2 Timothy 3 - Ma Zhiklè

Maya ndo a pats ndikèma skwai

¹ Aman sèi sun skwi haha: a pats man ndul ndul ndikèma skwi tèlèba, pats mwuɗitpa holholaʼa.

² Ndohi ta hér va ta genè, ta woy Suli genè, ta jégèr va, ta fi va, ta derɗe ndo, ta fi gèɗ a ma bab ta a mam ta azɓai, a ta shid gèɗ te skwa azɓai, ta woy skwi Zhiklè ɓai;

³ ndo a se ta te va azɓai, ta tsi gumi azɓai, ndohi ngre ndo, ta gi wuɗai, ta gi shèwa, ta woy skwi mbelaʼa ɓai;

⁴ ta ti ɗaf a gèɗ a ndo, ta wosla na va a skwi a ri ta, ta grè gèɗ, ta woy skwi herkeda a fena Zhiklè.

⁵ Ta fi va ta a ndohi Zhiklè, aman ta sun wuɗi Zhiklè ɓai. Menda va ngaya a deɓa a sam ndohi sa!

⁶ Te ndev tengaʼa ndohi man ta wuckaɗa vaʼa a metsar, a ta pe ta ngwozi man wuɗi ta azɓai, a wai, ngwozi man mali kumba a gèɗ ta, a ntétékè tsaɗ tsaɗ a ga ta,

⁷ man ta shindè skwi pèc pècèk, aman ta ndikè a sam man ta shin ma nzuraʼa azɓi fèt.

⁸ Lèmèlèmè ara Jannès a Jambrès, ta Sala na va a gèɗ a Moise, tengaʼa ba ta Sala na va a gèɗ a ma nzuraʼa. Ndohi man gèɗ ta ndzakaɓa, ncè-a-ndav ta azɓai.

⁹ Aman ta slaha ta gi arsa a ma ma azɓai. Nrzlè tengaʼa a di a ngredè auda a sam di ndo tèlè, lèmèlèmè ara man a gu a sam tengaʼa cèw haha, nda Jannès a Jambrès.

Paul a fa na ma a gèɗ a Timothée

¹⁰ Aman ka, ka dzodzor njè-ma ga, maya nshèffè ga, skwi man i huro, ncè-a-ndav ga, nzhèr skwi man i zhèrèʼa a dai, mwoy-ndo a ndav ga, nzhèrè te ndav ga,

¹¹ te va man ta parahayè, a ta gay matakwan te Antioche, te Icone, te Lystre. Te pa ta parahayè kumba. Te skwi tèlèba Bi Zhiklè a mɓeryè.

¹² Ndohi tèlè man ta woy a ta nzi a nshèffè a zlau Zhiklè te Yèsu Kristi, ta da ga ta matakwan.

¹³ Aman ndohi ambaɓihiaʼa a ndohi ncèkèlma ta gi ambaɓi holholaʼa a ma ma. Ta pi ndohi a wai, a ndohi ngiɗè ta pe ta tengaʼa a wai.

¹⁴ Aman ka, sèi nza te skwi man ka jongo, a ka sun te ndav ngaya a vava, te man ka sun ndohi man ta senda ka.

¹⁵ Ka sun ɗèlèwèr Zhiklè daga man ka kra, a nengaʼa a slaha a nslebda ka, a de ka a sam mʼmbel ndo te ncè Yèsu Kristi a ndav.

¹⁶ Aman ma ɗèlèwèr Zhiklè tèlèba, Mèzhèɓ Zhiklè a mvau, amba man a senda nga, a ngreda nga malai, a ngatsa nga maya, a njè nga te ngi-zuraʼa,

¹⁷ a géɗ man ndo Zhiklè a gi njèlèlèʼa, ntila a mizlinè man amba tèlèba.