Actes 10 - Ma Zhiklè

Pierre a Corneille

¹ Ndo ngiɗè a zhè te kokwar Césarée, nzlembaɗ nengaʼa Corneille, bi sojè ndohi var Italie,

² a woy Zhiklè, a gi zlau Zhiklè, a ndohi gi nengaʼa tèlèba. A vi skwi a ndohi kumba, a tsi ri a Zhiklè pèc pècèk.

³ A pats ngiɗè, pats nlaɓasla, gol Zhiklè a nrka na dai, a ngaɗa na: Corneille!

⁴ A nengaʼa a mpu diaʼa, a ngu zlau, a ngaɗa: Bi Zhiklè, mè? A nengaʼa a ngaɗa na: Zhiklè a nco ntsi ri ngaya, a skwi man ka va ta ndohai ambaha.

⁵ Anai zlündo ndohi a kokwar Joppé, a ka baha na ndo ngiɗè, nzlembaɗ na Simon, nshibèn na Pierre, ndo mbrok te gi ndo ngürv bkwai.

⁶ Simon ngiɗè, gi nengaʼa a ma iyam mbiaʼa.

⁷ Aman gol Zhiklè man a gaɗa na Corneille, kal na ma, Corneille a mbaha ta ndohi mizlinè gi nengaʼa cèw, a sojè staɗ, man a gi zlau Zhiklè, te ndev sojèhi nengaʼa,

⁸ a nʼngreda ta ma tèlèba, a nzlinde ta a kokwar Joppé.

⁹ Te mangoslèmaʼa, aman ta zhè a civèɗ ndul ndul a ma kokwar, Pierre a nteva a géɗ gai, géɗ pats, aman a tsi rai.

¹⁰ A mi a nkeɗaʼa, a woya a nʼndi skwai. Aman ta tila na skwi nʼndi nengaʼa dai, skwi ngiɗè a nrka na dai.

¹¹ A nrka giɗfèk mwinèʼa, a skwi mbiaʼa ngiɗè ara jampai man ta gso te tsagi faɗ, a mshkèhai, a ta ckoɗa herkeda.

¹² Te pa skwi a sak faɗ tsaɗ tsaɗ man a zhè tʼherkeda, a maturdihai, a ɗiakihi tʼhwaɗ giɗfèk.

¹³ A ntsena ngèɗè staɗ, man a gaɗa na: Pierre, slambaɗa, keɗaʼai a ka ndau!

¹⁴ A Pierre a ngaɗa: Aʼai, Bi Zhiklè, i tara skwi ambalai a skwi nlizhèa di ɓai.

¹⁵ A ngèɗè a ngaɗa na macecèwaʼa: Skwi man Zhiklè a sla na nlizhèɓai, ka da gaɗa skwi nlizhèa ɓai!

¹⁶ A ngu arsa sak makar, a ta ceda a deɓa a zhiklè.

¹⁷ Aman Pierre a sun verzia ɓai, a nhur te ndav na; Skwi man a rkay a di haha mè? A ndohi man Corneille a zlinde ta, ta dzhoɗo gi Simon, a ta zlatsa a ntamagai,

¹⁸ a ta dzhoɗo: Simon, man nshibèn na Pierre, na haha de?

¹⁹ Aman Pierre a hérè skwi man a rka na dai te ndav na genè, Mèzhèɓ Zhiklè a ngaɗa na: Na haha, ndohi makar ta woy ka.

²⁰ Slambaɗa, sulomahai, a ko do a nda tengaʼa, ka pu gèɗ cèw ɓai! Iye nzlinde ta.

²¹ A Pierre a mshkèhai a sam ndohai, a ngaɗa: I ndo man kin woyaʼa. Kin war mè!

²² Ta gaɗa: Corneille, bi sojè, ndo nzuraʼa, man a gi zlau Zhiklè, ndo man ma nengaʼa ambaha ta ndohi Juif tèlèba, gol Zhiklè nkezlaʼa a ngaɗa na, da baha ka a gi nengaʼa, da tsena ma ngaya.

²³ A Pierre a nhel ta a gai. Te mangoslèmaʼa, Pierre a mdo a nda tengaʼa, a kramamhi ngiɗè kètè te kokwar Joppé to do a verzi tengaʼa.

²⁴ Te mangoslèmaʼa ngiɗè, ta shkè a kokwar Césarée. Corneille a zhèr ta, a mɓic ta gwoli nengaʼa, a mandalahi nengaʼa ma.

²⁵ Aman Pierre a mshkè, Corneille a nhaka na ma, a nkalahi a deɓ sak nengaʼa.

²⁶ Aman Pierre a nslambaɗda, a ngaɗa: Slambaɗa, ko i ha i ndo.

²⁷ Aman ta goɗ a vna, a mdo a pa, a nʼngats ta ndohi kumba, aman ta ɓica va.

