Actes 13 - Ma Zhiklè

¹ Te va mpi ndohi Zhiklè te kokwar Antioche, ndohi nhadka ma, a ndohi njèngè ta zhè: Barnabas a Simon, man ta baha na Niger, Lucius te Cyrène, a Manahen, man ta gra a nda bi Hérode a Saul.

² Aman ta ndzaraha mizlinè tengaʼa a sam Bi Zhiklè, a ta jèkeda skwi nʼndai, Mèzhèɓ Zhiklè a ngaɗa ta: Va-helka ta nda Barnabas a Saul auda, a ta gi mizlinè man i baha ta a pa!

³ A ta jèkeda skwi nʼndai, a ta tsu rai, a ta fa ta ri a gèɗ, a ta va ta civèɗ aman a ta dè.

Ndohi sak ta njè ma Zhiklè te Chypre

⁴ Tengaʼa ta shkè a kokwar Séleucie, ara man Mèzhèɓ Zhiklè a zlinde ta. Te pa to do a wurom a Chypre.

⁵ Aman ta shkè a kokwar Salamine, ta nju ma Zhiklè te gi njèngè ndohi Juif, a Jean-Marc a ntakaha ta.

⁶ Aman ta sawala tʼherkeda te ndev iyam, ha a ndikè a kokwar Paphos, ta ngots ndo mʼmbèh skwai, ndo nhadka ncèkèlma, ndo Juif, nzlembaɗ na Bar Jésus.

⁷ Nengaʼa a zhè a sam Sergius Paulus, ngomna, ndo maya. A mbaha ta nda Barnabas a Saul a sam na, a woya man a tsena ma Zhiklè.

⁸ A Elymas, nzlembaɗ nengaʼa a daʼai kokwar na, ndo mʼmbèh skwai, a woya a ngedassa civèɗ Sergius ngomna, aman a cè a ndav.

⁹ Aman Saul, a nzlembaɗ na Paul, nʼndha a Mèzhèɓ Zhiklè nkezlaʼa, a mpu diaʼa,

¹⁰ a ngaɗa: Ka tser madzagai, ndav ngaya nʼndha a ma nʼngwèɗè ndo tèlèba, a skwi ambaɓi tèlèba; ka ndo mayam skwi nzuraʼa. Ka jèkè azɓai aman ka gedassa civèɗ Bi Zhiklè dè?

¹¹ Na haha ri Bi Zhiklè a zhè a géɗ ngaya; ka ndi a mandazlai, nʼnzi kètè ka da rka pats azɓai.

¹² A nasa nasa a nʼnde na mandazlai, a tètèmè va, a woy ndo ncè na ma. Aman Sergius ngomna a rka skwi haha, a nco a ndav, a nrzl na a géɗ ma Bi Zhiklè.

Paul a Barnabas te Antioche, a Pisidie

¹³ Aman Paul a ndohi man ta zhè a sam na, to do a wurom te kokwar Paphos, a ta shkè a kokwar Perge, te Pamphylie. A Jean a mʼmen na a deɓa a kokwar Jérusalem.

¹⁴ Tengaʼa te kokwar Perge to do a ma ma, a ta shkè a kokwar Antioche te Pisidie, a to do a gi njèngè a pats nshèk va, a ta nza a va ndohai.

¹⁵ A ndohi njè ma ta jongo ma Zhiklè, man Moise a va ta, a ma ndohi nhadka ma klèng ma, ndohi mbibihiaʼa te gi njèngè ta baha ta golahi Yèsu, a ta dzhaɗ ta: Dalahimam ga, aman kin ngots ma mbid ta ndohai, va-gaɗa ta antanta ma!

¹⁶ A Paul a nslambaɗa, a ngeda ta rai, a ngaɗa: Kinè ndohi Israel, a kine man kin gi zlau Bi Zhiklè, va-tsenaʼa!

¹⁷ Bi Zhiklè ndohi Israel, a mpar ta babahi nga, a nʼnzal ta ndohi man ta nza te mbrok te kokwar Egypte, a nde ta auda te kokwar sa a wuɗi na.

¹⁸ Mvi kulkul faɗ, Bi Zhiklè a nʼnzede ta a pa, a géɗ skwi man ta gu tʼhèshèkèɗ.

¹⁹ A ngedassa ndohi kokwar-bi tsaraɗ te kokwar Canaan, a nkezla ta kokwar, a mva ta a ri ta.

²⁰ Te deɓaʼa a mva ta ndohi kita, a gi ara mvi 450, ha pats man Samuel, ndo nhadka ma, a mshkè.

²¹ Te deɓ nasa ta dzhoɗo bai; a Zhiklè a mva ta Saul, kra Kis, ndo te verzi Benjamin. A nengaʼa a ngu bai mvi kulkul faɗ.

²² Aman a nkoldko nengaʼa auda ma, a mfeda David a bi ta, te nengaʼa a gi malwudai, a gaɗa: I ngots David, kra Jesse, ndo ara man ndav ga a woyaʼa, nengaʼa a da gi skwi tèlèba man i woyaʼa.

²³ Te verzi nengaʼa Zhiklè a nslambaɗda Yèsu, ara man a mpasla nga ri zlèzlèa, ndo mbél ndohi Israel.

²⁴ Jean a ntül mshkè nengaʼa, a njè ta ndohi Israel tèlèba ma nʼngwèdè ndav a ma baptême.

²⁵ Aman Jean a ndeva mizlinè nengaʼa ma, a ngaɗa: I nengaʼa ka ɓai, man kin huro, i nengaʼa. Aman na haha, nengaʼa a shkè te deɓ ga, nengaʼa man i gi huyokokoʼa, i slaha man i prè teɓa kotokoroh nengaʼa ɓai.

