Actes 1 - Ma Zhiklè

Mpèsl ri a gèɗ Mèzhèɓ Zhiklè nkezlaʼa

¹ Théophile ga, te ɗèlèwèr nshèlèku-raʼa i Windo skwi tèlèba man Yèsu a gau, man a njo,

² man a hün mizlinè na, ha pats man Zhiklè a nceda a zhiklè. Ga a dè na zhiklè, a mva ta ma nengaʼa te Mèzhèɓ Zhiklè nkezlaʼa a ri a ndohi sak, man Zhiklè a mpar ta.

³ Te deɓ man a mʼmets na, a ngudoko ta va a dai mʼmèn 40, a ngreda ta na zhè a nshèffè, te skwi tsaɗ tsaɗ, a njè ta ma kokwar-Bi-Zhiklè.

⁴ Pats ngiɗè, man ta a sam skwi nʼndai, a ngaɗa ta: Kin jèkeda kokwar Jérusalem ɓai, aman vo-zhor skwi Zhiklè, Bab kinè, man a mpasla kinè rai, ara man kin tsena te ma ga.

⁵ Aman Jean a ngau baptême a iyam; aman te deɓ mʼmen kètè kin da ngècè baptême te Mèzhèɓ Zhiklè nkezlaʼa.

Nde Yèsu a zhiklè

⁶ A ndohi man ta a sam na, ta dzhoɗo, a ta gaɗa: Bai, a pats nasa ka da tilè kokwar-Bi-Israel a pa za dè?

⁷ Aman nengaʼa a ngaɗa ta: Ma kinè ka ɓai, aman kin shin patsaʼa a samaʼa, man Bi-Zhiklè a giaʼa, a wuɗi-Bi nengaʼa staɗgenè.

⁸ Aman Mèzhèɓ Zhiklè nkezlaʼa a shkè-hai a gèɗ kinè, kin da ngècè wuɗai, a kin ndi a ndohi malwuɗihi ga te kokwar Jérusalem, te kokwar Judée tèlèba, te kokwar Samarie, ha ndè a verzi herkeda.

⁹ Aman a ngoɗ ma haha, ta rka man a dè na, vani staɗ a ndzova a sam di ta.

¹⁰ Aman ta pi di a verzi nengaʼa, man a dè na zhiklè, na haha ndohi cèw a maslaka nslekaɗaʼa a va, ta zhè a sam tengaʼa, a ta gaɗa:

¹¹ Kinè, ndohi Galilée, kin zlatsa, a kin pi di a zhiklè èhèmè? Yèsu haha, man a do na zhiklè a sam di kinè, a da shkè a deɓa, lèmèlèmè ara man kin rka, man a dè na zhiklè.

Ta cè Matthias te di man a Judas

¹² Te deɓaʼa ta jèkeda za Oliviers, man a zhè ndul ndul a ma kokwar Jérusalem, a gi km 1, a ta men ta a deɓa a kokwar Jérusalem.

¹³ Aman ta ndika a pa, to do a gi man a géɗèʼa, a ta nza a pa: Pierre, Jean, Jacques, André, Philippe a Thomas, Barthélemy, Matthieu, Jacques, kra Alphée, Simon ndo srak, a Jude, kra Jacques.

¹⁴ Tengahi tèlèba ta humda te nher gèɗ staɗ te ntsi ri pèc pècèk a nda ngwozai, a Marie, mam Yèsu, a kramamhi Yèsu.

¹⁵ A pats nasa, Pierre a nslambaɗa te ndev kramamhi na, a ngaɗa: (ndohi mɓicaʼa a gi 120).

¹⁶ Dalahimam ga, sèi a gi ara man ɗèlèwèr Zhiklè a gaɗa, man David a hodko te Mèzhèɓ Zhiklè nkezlaʼa te va nasa a gèɗ Judas,

¹⁷ ndo nfeda ta ma a ndohi man ta gso Yèsu. Nengaʼa staɗ te va nga, a nʼngots mizlinè Zhiklè haha a nda nga.

¹⁸ A nengaʼa a nsum dak a skwi malai, a ntüshko gèɗ a hai, hwaɗaʼa a ntuw na, a Vayats a mshkè auda.

¹⁹ A ndohi te Jérusalem tèlèba ta tsenaʼa, a ta baha na dak sa a ma tengaʼa: Hakeldama (ara ngèɗè dak Pombaz).

²⁰ Aman te ɗèlèwèr Psaumes ta Windo: Gi nengaʼa sèi a gi a dikai, ndo da nza a pa ɓai! A ta goɗ a vaʼa: Sèi ndo ngiɗè da co mizline nengaʼa!

²¹ Ani haha a woy ndo staɗ te ndev ndohi haha, man ta nza a sam nga pèc pècèk, te va man Bi Yèsu a zhè a sam nga, a sawala a sam nga,

²² daga pats man Jean a ngu baptême, ha pats man Bi Zhiklè a nceda Yèsu a zhiklè, da ga a ndo malwuɗi a nda nga a géɗ nslambaɗkaɗauda te mʼmetsi nengaʼa.

²³ A ta zlatsede ndohi cèw, Joseph man ta baha na Barsabbas, a nshibèn na Justus, a Matthias.

²⁴ A ta tsu rai: Bi Zhiklè, ka sun ndav ndohi tèlèba; ngreda nga ndo te ndev ndohi ncèwa haha,

²⁵ man ka woya a ncè mizlinè Zhiklè, a mizlinè ndo sak, man Judas a njè-keda, man a nzeda nshèffè na.

²⁶ A ta gu jimèr a géɗ tengaʼa. A jimèr a nkala na a gèɗ a Matthias, a ta humda na va a ndohi sak 11 ngiɗè.