2 Peter 3 - Ma Zhiklè

Mpèsl ri mshkè Bi Yèsu

¹ Na haha ɗèlèwèr macecèwaʼa man i winda kinè, dalahimam ga, te nengaʼa i hadka kinè ma a gèɗ zaʼa, a i piɗèkwuda maya kinè nzuraʼa.

² Va-hur ma ndohi nhadka ma nkezlaʼa, a ma nkwèrè man Bai Yèsu, Ndo mʼmbel ndo, a mva kinè, man ndohi sak kinè ta njèʼa.

³ Va-suna man ndul ndul herkeda a da ndiv na, ndohi mparaha civèɗ Zhiklè ta shkè, a ta jèjèr ntétékè tengaʼa, a ta gaɗa:

⁴ Mshkè nengaʼa man a mpasla kinè rai, na tema? Babhi nga ta bazl ta ma. Aman tèlèba a dè a ma ma lèmèlèmè ara te nhinkaɗ na.

⁵ Ta woy a ta shinè ɓai, ara man daga nhinkaɗ na, ma Zhiklè a ngu giɗfèk a herkeda, a herkeda a mshkè auda te iyam, nʼngaʼa a iyam.

⁶ A iyam arsa herkeda ngedas na te va nasa; iyam mbiaʼa a ngedassaʼa.

⁷ Lèmèlèmè giɗfèk a herkeda, man ta zhè antanta, ma Zhiklè a mpe ta hai, a ta zhèr vogwa a nda ndohi man ta woy civèɗ Zhiklè ɓai, a ta da gé-dèsh ta a pats kita.

⁸ Aman skwi staɗ va-hur pèc pècèk, dalahimam gai A sam di Bi Zhiklè pats staɗ nara mvi gozhèm, mvi gozhèm nara pats staɗ.

⁹ Ma mpèsl ri Bi Zhiklè a gi ndudoh azɓai, ara tengahiaʼa ngiɗè ta huro; aman Zhiklè a zhèr skwi a géɗ kinè dai, a woya man ko staɗ a zi azɓai, aman a woya ta tèlèba ta ngwèdè ndav ta.

¹⁰ Aman pats Bi Zhiklè a shkè ara ndo metsar. Te deɓaʼa giɗfèk a tuw na toa, skwi ntil herkeda a ndiv na a sam vogwa mbiaʼa, a herkeda a skwi a géɗ herkeda, vogwa a da ndiaʼa.

¹¹ A géɗ man skwi haha a di a ndev na arsa, sèi kin slébèrdè Zhiklè a zlau, va-nza a maya a nshèffè nkezlaʼa!

¹² Vo-zhor pats Zhiklè, va-fu gèɗèʼa! A pats sa giɗfèk a skwi ntil herkeda ta ndiv ta a sam vogwa mbiaʼa.

¹³ Aman nga ngots mpèsl ri nengaʼa, a nga zhèr giɗfèk mɓuaʼa a herkeda mɓuaʼa, man ngi-zuraʼa a zhè te pa.

¹⁴ Gar haha, dalahimam ga, va-gu maya a vata, aman a da ngats kinè te gumai a sam di na, ma az a gèɗ kinè ɓai, te mali ka ɓai.

¹⁵ Aman Bai Yèsu a zhèr skwi a ma ma, va-rkaʼa ara skwi mʼmbél kinè, ara man Paul ba, kramam nga man nga woya a ndav nga, a winda kinè a maya, man Zhiklè a va na.

¹⁶ Te ɗèlèwèrhi nengaʼa tèlèba, a goɗ ma haha. Ko ma nengaʼa tsaɗ tsaɗ wuɗitpa a ncinè. A ndohi man ta sun skwa ɓai, a ndohi man ta nzi taraʼa azɓai, ta ngwèdèʼa, lèmèlèmè ara man ta gi a sam ɗèlèwèrhi ngiɗè, a ta gedassa va ta arsa a ri ta.

¹⁷ Kinè dalahimam ga, a géɗ man ta gaɗa kinè skwi haha ma, va-ɓür va kinè, man ɓai ncèkèlma ndohi mphömè a zlakede kinè lèmèlèmè a nda tengaʼa. Kin jèkeda sam man kin nza a pa taraʼa ɓai!

¹⁸ Va-gra a ma ma te pombai, te nshin Bi nga a Ndo mʼmbel nga Yèsu Kristi. Nʼnjèlè a nengaʼa antanta, a ma ma, a mèdèp! Amen!