²⁶ Kinè, dalahimam ga, kinè te verzi Abraham, a kinè, man kin gi zlau Zhiklè, ma mʼmbel ndo haha ta zlündo a sam nga.

²⁷ Aman ndohi te kokwar Jérusalem a ndohi mbibihiaʼa ta sun ndo haha ɓai. Ta sun ngèɗè ndohi nhadka ma, man ta jongo a pats nshèk va pèc pècèk, ɓai. Aman ta gu ara ma man ndohi nhadka ma ta gaɗa, a ta ga na kita a gèü.

²⁸ Ko ta sun skwi man ta keɗaʼa a géɗèʼa ɓai, ta tsu ri a Pilate, aman a nkeɗaʼa.

²⁹ Aman ta ndeva skwi tèlèba ma, man ɗèlèwèr Zhiklè a mwindo a geɗ nengaʼa, ta ckoɗahi a wof, a ta feda a gi dzavai.

³⁰ Aman Zhiklè a nslambaɗde-koɗauda te ndev ndohi mʼmetsaʼa.

³¹ A nengaʼa a ngudoko ta va a dai a ndohi man to do te kokwar Galilée a kokwar Jérusalem a vna. Antanta ta ndohi malwuɗihi nengaʼa a sam ndohai.

³² A nga njè kinè ma mbelaʼa, man Zhiklè a mpasla ta ri a bababhi nga.

³³ Zhiklè a nrufa mpèsl ri nengaʼa a sam di nga, wudahi tengaʼa, aman a nslambaɗda Yèsu te ndev ndohi mʼmetsaʼa, ara man ta Windo te Psaume 2: Ka kra ga, a patsna i fe ka.

³⁴ Aman a slambaɗkaɗauda te Mʼmetsai, a da huslè azbai, a goɗ ar haha: I woy a i va kinè skwi nkezlaʼa a vava, ara man i pasla na ri a David, ndo nlèbèslèa.

³⁵ Gar haha a goɗ a sam ngiɗè: Ndo ngaya nkezlaʼa ka jèkè azɓai, aman a nda husl na.

³⁶ David man a gu skwi man Zhiklè a woyaʼa te nshèffè nengaʼa, a mʼmets na, kala a va babhi na, a nhusl na ma.

³⁷ Aman nengaʼa, man Zhiklè a slambaɗdekoɗauda te mʼmetsai, nenga a a nhusl ɓai.

³⁸ Gar haha, dalahimam ga, sèi va-suna, te nengaʼa man ta njè kinè ma mprè malai, te ncè nengaʼa a ndav kin ngots ngi-zuraʼa.

³⁹ Ma kita Zhiklè, man Moise a va kinè, a slaha a mva kinè ngi-zuraʼa azɓai.

⁴⁰ Va-gu maya, aman skwi man ndo nhadka ma a goɗo, da shkè a gèɗ kinè ɓai.

⁴¹ Va-pu dai, kinè ndohi nkwola ma Zhiklè, va-rzl kinè, a kin gedas kinè! Aman i da gi skwi a pats man a kinè, skwi man ko ndo ngiɗè a ngreda kinè, kin ca a ndav kinè ɓi genè.

⁴² Aman ndohi Juif ta jèkeda gi njèn-gè, ndohi ngiɗè ta dzhoɗo, aman a pats nshèk va man a ma, ta shkè a ta njè ta ma zaʼa.

⁴³ Aman ta kezla gèɗ ta te gi njèngè, ndohi Juif kumba ta dzodzor Paul a Barnabas a gwoli Juif man ta gu zlau Zhiklè. A Paul a Barnabas ta fa ta ma a gèɗ, a ta gaɗa ta, aman ta gshè va a pombi Zhiklè azɓai.

⁴⁴ A pats nshèk va man a ma, ndohi kokwar tèlè ta ɓicko va, aman ta tsena ma Zhiklè; njèkè ndohi kètè genè man ta da a sam mɓica va ɓai.

⁴⁵ Aman ndohi Juif ta rka ta ndohai, ta gu srak, a ta tseda na ma Paul a pa, a ta durdo a vata.

⁴⁶ A Paul a Barnabas ta goɗ a zlau ka ɓai: Ar agassa amba, man ta gaɗa kinè ma Zhiklè nshè-lèkuraʼa; aman antanta kin kwolaʼa, a kin ngreda auda, ara man nshèffè a mèdèp ambaha kinè ɓai. Na haha, nga ngwèdè gèɗ nga a deɓa a sam verzi ndohi herkeda ngiɗè.

⁴⁷ Aman Bi Zhiklè a gaɗa nga arsa: I ge ka a skwi nhel sam ndohi herkeda, a ka gi a skwi mbél ndo, ha verzi herkeda.

⁴⁸ Aman ndohi nte deɓa ta tsena ma haha, ta wuffè holholaʼa, a ta slubordo ma Zhiklè, a ta co a ndav, tengaʼa tèlèba, man Zhiklè a mpe ta hi a nshèffè a mèdèp.

⁴⁹ A ma Bi Zhiklè a zlèzlèmè a sam tèlèba.

⁵⁰ A ndohi Juif ta poko ta gèɗ auda a ngwozi man ta woy Zhiklè, a ndohi mbibihiaʼa te kokwar. Ta gau, aman ta dzama Paul a Barnabas, a ta dzar ta aussa a ma kuma tengaʼa.

⁵¹ A tengaʼa ta tassa lokotor a sak tengaʼa, a géɗ ndohi Juif sa, a to do a kokwar Icone.

⁵² Ndav ndohi Yèsu nʼndha a mwuffè a Mèzhèɓ Zhiklè nkezlaʼa.