Actes 12 - Ma Zhiklè

Ta keɗa Jacques, ta feda Pierre a dangai

¹ Te ndev nasa bi Hérode a mpar ta ndohi ngiɗè kètè te ndev mpi ndohi Zhiklè, aman a ga ta matakwan.

² A nkeda Jacques, kramam Jean, a kafahi gwèsh.

³ Aman a rka, ambaha ta ndohi Juif, a nʼndo a ma ma, a ngso Pierre ba, a pats ngolala skwi nʼndi man skwi nshé-gèrè a te di ɓai.

⁴ Aman a ngso, a mfeda a gi dangai, a mva ta a ri sojèhi, sojèhi faɗ a faɗ man ta ɓerèʼa pèc pècèk. A nhuro, a woya a nzlatseda a sam ndohi te deɓ ngolala Pâque.

⁵ A ta ɓür Pierre te gi dangai. Aman mpi ndohi Zhiklè ta tsu ri a Zhiklè pèc pècèk a géɗ nengaʼa.

Pierre a shke auda te gi dangai

⁶ Aman Hérode a woya a nzlatseda a sam ndohai, a vaɗ sa, Pierre a nzhuna te ndev sojèhi cèw, ndzawa a cèlèlèu cèw, a ndohi mɓer ntamagai ta ɓüro, ta a ntamagi dangai.

⁷ Na haha gol Bi Zhiklè a mshkè, a nhela sam te gi dangai, a ntsu zlazlar Pierre, a mpiɗèkwuda, a ngaɗa: Slambaɗa! A cèlèlèu a nwush na hai te ri nengaʼa tsam tsam.

⁸ A gol Zhiklè a ngaɗa na: Mana hutèɗ ngaya, peda kotokoroh ngaya a sak! A nengaʼa a ngu arsa. A ngaɗa na: Kalda maslaka ngaya a va, a ka dzadzarkayè!

⁹ A nengaʼa a ndo auda, a ndzodzora, a sun skwi man a gia ɓai, a nhuro, a nrka gol Zhiklè te nshunè.

¹⁰ A ta beza a tsagi sojèhi faɗ nshèlèkurhiaʼa, a tsagi ngiɗè te deɓaʼa zaʼa, a ta shkè a sam ntamagi züdo, man a ma kokwar, a ntamagi sa a mwin na a ri na. A to do auda, a ta kala na ma a civèɗ, a nasa nasa gol Bi Zhiklè a njèkeda a pa.

¹¹ Aman maya Pierre a mʼmenkaɗ a pa ma, a ngaɗa: Antanta i sun a vava, Bi Zhiklè a nzlündkoɗi gol nengaʼa, aman a mbelyè te ri Hérode, te skwi tèlèba man ndohi Juif ta woy a ta giaʼa.

¹² Aman Pierre a hur arsa, a mshkè a ntamagi Marie, mam Jean, nshibèn na Marc. Aman ndohi kumba ta ɓica va, a ta tsu rai.

¹³ Aman Pierre a ntsu a ntamagai, dem mizlinè a mshkè, a fi zlembaɗaʼa; nzlembaɗ na Rhode.

¹⁴ Aman a tsena daʼai Pierre, a mwina ntamagi ɓai a géɗ mwuffè te ndav, a nhu a gai, a nʼngra ta ndohi te pa tèlèba: Pierre nzlatsa a ntamagai!

¹⁵ Ta gaɗa na: Ka rzla dè? Aman demaʼa a ngaɗa: A vava, nengaʼa!

¹⁶ Ta gaɗa: Gol Zhiklè na! A Pierre a ntsau ntamagi zaʼa.

¹⁷ Aman ta winèʼa, ta rkaʼa, a ta rzl ta. A nengaʼa a ngeda ta rai, aman ta nzi tètè, a ngreda ta, ara man Bi Zhiklè a ndaʼa auda te gi dangai, a ngaɗa: Va-da ngra na Jacques a kramamhi ga ngiɗè!

¹⁸ A ndo a sam ngiɗè. Aman sam nciɗa ta, ndav sojèhi a mʼmbeɗ na a géɗ skwi man a gu a Pierre.

¹⁹ Hérode a ndzhoɗo, a nʼngatsa ɓai, a mbaha ta ndohi mɓer ntamagai a kita, aman a mbazl ta. Te deɓaʼa Hérode a njèkeda kokwar Judée, a nʼnza a kokwar Césarée nʼnzi kètè.

Mʼmetsi Hérode

²⁰ A nhuro a woy ngi var a ndohi Tyr a Sidon. Aman ndohi ta shkè a sam na a ndav staɗ, a ta bidkoɗi Blastus, ndo mʼmenda na bai, a ta dzhoɗ gumai. Aman kokwar ta a ngots skwi nʼndi a ri bai.

²¹ Aman a pats ngiɗè, bi Hérode a feda maslaka bai a va, a nʼnza a géɗ sam nʼnzi bi nengaʼa, a njè ta ma bi nengaʼa.

²² A ndohi tèlèba ta boho: Ngèdè ndo ka ɓai, ngèɗè Zhiklè!

²³ A nasa nasa gol Bi Zhiklè a ntsau, a géɗ man a mva na nʼnjèlè a Zhiklè ɓai. Mazlarihai ta ndedama, a mʼmets na.

Barnabas a Saul

²⁴ A ma Zhiklè a zlèzlèmè a ma ma.

²⁵ A Barnabas a Saul, aman ta va ta skwi ntakaha ta a kramamhi ma, ta shkè a deɓa te kokwar Jérusalem. A ta cko Jean, nshibèn na Marc, a rai.