2 Timothy 4 - Ma Zhiklè

¹ Gar haha i bid ka, a vata ba, a sam di Zhiklè a Yèsu Kristi, man a di a shkè, a gi kita ndohi a nshèffè a ndohi mʼmetsaʼa, aman nda gudko va te kokwar-Bi nengaʼa:

² Nju ma Zhiklè, gu malwuɗi nengaʼa, ko a sam man amba, ko a sam man ambaɓai: ngatsa na maya a ndo, guv ta, bid ta, a nzhèr skwia dai, a mizlinè nʼnjè ma.

³ Aman pats a di a shkè, man nʼnjè ma man nzlerɗak a te pa ɓai, ambaha ta ndohi ɓai. Aman ta jèjèr skwi man ambaha ta tengaʼa, a ta ngècè ndohi njèngè ma tengaʼa, man ma tengaʼa a pa ta kocè kocè.

⁴ Ta da pizlè zlembaɗ a sam ma nzuraʼa, a ta menda va ta a deɓa a ta woy tsaval ambalai.

⁵ Aman ka, sèi hur skwi nzuraʼa, te skwi tèlèba, zuɓ matakwan a ndav amba, gu mizlinè nʼnjè ma mbelaʼa, rufa mizlinè ngaya man Zhiklè a baha ka a pa, te nlèɓèslè.

⁶ Iyè, i ara skwi man ta va na Zhiklè ma, pats mʼmetsi ga kalka ma.

⁷ I gu var man amba, i ndeva nhi ga, i ɓür ncè-a-ndav;

⁸ anai skwi mpèɗè gèɗ ngi-zuraʼa ntila tʼhi a géɗ ga, nengaʼa man Bai Yèsu, man a gi kita zuraʼa a da vayè a pats nasa, a ga gene ka ɓai, aman a ndohi tèlèba, man ta woyaʼa, a pats man a da gudko va a dai.

Ma te ndav Paul a sam Timothée

⁹ Vaska va a sam ga!

¹⁰ A géɗ man Demas a njèkyè ma, te man a woy skwi herkeda, a mdo a kokwar Thessalonique. Crescens a mdo a kokwar Galates, Tite a kokwar Dalmatie.

¹¹ Sèi Luc staɗgenè man a zhè a sam ga. Foko Marc a verzai, aman ka da shkè a sam ga; aman nengaʼa a takahayè te mizlinè ga.

¹² Tychique i zlinda a kokwar Ephèse.

¹³ Suɗkova, man i jèkeda a sam Carpus, a kokwar Troas, ckoɗa rai, aman ka da shkè. Hulko ɗèlèwèrhai, holholaʼa ɗèlèwèr hutèɗ!

¹⁴ Alexandre, ngwozla, a ngay skwi man ambaɓi kumba. Bai Yèsu a da pela na ara skwi man a gau.

¹⁵ Ka ba, gu maya a sam nengaʼa; aman nengaʼa a Sala va kumba a sam ma nga.

¹⁶ A sam kita ga nshèlèkuraʼa, ko ndo staɗ a ntakahayè ɓai. Ta jèkyè tèlèba. I fa ta mali a gèɗ azɓai.

¹⁷ Aman Bai Yèsu a ntakahayè, a mvay wuɗai, aman i slaha a i njè ma kumba, a ndohi nte deɓa tèlèba ta tsenaʼa. Gar haha i mbelkaɗauda te ma marizhèlè.

¹⁸ Aman Bai Yèsu a da ɓeryè te skwi ambaɓiaʼa tèlèba, a da mbelyè, a diyè a kokwar Bi nengaʼa te zhiklè. A sam nengaʼa nʼnjèlè te nhinkaɗ na a mèdèp! Amen!

Mbali man a deɓa

¹⁹ Ga na mbalai a Prisca a Aquilas, a ndohi gi Onèsiphore!

²⁰ Eraste nte Corinthe. Trophime i jèkeda a Milet, mbelakaɓai.

²¹ Sèi ka gi maya, aman ka shkè, ga via. Eubulus, Pudens, Linus, Claudia a kramamhi tèlèba ta ga ka mbalai.

²² Bi Zhiklè da zhè a nda mèzhèɓ ngaya! Pombi da zhè a nda kinè tèlèba!