2 Timothy 1 - Ma Zhiklè

Mbalai

¹ Paul, ndo sak Kristi Yèsu, ara man Zhiklè a woyaʼa, ara man a mpasla na ri nshèffè a hi te Yèsu Kristi,

² a sam Ti-mothée, kra ga man i woya a ndav ga. Pombai, nsi ndo te va, gumai te Zhiklè, Bab nga, te Kristi Yèsu, Bi nga.

Kin gu hori bai!

³ I shid gèɗ a Zhiklè, nengaʼa man i jèjèrèʼa a mèzhèɓ ndav mpanaʼa, ara man babababhi ga ta gau, a i tsi ri a géɗ ngaya pèc pècèk, a pats a vaɗ.

⁴ Mpataka ngaya a keɗyè, man i hér kuɗ ngaya, i woy a i rka ka, a ndav ga a wuffè.

⁵ I hér ncè-a-ndav ngaya nzuraʼa, nengaʼa lèmèlèmè ara man a zhè halaʼa te ndav Lois, mamam ngaya ba, a Eunice mam ngaya, a i suna, a zhè te ndav ngaya ba.

⁶ A géɗ nengaʼa i fa ka ma a gèɗ, àman ka piɗèkwuda pombi man Zhiklè a mva ka te ndav ngaya, te deɓa man i fa ka ri a gèɗ.

⁷ Zhiklè a mva nga Mèzhèɓ zlau ka ɓai, aman Mèzhèɓ wuɗai a mwoyndo, a nga gshè va nga.

⁸ Gar haha ka gu hori malwuɗi Bi mʼmbel nga ɓai, ka gu hori ga, man i ndo dangai, ɓai, aman sau matakwan a géɗ ma mbelaʼa te wuɗi Zhiklè!

⁹ Zhiklè, nengaʼa a mʼmbel nga, a mbaha nga, a géɗ skwi man nga gu ka ɓai, aman a géɗ man a hur te ndav na, a géɗ pombi man a va nga te Yèsu Kristi, man herkeda nʼnge di ɓai.

¹⁰ Antanta pombi haha nʼngreda auda, aman Yèsu Kristi, Bi mʼmbel nga a ngudko va, nengaʼa man a ngezlda wuɗi a ma te ri mʼmetsai, a ncko nshèffè a skwi man a huslè azɓai auda a sam nhél sam, te ma mbelaʼa.

¹¹ I ndo njè ma nengaʼa, ndo sak, ndo njèngè ma ara man a gaɗayè.

¹² A géɗ nengaʼa i si matakwan aranta. Aman i gi hori azɓai, te man i sun nengaʼa man i co a ndav, a i sun a vava, nengaʼa a slaha man a ɓeray skwi man a mvay a rai, ha pats ndikèma skwai.

¹³ Gso va a ma mʼmbel ndo, man ka tsena a sam ga, a ka lèmdè va ngaya a vna, te ncè-a-ndav, te mwoy-ndo Yèsu Kristi.

¹⁴ Skwi man amba a vata, man ta va nga a rai, ɓüro mbelambela, te Mèzhèɓ nkezlaʼa, man a zhè te ndav nga.

¹⁵ Ka suna, ndohi kokwar Asie tèlèba ta jèkyè; te va tengaʼa Phygèle a Hermogène.

¹⁶ Ndohi te gi Onésiphore da su Zhiklè te va; aman nengaʼa a mpay a pa ndav pats ngiɗè pats ngiɗè, nʼnga hori a géɗ man i ndo dangai ɓai.

¹⁷ Nʼndikè na a kokwar Rome, a nhassyè, ha a ngatsyè.

¹⁸ Da su Zhiklè te va a pats kita! Ara man a ntakahayè te Ephèse kumba, ka ba ka suna.