gau, ta hüno a ta gaɗa a ma Lycaonie: Zhiklèhai ta shkèhai a sam nga ara ndohai.

¹² A ta baha na Barnabas Jupiter, a Paul Hermes, aman nengaʼa ndo ncèmma.

¹³ Aman ndo mvi skwi a Zhiklè Jupiter te gi Jupiter, a ma kokwar ta, a ncko zlèhai, a skwi ngolala, a ta woy a ta zla ta skwi a nda ndohi tèlèba.

¹⁴ Aman Barnabas a Paul, ndohi sak, ta tsenaʼa, ta kuratseda maslaka tengaʼa aussa, a ta hu te ndev ndohai, a ta goɗ a wuɗai:

¹⁵ Kinè ndohai, kin gi mè? Nga ba, nga ndohi lèmèlèmè ara kinè, a nga njè kinè ma mbelaʼa, aman kin ngwèdè ndav, a kin menkada deɓa te mʼmbèh skwi ambalai a sam Zhiklè a nshèffè, nengaʼa man a gu giɗfèk a herkeda, a iyam mbiaʼa a skwi tèlèba te pa.

¹⁶ Aman zlèzlèa a njèke ta ndohi herkeda tèlèba, te man ta dzodzor civèɗ ara ndav tengaʼa man a woyaʼa.

¹⁷ Aman a mva ta skwi malwuɗi a skwi man amba kumba man a giaʼa: iyam te zhiklè a via, a ta ɓicè skwai, a ngu aman ndav ta latsatsaʼa a skwi nʼndai, a ta wuf-fè.

¹⁸ Aman ta goɗ ma haha, ta slaha ta mbatseda ndav ndohi man ta zla ta skwi a hi ɓai (ara man ta va na a Zhiklè).

¹⁹ Aman ndohi Juif te kokwar Antioche a Icone ta shkè a pa, a ta poko ta gèɗ auda a ndohai, a ta kol Paul a kwa, a ta ngazldauda te kokwar, a ta huro, mʼmetsa ma.

²⁰ Aman ndohi Yèsu ta tèuda a pa, a nengaʼa a nslambaɗa, a mdo a kokwar. Te mangoslèmaʼa to do a ma a Barnabas a kokwar Derbe.

²¹ A ta nju ma mbelaʼa te kokwar, a ta ga ta ndohi kumba a golahi Yèsu, a to do a deɓa a kokwar Lystre a Icone a Antioche,

²² a ta va ta wuɗi a golahi Yèsu, a ta bid ta, aman ta nzi taraʼa te ncè-a-ndav tengaʼa. Ta gaɗa, sèi nga bi-zhè a ndev skwi man wuɗitpa kumba, ga nga dè a kokwar Bi Zhiklè.

²³ A ta pau ndohi mɓer ndohai a sam mpi ndohi Zhiklè tèlèba, a ta tsu rai, a ta jèkeda skwi nʼndai, a ta pe ta a ri Bi Yèsu, nengaʼa man ta co a ndav.

Mshkè ta a deɓa a kokwar Antioche

²⁴ A ta bozl ndev kokwar Pisidie, a ta shkè a kokwar Pamphylie,

²⁵ a ta nju ma Zhiklè te kokwar Perge, a to do a hai a kokwar Attalie.

²⁶ Te pa to do a deɓa a kokwar Antioche a wurom, man pombi Zhiklè a nzlinde ta te pa, a sam mizlinè man a woya a, ta giaʼa.

²⁷ Aman ta shkè a pa, ta ɓic ta ndohi Zhiklè, a ta ngreda ta skwi tèlèba man Zhiklè a gau a nda tengaʼa, ara man a winè ntamagi a sam ndohi herkeda ngiɗè, aman ta cè a ndav.

²⁸ A ta nza a pa nʼnzi a zhè a sam ndohi Yèsu.