Abdias 1 - Ma Zhiklè

Edom a fi va, a kèlèhai

¹ Skwi man a rka na di a Abdias: Bi Zhiklè Ndo nzi pèc pècèk a goɗo a géɗ Edom ar haha: Nga tsena ma mɓuaʼa a sam Ndo nzi pèc pècèk. A nzlündo ndo sak a sam ndohi herkeda: Va-slambaɗa, ngo-go-koy var a Edom!

² Na haha i ge ka a nkèshèʼa te va ndohi herkeda, a ta ngwossaha ka.

³ Nfi va ngaya a nʼngwoda ka va a gèɗ. Ka man ka nza te za, ka geda gi ngaya a géɗèʼa, ka goɗ te ndav ngaya:

⁴ Nda ckay a hi wa? Ko ka heda a géɗèʼa ara mangayak, ko ka geda gi ngaya a ndev bantihai, i cka ka a hi genè,

⁵ Ndo nzi pèc pècèk a gaɗa. Aman metsarhi ta slambaɗa ka va, a vaɗ, ka gedassa ma, ta hil skwi ara man ta woya ka ɓi ɗè? Aman ndohi mpèr nyi wof ta jèkeda pa slèw slèwaʼa azɓi ɗè?

⁶ Ta dumkoɗi Esau auda te gai, ko skwi man a nʼngheda a vèvèɗ.

⁷ Ndohi man ta derzla va a ka tèlèba ta erɗe ka a ma kuma. Mandalahi ngaya ta ngwod ka, ta dum ka a ma, a ta nzi a pa, tenga man kin nza a gumi a nda ta ta pèkètède ka, ka senaha ɓai.

⁸ I da zede ta ndohi maya tèlèba te Edom a pats sa, Ndo nzi pèc pècèk a gaɗa, a ndohi man ta sun skwai, te za Esau. Maya te pa klèng.

⁹ Théman, ngul ndohi ngaya ta da gudzai; ko wawa te za Esau ta da keɗaʼa.

¹⁰ A géɗ shèwa man ka ga na Jacob, kramam ngaya, ka ngècè hori a dai a ta da zede ka a mèdèp.

¹¹ Te va nasa aman ndohi te verzi ngiɗè ta helda skwi na a ma, a ndohi kokwar ngiɗè ta beza a nta-magi a ta duma kokwar Jérusalem, ka ba te va tengaʼa, a ka zlatsa a pa.

¹² Ka wuffa a géɗ matakwan kramam ngaya ɓai! Ka wuffa a pats man ndohi Juda ta zi ta ɓai! Ka tsa ta wagèsh a gèɗ a pats matakwan tenga ɓai!

¹³ Ka beza a kokwar ndohi ga ɓai, a pats man ta zi ta! Ka wuffa a géɗ matakwan tenga ɓai, a pats man ta zi ta! Ka wuffa a géɗ matakwan tenga ɓai, ka tor ri a ka cèma ta skwi tengaʼa ɓai a pats man ta zi ta!

¹⁴ Ka zlatsa a sam nkezli gèɗ civèɗ ɓai, a ka da bazl ta ndohi man ta hi ta ɓai! A ndohi man ta wuc ta, ka mende ta a deɓa a sam bihi ɓai a pats matakwan! Skwi man ka gau, a da ga ka lèmèlèmè. Skwi man ka gau a da ngwoda ka va a gèɗ.

Zhiklè a gi bai

¹⁵ Pats Ndo nzi pèc pècèk a zhè ndul ndul a sam ndohi herkeda tèlèba.

¹⁶ Ara man kin sau kokwi ndzoan Zhiklè a géɗ za nkezlaʼa, ndohi herkeda ta da sia pèc pècèk a nèf asaɓai. Ta siaʼa, a bazl ta, a ta ndev ta ara man ta gaka ta ɓai.

¹⁷ Aman a géɗ za Sion, skwi mʼmbel ndo a zhè, skwi nkezlaʼa, a ndohi gi Jacob ta da minè a deɓa a kokwar ta.

¹⁸ Gi Jacob a gi ara vogwa, gi Joseph ara nèʼèn vogwa, gi Esau ara düsh pandar, a fa na vogwa, a vogwa a ndedama, ndo man a mbel na te gi Esau azɓai. Ndo nzi pèc pècèk a ngoɗa.

¹⁹ Ndohi Négeb ta cè za Esau a skwi nʼndi gai. Ndohi Shephela ta cè skwi Philistie a skwi nʼndi gai, a dal Ephraim, a dal Samarie. A ndohi Benjamin ta cè skwi Galaad a skwi nʼndi gai.

²⁰ Ndohi man ta ga ta ɓèlè, ndohi var Israel, ta ndi kokwar a hinè te kokwar man a ndohi Canaan, ha ndè Sarepta. A ndohi Jérusalem man ta ge ta ɓèlè te kokwar Sepharad, ta ndi kokwarhi mbibihìaʼa te Négeb.

²¹ Ndohi mʼmbelda ndohai ta da dè a za Sion, a ta ga na kita a za Esau. A Ndo nzi pèc pècèk a gi bai.