²⁸ A nengaʼa a ngaɗa ta: Kin suna, ambaɓai a sam ndo Juif man a dè a gi ndohi man verzi ta tsaɗ, aman a nzi a va tengaʼa. Aman Zhiklè a ngrayè: Ka sla na ndo ambaɓai, a nlizhèa ɓai, ko staɗ!

²⁹ Gar haha aman ta bahkayè, i gaɗa i dè azbi ɓai. Anai i dzhaɗ kinè, kin bahay èhèmè?

³⁰ A Corneille a ngaɗa: Mʼmèn faɗ i nda skwa ɓai, ha pats nlaɓasla, i tsu ri te gi ga. Na haha, ndo ngiɗè a nzlatsa a sam ga, a maslaka nslekaɗaʼa,

³¹ a ngaɗa: Corneille, Zhiklè a nco ntsi ri ngaya, a nhur skwi man ka va ta ndohai.

³² Zlündo ndo a kokwar Joppé, a ka da baha na Simon, nshibèn na Pierre, ndo mbrok te gi Simon, ndo ngürv bkwai, a ma iyam mbiaʼa.

³³ A nasa nasa a i zlündo ndo a sam ngaya, a ka gu amba aman ka shkè. Ani haha nga tèlèba nga ɓica va a sam di Bi Zhiklè, aman nga tsena ma tèlèba man Bi Zhiklè a ngaɗa ka, a ka menda nga.

Pierre a nje ma te gi Corneille

³⁴ A Pierre a hüno ngèɗè: Anai i rka a vava, Zhiklè a pèr ndo mpèrè azɓai;

³⁵ aman te ndev ndohi tèlèba, nengaʼa man a gi zlauaʼa, a gi zuraʼa, ambaha.

³⁶ Kin sun ma Zhiklè man a zlinda ta ndohi Israel, a njè ta ma mbelaʼa, ma gumai te Yèsu Kristi (nengaʼa Bai a géɗ ndohi tèlèba);

³⁷ a kin suna, ara man a do a kokwar Judée tèlèba, a hüno te kokwar Galilee, te deɓ baptême man Jean a njo;

³⁸ kin suna, ara man Zhiklè a va na wuɗai a Yèsu ndo Nazareth haha, te Mèzhèɓ Zhiklè nkezlaʼa. A nengaʼa a nsawala, a ngu man amba, a mʼmbel ta ndohi tèlèba man bi madzagi a ga ta, te man Bi Zhiklè a zhè a nda nengaʼa.

³⁹ Nga, ndohi malwuɗihi te skwi tèlèba man a gau te kokwar Judée, te kokwar Jérusalem. Nengaʼa ta keɗaʼa, ta gezlalaʼa.

⁴⁰ A Bi Zhiklè a nslambaɗdeko nengaʼa auda te pats mamakaraʼa, a ngu aman a gudko va a di a ndohi tèlè ka ɓai, aman a nga, ndohi malwuɗihi man Zhiklè a mpar nga nshèlèkuraʼa,

⁴¹ aman nga ndau a nga sau skwai a nda nengaʼa, te deɓaʼa man a slambaɗkaɗauda te mʼmetsi ma.

⁴² A Yèsu a mfa nga ma a gèɗ, aman nga njèʼa a ndohi tèlèba, aman nga ngrédèʼa, Zhiklè a nʼnga Yèsu a ndo kita a géɗ ndohi a nshèffè a ndohi mʼmetsaʼaba.

⁴³ Ndohi nhadka ma tèlèba ta gu malwuɗi a géɗ nengaʼa: te nzlembaɗ na mali ndohi tèlèba man ta co a ndav, mpraʼa.

Ndohi nte deda ta ngècè Mèzhèɓ Zhiklè

⁴⁴ Te ngèɗè Pierre, Mèzhèɓ Zhiklè nkezlaʼa a nkalkaɗahai a géɗ ndohi tèlèba man ta tsenaʼa.

⁴⁵ A ndohi Juif man ta co a ndav, man ta shkè a nda Pierre, ta rzl ta, aman ko ndohi man verzi ta tsaɗ ha ta ngots Mèzhèɓ Zhiklè nkezlaʼa.

⁴⁶ Aman ta tsena ara man ta goɗ nèʼèn tsaɗ tsaɗ, a ta slubordo Zhiklè.

⁴⁷ A ta menda na Pierre: Nga slaha nga gedassa civèɗ ndohi haha a ta gi baptême dè? Ta ngots Mèzhèɓ Zhiklè lèmèlèmè ara nga!

⁴⁸ A Pierre a ngaɗa, aman ta ga ta baptême a nzlembaɗ Bi Yèsu Kristi. A ta tsu fi a Pierre, aman a nzi a sam ta mʼmèn kètè.