Actes 11 - Ma Zhiklè

Pierre a mʼmenda ta ma a deda a ndohi Zhiklè te Jérusalem

¹ A ndohi sak a kramamhi a civèɗ Zhiklè te kokwar Judée ta tsena labar maʼa, aman ko ndohi man verzi ta tsaɗ ta co ma Zhiklè.

² Aman Pierre a shkè a kokwar Jérusalem, ndohi Juif ta gu ma a nengaʼa, a ta gaɗa:

³ Ko do a gi ndohi man ngwon ta nʼngel ɓai, a ka ndau skwai a nda tengaʼa.

⁴ A Pierre a hüno a ngreda ta skwi staɗ staɗ tèlèba, a ngaɗa:

⁵ I zhè te kokwar Joppé; i tsu rai, a skwi ngiɗè a nrkay a dai: Skwi ngiɗè ara jampai mbiaʼa, man ta gso te tsagi faɗ, a nshkèhai, ta ckoɗahai te zhiklè a sam ga.

⁶ Te pa i rka skwi a sak faɗ man a zhè tʼherkeda, a skwi dak a maturdihai a ɗiakihai tʼhwaɗ giɗfèk.

⁷ I tsena ngèɗè staɗ man a gaɗayè: Pierre, slambaɗa, kedaʼai a ka ndau!

⁸ A i gaɗa: Aʼai, Bi Zhiklè, i tara skwi ambalai a skwi nlizhèa di ɓai! Aman ngèɗè te zhiklè a ngaɗkayè macecèwaʼa:

⁹ Skwi man Zhiklè a sla na nlizhëɓai, ka da gaɗa skwi nlizhèa ɓai!

¹⁰ Skwi haha a gu sak makar, a ta ceda skwi tèlèba a deɓa a zhiklè.

¹¹ Na haha, ndohi makar ta zlatsa a ma gi man iyè te pa, man ta zlündo te kokwar Césarée, a sam ga.

¹² A Mèzhèɓ Zhiklè a ngaɗayè, aman i dè a nda tengaʼa, aman i pi gèɗ cèw azɓai.

¹³ A kramamhi haha mokwa ta shkè a verzi ga, a ngo do a nda tengaʼa a gi ndoʼa. A nengaʼa a nʼngra nga, ara man a rka gol Zhiklè te gi nengaʼa, man a gaɗa na:

¹⁴ Zlündo ndo a kokwar Joppé, a ka baha na Simon, man nshibèn na Pierre, nengaʼa a da gaɗa ka, ara man ka a gi ngaya tèlèba ta da mbel ta.

¹⁵ Aman i hüno ngèɗè, Mèzhèɓ Zhiklè a nkalkaɗahai a géɗ tengaʼa, lèmèlè-mè ara man a sam nga te nhinkaɗ na.

¹⁶ A i hur ma Bi Yèsu man a gaɗa: Jean a ngu baptême a iyam, aman sèi ta da ga kinè baptême a Mèzhèɓ Zhiklè nkezlaʼa.

¹⁷ Aman Bi Zhiklè a mva ta skwi lèmèlèmè ara man a nga, aman nga co Bai Yèsu Kristi a ndav. Kos i wa, man i gedassa skwi man Zhiklè a giaʼa!

¹⁸ Aman ta tsenaʼa, ta nza tètè, a ta slubordo Zhiklè, a ta gaɗa: Gar haha Zhiklè a gi aman ndohi te verzi ta tsaɗ tsaɗ ta ngwèdè ndav ta, a ta ngècè nshèffè.

Mpi ndohi Zhiklè te kokwar Antioche

¹⁹ Aman tengahi man ta venda gèɗ ta a géɗ skwi mwuɗitpa, man a shkè a géɗ Etienne, to do a kokwar Phénicie, Chypre, a Antioche, a ta njè ta ma mbelaʼa a ndohi ngiɗè azɓai, sèi a ndohi Juif.

²⁰ Ndohi ngiɗè kètè ta zhè a sam tengaʼa, ndohi Chypre a Cyrène, a ta shkè a kokwar Antioche, a ta gaɗa ta ma haha a ndohi Grec ba, a ta njè ta ma mbelaʼa te Bai Yèsu.

²¹ A wuɗi Bi Zhiklè a zhè a nda tengaʼa, a ndohi kumba ta co a ndav, a ta menkada deɓa a sam Bi Zhiklè.

²² A mpi ndohi Zhiklè te kokwar Jérusalem ta tsena labar ma haha, a ta zlündo Barnabas a kokwar Antioche.

²³ Nengaʼa, aman a mshkè, a nrka pombi Zhiklè, a wuffè, a bid ta tèlèba, aman ta nzi taraʼa a sam Bai Yèsu.

²⁴ Aman Barnabas ndo man amba, nʼndha a Mèzhèɓ Zhiklè nkezlaʼa, a nco a ndav a vata.

²⁵ Ndohi kumba ta co Bai Yèsu a ndav. Aman Barnabas a mdo a kokwar Tarse, a woy Saul te pa.

²⁶ Aman a ngotso, a ndaʼa a kokwar Antioche. Mvi staɗ ta ɓica ndohi Zhiklè te pa, a ta senda ta ndohi kumba. Te Antioche ta hüno a mbèhè golahi Yèsu ndohi Kristi (chrétien).

²⁷ Te ndev nasa ndohi nhadka ma ta shkè te Jérusalem a to do a kokwar Antioche.

²⁸ Staɗ te ndev tengaʼa, nzlembaɗ na Agabus, a nslambaɗa, a nhodko te Mèzhèɓ Zhiklè, mi mbiaʼa man a di a shkè a géɗ herkeda tèlèba. Te deɓaʼa a ngu arsa te va man Claude bai.

²⁹ Te ndev golahi Yèsu, ta vau skwi a géɗ kramamhi ta te kokwar Judée, staɗ staɗ ara man a slaha, aman ta takaha ta a vna.

³⁰ A ta zlündo skwi man ta ɓüco, a sam ndohi mɓer ndohi Zhiklè, a ri a Barnabas a Saul.