3 John 1 - Ma Zhiklè

Mbalai

¹ Iyè, ndo mɓer ndohi Zhiklè, a sam Gajus, ndo man i woyaʼa te ma nzuraʼa.

² Gajus ga, ndav ga a woya, aman te skwi tèlèba ka nzi amba, amba, skwa da dza ka ɓai, a ndav ngaya da nza amba.

³ I wuffè kumba, aman kramamhi nga ngiɗè ta shkè a ta ngreda ma malwuɗai, ara man ka nza zuraʼa, ara man ka jèjèr ma nzuraʼa.

⁴ Mwuffè ga ngiɗè ngar nta azɓai, man i tsena, ara man wudahi ga te Kristi ta jèjèr ma nzuraʼa.

Va-fu ndo a gai!

⁵ Kramam ga, skwi man ka giaʼa, ka lèɓèsla a sam kramamhi, ko kramamhi nte verzi ngiɗè.

⁶ Ta ngreda mwoy-ndo ngaya a sam di mpi ndohi Zhiklè. Ka gi amba, aman ka feda ta ma, ara man ambaha Zhiklè.

⁷ Aman to do a géɗ nzlembaɗ Kristi, a ta cè skwi te ri ndohi nte deɓa azɓai.

⁸ Anai sèi nga ce ta ndohi arsa, aman nga gi a ndohi ntakaha ta a géɗ ma nzuraʼa.

Diotrèphe a sala ndav na

⁹ I winda ta ɗèlèwèr kètè a mpi ndohi Zhiklè. Aman Diotrèphe, nengaʼa man a woya a gi a ndo mbiaʼa te va tengaʼa, a woya a ncè ma ga azɓai.

¹⁰ Gar haha aman i da dè, i woy a nga gèɗè a géɗ skwi man a giaʼa. A tsa nga derngasl. Ko arsa a ngeza na di ɓai, a ce ta kramamhi azɓi genè, a va ta civèɗ azɓai a ndohi man ta woya a ta ce ta, a dzar ta auda te va mpi ndohi Zhiklè.

Ma malwuɗai man amba a géɗ Démetrius

¹¹ Kramam ga, ka lèmda va a skwi man ambaɓi ɓai, sèi a skwi man amba. Ndo man a gi skwi man amba, nengaʼa ndo Zhiklè. Ndo man a gi skwi man ambaɓai, a sun Bi Zhiklè ɓai.

¹² Ma malwuɗi man ndohi tèlèba ta gèɗè a géɗ Démetrius, amba, te ma nzuraʼa ba. A nga ba nga gèɗè ma malwuɗi a géɗ nengaʼa, a ka suna, ma malwuɗi nga, nzuraʼa.

Mbali man a deɓaʼa

¹³ Skwi man i woy a i windè ka, a zhè kumba dai, aman i woy a i windè a skwi nwindè a gada nwindè ka ɓai.

¹⁴ I zhèrè te ndav, i da rka ka ndul ndul. Te deɓaʼa nga da gèɗè.

¹⁵ Gumi da zhè a nda ka! Mandalahi ngaya ta ga ka mbalai. Ga ta mbalai a mandalahi nga, staɗ staɗ a nzlembaɗ na!